ناونیشان: میدیای کوردی و ئاراستە خراپەکانی
نووسەر: #ڕەئوف ئالانی#
هەمووان ئه و ڕاستیە دەزانن، کە میدیا بایەخ و کاریگەری زۆری هەیە، لەناو ژیاندا، بۆیە ئەم کاریگەرییە، نابێ هەروا بە سانایی و سادەیی نادیدە بگیرێت، چونکە میدیا دەتوانێ ڕۆڵبگێرێت، لە بەدیهێنانی ئامانج و مەبەستی دیاریکراودا، جا ئەگەر ئه و ئامانجە پیرۆز بێت، یان بەپێچەوانەوە، ئەوەی ئەمڕۆی لە گۆڕەپانی ڕامیاری و کۆمەڵایەتی هەرێمی کوردستان، دەگوزەرێت، مایەی نیگەرانییە، بەتایبەت دۆخی میدیا، چونکە میدیا کاتێ ئەبێتە بەشێکی گرنگ لە ئەجێندای دەسەڵاتداران و بە پێی ویستی ئەوان ئاراستە دەکرێ، له و کاتەدا خەونی خزمەتکردن و ئامانجی گشتی کە هۆشیارکردنەوەی خەڵک و گەیاندنی زانیاری دروستە بە زۆرینە، ئه و ئامانجە لەدەست ئەدات و ئەچێتە خزمەتی توێژێکی بچووکی مشەخۆر، کە دەسەڵاتدارانن، لە دنیادا هەروابووە، دەستەی سەردەست و دەسەڵاتداران، ئامانجێکیان هەیە، ئەویش لەخشتەبردنی خەڵک و دێواندنی خۆیان، بۆ مەبەستی مانەوە و بەردەوامیدان بە ئامانجەکانیان، ئەوەش لەوەوە سەرچاوەی گرتوە، کاتێ بتوانن لە ڕێگەی میدیاوە چییان بوێت، پێی بگەن، لەم ڕوەوە، جێم مۆریسۆن دەڵێ : (هەرکەسێک، کۆنتڕۆڵی میدیا بکات، کۆنتڕۆڵی عەقڵی خەڵک دەکات).
هەربۆیە دەسەڵاتدارانی هەرێم، کەوتنە پەنابردن بۆ ئەم بیردۆزە، تا له و ڕێگەیەوە کە میدیایە، کۆنترۆڵی عەقڵی کۆمەڵگە بکەن، ئەویش بە کڕینی دەیان و سەدان نوسەرو ڕۆژنامە نوس و خستنە گەڕی داهاتێکی بێشومار بۆیان، تا ئەوان دەستەمۆو ڕامبکەن و له و ڕێگەیەوە میدیاکان بخەنە خزمەتی ئامانجەکانیان، ئه و کاتانەی میدیا، سەربەخۆیانه و ئازادانە کار دەکات و ڕۆڵی باشی خۆی دەبینێت، ڕاستیەکان دەخاتە بەرچاوو هۆشیاری کۆمەڵایەتی بڵاو دەبێتەوە و ماف بۆ خەڵک دەگەڕێتەوە، چونکە وەرگرتنی زانیاری بەپێی یاسا مافی هەموو ئەوانەیە دەیانەوەێت پێی بگەن و بەدەستی بێنن، له و کاتەدا میدیا و سۆشیالمیدیا دەبنە هۆکاری بەدیهێنانی ئامانجی خەڵک، هەرلەبەر ئەمەیە، کەسێکی وەک مارک مەکینۆن، دەڵێ : (تەکنەلۆژیاو سۆشیالمیدیا، دەسەڵاتیان بۆخەڵک هێناوەتەوە).
لەئێستادا جێی داخو نیگەرانیە، دەسەڵات بە پیلان کاری لەسەر ئەوە کردوه و پێچەوانەی کردۆتەوە، بەوەی دەسەڵاتەکەی بەهۆی داهاتی گشتی و قۆرخکاری، لەخەڵک زەوتکردووه و بۆخۆیانیان بردووە، کاتێ دەسەڵاتداران میدیا دەخەنە خزمەتی خۆیان، چییان بوێ و چۆنیان بوێ، وا بەگەڕیدەخەن، سۆشیالمیدیا بەشێکی گرنگی میدیای لەمڕۆدا داگیرکردوە کە ئەویش زۆربەی زۆری لەلایەن دەسەڵاتەوە ئاراستە دەکرێت، هەندێ ڕاپۆرت و بەدواداچوون دەکات، مرۆڤ توشی شۆک دەکات، لەم ماوەیەدا ڕاپۆرتێکم بەرچاوکەوت، باسی گریانی سەرکردەکانی دەکرد، هەرکەس ئەوەی بینیبێت، توشی ڕامان و سەرسوڕمان دەبێت، له و ڕاپۆرتەدا، واهەست دەکەیت، سەرکردەکان مرۆڤ نەبن و بونەوەرێکی جیاواز بن، هەست و سۆزیان نەبێت و سەرماو گەرماو ناخۆشی و نەخۆشی یەخەیان نەگرێت، کە ئەمەش مەحاڵه و نامۆیە شتی له و جۆرە هەبێت، ئەوەش دەچێتە چوارچێوەی لەخشتەبردن و دێواندن، لەپێناو مەبەستێکی نامۆو نائاسایی لەناو کۆمەڵگەدا، کە بینەرو گوێگر والێدەکات، بەتامەزرۆو تاسوقەوە، ئه و نەهێنیە بزانێت، کە بۆچی ئاسایی نیە، سەرکردەکان بگرین؟ ئایا ئەوانیش مرۆڤ نین؟
پێویستە خەڵکانی دڵسۆزو نیشتمان پەروەر، بەوریای مامەڵە لەگەڵ میدیا بکەن و نەهێڵن، بەجۆرێک ئاراستە بکرێت، پاشەکشە بە خەونی گەوره و ئامانجی پیرۆز بێنێت، ئەویش بە دروستکردنی میدیایەکی بەهێزی ڕاستگۆو دوور لە پاشکۆی حیزبەکان، بەتایبەت دەسەڵاتداران، هەرکاتێک ئەمە بەدیهات و بونیاتنرا، خەڵک لە بینینی دوو ئاراستەکە(میدیای ڕاستگۆه و ڕاشکاو) و (میدیای درۆو چەواشەکار) ڕاستی دەبینێت.
لەم بارەیەوە، ئەلێکسیس ئۆهانیان دەڵێت: (دیسپلینی دەوێت بۆ ئەوەی ڕێگە نەدەیت، سۆشیالمیدیا کاتەکانت بدزێت).
ئەوەی باسمانکرد، بەشێکی کەمە له و گرفتانەی ڕۆژانە لەناو میدیای کوردیدا بە مەبەست ئاراستە دەکرێت و دەبێتە بەشێکی گرنگ، لە ئامانجی دەسەڵاتداران، بۆ مەبەستی مانەوەی خەڵک به و شێوەازەی گەرەکیانە. [1]