وەزارەتی تەندرووستی، پابەندی بڕیاری داواکاری گشتی نابێت
بەڕێوەبەرایەتی کۆنتڕۆڵکردنی هێنان و درووستکردنی دەرمان و ئامێری پزیشکی وەزارەتی تەندرووستی هەرێم ستیکەری دەرمان بە شێوازی ڕاستەوخۆ بە نرخی نزیکەی چوار هێندە دەداتە کۆمپانیایەک و بە نووسراوێک لە 28ی مانگی 11 سەرجەم کۆمپانیاکانی هاوردەکردنی دەرمان ئاگادار دەکاتەوە کە ستیکەری دەرمان دراوەتە کۆمپانیای ستیکەر تەکنۆلۆگ.
لەبەرانبەر هەر ستیکەرێک 3.85 سەنت دانراوە لە کاتێکدا پێشتر یەک سەنت بووە. کۆمپانیاکانی هاوردەکردنی دەرمان ئاگادار کراونەتەوە کە نرخی ستیکەرەکان دەکەوێتە ئەستۆیان و ئەوانیش دەیخەنە سەر نرخی دەرمان.
ساڵی پار بە هەمان شێوە، ستیکەری دەرمان بە قۆرخکاری درابووە کۆمپانیایەک و کەیسەکەی ڕەوانەی داواکاری گشتی کرا.
لە ڕۆژی 13ی 12 ی 2021، داواکاری گشتی هەرێم بە نووسراوی ژمارە 598 پاڵپشت بە ماددەی 7 لە یاسای داواکاری گشتی ژمارە 159ی هەموارکراوی ساڵی 1979 گرێبەستی پێدانی ستیکەری بە شێوازی قۆرخکاری بۆ یەک کۆمپانیا هەڵوەشاندوەتەوە. وەزارەتی تەندرووستی ئاگادار کردووەتەوە، بەڵام وەزارەت پابەند نەبووە بە بڕیارەکەی داواکاری گشتییەوە. لە ڕۆژی 26ی حوزەیرانی ئەمساڵ گرێبەستی لەگەڵ کۆمپانیای ستیکەر تەکنۆلۆگ ئەنجامداوە.
نزیکەی هەزار و 100 دەرمانی جۆراوجۆر لە ڕێگای دەروازە سنوورییەکان و فڕۆکەخانەکانەوە هاوردەی هەرێم دەکرێت. کۆمپانیاکانی دەرمان نرخی ستیکەر دەخەنە سەر دەرمانەکە و نرخەکە لە نەخۆش وەردەگیرێت. لە ئێستادا نرخی دەرمان ناخرێتە سەر ستیکەرەکە و کۆمپانیاکان پابەند نین بەیەک نرخەوە. نەخۆش نازانێت نرخی دەرمانەکە چەندە و بۆ هەمان جۆری دەرمان جیاوازی نرخ هەیە لە دەرمانخانەیەکەوە تا دەرمانخانەیەکی تر.
بەڕێوەبەرایەتی کۆنتڕۆڵکرنی هێنان و درووستکردنی دەرمان و ئامێر و پێداویستی پزیشکی کوردستان کە بەڕێوەبەرەکەی بەبێ پابەند بوون بۆ بڕیارەکەی داواکاری گشتی هەرێم دووبارە ستیکەری دەرمانی هەموو هەرێمی داوەتە یەک کۆمپانیا. پێشتر وەزارەتی تەندرووستی لەسەر دۆسیەی ستیکەر، کەیسێکی لە ڕێگای داواکاری گشتییەوە دۆڕاندووە، بەڵام پابەند نابێت پێوەی. [1]