#سەیدی هۆرامی#

سەیدی، مۊچیاری دڵیش کەرۊن گەر کەرەکشەن بە دېڎەنی مەعشووقەکېش یاوۊ، ئانە مەشۊم تەمەڵڵیۍ نەکەرۊن، مەشۊم پېسە مەجنوونی کەشکۊڵ کەرۊ کۊڵ، دەشت و سارا، کەش و کۊ، هەر پېسە مەجنوونی گېڵۊن پەی لەیلۍ.
مەجنوون بە دەشت و دەردا مەگېڵۍ پەی لەیلۍ، هاوارو فوغانش دەشت و دەرش پەڕکەردەبۍ، هەڵسی چەمانش سەیل ئاسا ڕۊخسارشەرە مەوەشتۍ، بە هەرحاڵ یاوا ماواو لەیلۍ، بەڵام بېجگە لادیوارێ وڕای هیچ ئەسەرێ نەمەنەبۍ.
مەجنوون سایەو دیوارەکەینە نیشتەرە، خەمانش فرەتەر بی، چونکم یاوانە کە یانەو لەیلۍ، هەم خېڵەکەشا کۊچشان کەردەن، بەڵام ماوای تازېش گمەنە. دمای سەرنجدایێ فرەی تووتەکەو یانەو لەیلۍ ئاما وەرچەماش، بەڵام زامڎار و نەوەش کۆتەبۍ، ئیتر مەجنوون تاکە یادگاریەکەو لەیلۍ (تووتەکە) ش ئارد کەنارۆ، ئاورا، تەژنە، هیلاک.
مەجنوون، هەرچا وەختەنە، نەچیرەوانێش دی کە ئاسکێش ڕاوەکەردېبۍ، بە پەلە لوانە وەردەەمو نەچیرەوانی، داواش وەنەکەرد نەچیرەکەش پەنە بەخشۊ، ئاڎییچ پیایانە ڕازی بی، مەجنوون گۊشتو ئاسکەکېش برېژنا پەی تووتەکەی، ئاهێش کۆتەنە، دەسش کەرد جامبازی. دماتەر مەجنوون بە ڕانمایی تووتەکەی هەواری تازەو لەیلېش ئېستۆ، ئیتر هەروەخت مەجنوون گەرەکش بیێ بە دېڎارو لەیلۍ یاوێ، تووتەکە یارمەتیش دۍ. ئەچی ڕازېنە سەیدی وەفاو تووتەی و خرابی ڕەقیبیش پەی بەرگنۊ.
دڵەی شەيدای مەست، دڵەی شەيدای مەست
ئەر تۊ عاشقنی، شېتی شەيدای مەست
شەرتی بەقاو بەين «قەيس»ی «لەيل» پەرەست
هەرتا زيندەنی تۊ مازەش جه دەست
ئەر تۊ گەرەکتەن يار ديڎەن کەری
هۊرگېره شېوەی قەيسی «عامر»ی
شېوەت ئيحسان بۊ چەنی ڕەقيبت
تا ديدەن دڵدار، بۊ وه نەسيبت
«مەجنوون» چەندێ بۍ پەی «لەيلۍ» وېڵ بۍ
دېوانەو سەر سام، بيابان گېڵ بۍ
مەگرەواو سەيلاو نه ديڎەش مەوەشت
ڕوێو پەی تەقدير کەردش عەزمی گەشت
خاتر پوڕ جه داخ، دەروون جه خەم کەيل
هۊردارا بۍ شەرم، فەرياد پەرێ لەيل
لەيلش به ئاواز بەو تەور مەلاونا
سەدای زاری ئەو، سەنگ مەتاونا
بەو دەشت‏ و دەردا سېر گېڵا خەيلێ
ئاخر شی وەلای هەوارگەی لەيلێ
ديش خېڵی لەيلۍ نەو جا، هۊر کەندەن
مەنزڵ وېرانەن کەس تېش نەمەندەن
مەجنوون خۊ وېڵ بۍ، بەتەر بی هەرده
هەڕ داش به سەردا، چوون ئازيز مەرده
ديوارێو دەس چن لەيلی نازار بۍ
سايەش شيفای دەرد قەيسی بيمار بۍ
شی نه پای ديوار مەجنوونی دڵ ڕېش
تاسای ئەو کەرۊ، زامانش ساڕېش
ديش سەگێ زەعيف، ڕېشی کوهەن ساڵ
ها نەپای ديوار، کەفتەن وه بۍ حاڵ
سەر تا پای تەنش چەنی زامان ڕېش
زوان کەردەن تېغ، پەی زامانی وېش
مەماڵۊ نه زام، زوان چوون نەشتەر
وه ڕووی زامی سەخت، مەشانۊ وەشتەر
ئېنده مەشوو مۊر، ها نه ڕووی زامش
بيەن چوون دەوار، سيا ئەندامش
چەن وەختەن کەسێ نانێ نەدان پېش
سازان چەنی زۊخ، ئيستخوانی وېش
غەير جه قورسی «بەدر»، مانگی 'دوو' هەفته
هەرگيز چەم به شکڵ نانێ نەکەفته
شی به نزيکش قەيس سارا گەرد
کېشا پەی حاڵش، ئاخی سيا سەرد
وات ئەی پاسەبان، سيای خەيمەی يار
ئېشکچی شەوگار نه دەوری ديوار
چەرخەچی شەوان، ڕۊ نه دەرو دەشت
«بەبر»ی «شېر» شکار، پەرێ «ئاهوو» چەشت
پوڵنگان ئەوسا فکری تۊشان کەرد
حەساری کۊشان، پەرێ وېشان کەرد
نەعرەتەی دەنگت هەرکۊ مەياوا
مەنزڵانی چۊڵ مەکەردش ئاوا
ئينه چه حاڵەن تۊ پەنەت ياوان
چمان ئەندامت به تېغ شکاوان[1]