ئەڤرۆ، نەوزاد هلۆری
ژبلی قانوون و دەستووری هەڤدەم ل پشکەکا هەرە زۆر یا وەلاتێن جیهانێ ب تایبەتی ڕۆژهەلاتا ناڤەراست ئاریشێن جڤاکی ب ڕێیا ئایینان دهێنە چارەسەرکرن، ل هەرێما کوردستانێ هەشت ئایینێن فەرمی هەنە، ڕێڤەبەرێ ئایینان ل هەرێما کوردستانێ دیارکر کو ڕولێ وان د چارەسەرکرنا پرسێن جڤاکی دا زۆر گرنگە.
ئەمیر عوسمان، ڕێڤەبەرێ پێکڤەژیانا ئایینان ل هەرێما کوردستانێ دیارکر کو جڤاکێ کوردستانێ د کەڤندا هەتا نوکە ڕولەکێ ئەرێنی و کارتێکەر د چارەسەرکرنا پرسێن جڤاکی دا هەبویە و بۆ ئەڤرۆ گۆت: (ل گورەی قانوونا هژمار پێنج یا سالا 2015ێ کو پەرلەمانێ کوردستانێ ب تێکرا ئەندامێن پەرلەمانی دەنگ بو دایە و بویە قانوون و نوکە حوکمەتا هەرێما کوردستانێ کار ل سەر دکەت هەشت ئایینێن فەرمی هەنە کو ئه و ژی ئایینێ ئیسلامێ، ئایینێ کریسیانان، ئێزدی، زەردەشتی، کاکەیی، سابیئی، بەهائی و جوهیان بخوڤە دگرن).
رێڤەبەرێ پێکڤەژیانا ئایینان ئه و چەندە ژی دیار کر هەموو ئایینێن کوردستانێ بناڤێ کومەلا ئایینان یان نەتەوەیان بخوڤە دگرن، جهێ داخێ یە چو ئامار ل بەر دەست نینن کا هەر ئێک ژ وان ئایینان چەند لایەنگیرێن خوە هەنە و گۆت: (بزاڤ دهێنە کرن وەزارەتێن پلاندانان یێن هەردوو حوکمەتێن هەرێما کوردستانێ و عیراقێ ژی کار ل سەر ئامارێن وان بکەن، گرنگە د چارچوڤێ وان ئاماران دا دەڤەرێن ئاریشەدار ژی ل گەل بن، ژبەرکو پرانیا پێکهاتەیێن ئایینێن نە موسلمان دکەڤنە وان دەڤەران، بەلێ زورترین ڕێژا ڕونشتڤانێن هەرێما کوردستانێ موسلمانن و کێمترین ژی جوهی نە).
ئەمیر دا زانین کو هەموویان نونەرێن خوە ل حوکمەتا هەرێما کوردستانێ هەنە و گۆت: (ئەرک و مافێن هەموو پێکهاتەیێن ئایینی و نەتەوەیی ل هەرێما کوردستانێ ل گورەی قانوونێ د پاراستنی نە و پێکڤە ژیانەکا هەرە گرنگ هەیە و بێ ئاریشە دژین، ل پارێزگەها دهۆکێ هەموو ئایین تێدا هەنە، بێگومان کەسانێن شارەزا و خودان ئەزموون و ڕێز دناڤ ڤان ئایینان دا هەنە و ڕولێ وان د چارەسەرکرنا ئاریشێن جڤاکی دا ڕولەکێ کاریگەرە و ل سەر بنەمایەکێ بهێز ئاریشان چارەسەر دکەن ب تایبەتی وەکو لایەنێ سیێ دناڤا ئاریشان دا، داکو بهێتە چارەسەر کرن).
ل بارا وان نەتەوەیێن ل کوردستانێ دژین، بروا عومەر بەرپرسێ ڕاگەهاندنا وەزیرێ پێکهاتەیان یا حوکمەتا هەرێما کوردستانێ گۆت: (کورد و تورکمان دوو پێکهاتێن سەرەکی یێن هەرێما کوردستانێ نە و ل دەستوری هاتینە بجهکرن، ژبلی ڤان کلدان، سریان و ئاشووری ژی وەکو ئێک ژ پێکهاتەیێن سەرەکی دهێنە هژمارتن، هەر ەندە نوکە عەرەب ژی ل هەرێما کوردستانێ هەنە و دژین، بەلێ ژبەرکو د دەستوری دا نەهاتینە تومار کرن ب پێکهاتەیا کوردستانی ناهێنە هژمارتن، هەموو ئه و پێکهاتەیێن نەتەوەیێن کوردستانێ نونەرێن خوە ل پەرلەمان و حوکمەتێ هەنە بۆ دووڤچون ل سەر ئاریشە و ئەرک و مافێن وان هەتا خوە وەزارەت داینە پێکهاتێن نەتەوەیی، د وارێ پێکڤە ژیانا نەتەوەیی دا چو ئاریشە دناڤبەرا وان نینن و هەموو پێکڤە دژین، زۆرترین هژمارا وان ژی کوردن).[1]