باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و ویس و چوارەمە
تا چن وەختۍ سەلمان پا دامېوە کە تاتەیش پەنە بەستەبێ گرفتاربۍ، ئاڎ تەنیا ئانەش پەی کریا کە بە کابرێوە مەجووسیرە هەواڵو کاروانو شامی بزانۊ، کابرای مەجووسی خەبەرش زانا کە کاروان فڵانە ڕۊ جمۊرە، ئیتر سەلمان بە هەر نۊع بی، وېش جە دامەکۍ تاتەیش ڕزگارکەرد، یاوا کاروانەکەی، شی وە شام، چاگە هەواڵو زاناتەرین ڕەهبانانیش پەرسا، واتشان: نامېش (ئاسەفەن) ، فڵانە کەنیسەنە منیشۊرە، دەردەم سەلمان خېزیاو لوا پەی لایش.
بەڵۍ تا چن وەقت پەشتیش نە خاک بۍ
بەو دامە سەلمان هەر گرفتار بۍ
ئاخر مەجووسی وە بۍ مودارا
کیانا وە لای قەومی نەسارا
قافڵەی ئەوان جە خاس و جە عام
دەخیلم هەر وەقت مەشان پەرێ شام
وەقتەن ئەر بېوەقت ئەر شەوەن یا ڕۊ
من سەر حیساب کەن هیچکەس نەزانۊ
جەو دەم قافڵە ئەهلی نەسارا
پەرێ عەزمی شام ڕووکەرد نە سارا
یەکێ وە سەلمان یاونا پەیخام
قافڵەی عەزیم ها شیی پەرێ شام
دەر ساعەت سەلمان دانای خورەدمەند
وېش جە حەفزخانە ڕەها کەرد جە بەند
دەردەم ڕاهیی بی ڕوو کەرد وە سارا
یاوا بەو قەتار قەومی نەسارا
نە وە ڕۊژ قەرار نە وە شەو ئارام
مەنزڵ بە مەنزڵ تاکە شاری شام
پەرسا ڕەهبانان خاستەرین کامەن
شېوەش چە تەورەن نامش چ نامەن
واتشان: بوزورگ گشتین ئاسەفەن
ئاگاش جە ئەسرار سەدای هاتیفەن
مەنزڵ هەر نە تۊی کڵېسا دارۊ
دایېم هەر کۊکۊ، نوور لېش مەوارۊ
یەکێ وە سەلمان قەدەم و کڵېسا بەرد
دیش نەوجا، مدران ڕەهبانان سەفسەف
تا شیی وە حوزوور، جەنابی ئاسەف
دەردەم چوون غولام کەفت نە خاک و پاش
جەو دەم گوشاڎ کەرد، زوبان و سەناش
ئەو وەقت، ئاسەف وات: ئابات یە چېشەن
نیازت کامەن، مەتڵەبت چېشەن
وات: من مەیلم ها جە لای کڵېسا
موشەڕەف ببوون، بە دینی عیسا
تەیی کەردم ڕاهان سارا و کەش و کۊ
تاکە شاڎ ببوم. بە خزمەتی تۊ
بەل وە قەواعید ئەمری شەریعەت
فایز بووم بە فەیز ئەمری ڕەفیعەت.[1]