میرزا ئۆلقاڎر، نەچیرەکۍ و نامە شېعریەکۍ سەید ئەحمەد بەگیش لا یاوا، بە پارچە شېعرێ جوابو سەوقاتییەکەیش مڎۊوەو دەسوەشیش وەنەکەرۊن، ئینېچ شیعرەکۍ میرزای:
دۊسەکەی گیانی
دۊسەکە گیانی هام‌فەرد فەردم
شەفای ئېش زام، دەوای گشت دەردم
جەلا بەخشەندەی دڵەی پەڕ خارم
حەکیم دەرمان دەرد ئازارم
نامە و سەوقاتت گرد وەلام یاوا
لوتفت کەم نەبۊ، خەیلێ ماڵ ئاوا
پەی حاڵ بەندە مەندەی هەواران
خەم دابېت قامەت وېنەی خەمباران
پەنات وە بارگەی پیران بەردەبۍ
فەراوان دۊعای خەیرت کەردەبۍ
دەک شاغڵ وە زەوق شاڎ و خەندە بای
هەر زەڕە شیرین خوڎا و بەندە بای
ڕۊ جە ڕۊ فېشتەر، بڵەند بۊ پایەت
کەم نەبۊ جە فەوق بەندەگان سایەت
عادەتەن جە دەور ئەهل دیگیران
دایېمول ئەوقات دۊعاشان گیران
جە ڕووی مەرحەمەت ئەرپەرسی حاڵم
کەمی وەشتەرەن ئیستە ئەحواڵم
مەخسووسەن تەئسیر دڵەی پاک تۊن
برشتەی ئەنفاس شەرەفناک تۊن
وەرنە تەمام بی جە باسان باسم
ئەروام پەرواز بی چەنی حەواسم
خوڵاسەی عومرم وە ئاخر یاوان
بارخانەم کەیلەن یەکسەر جە تاوان
ئارۊ و سەباهەن دەم دەم دەور جە تۊ
کۊچ شەرمەندەن سای سەرای گڵ‌کۊ
فەرموودەی مەعدووم جەنەتولماوان
دەک بە ڕەحمەت بۊ چ خاس فەرماوان
(پای هەوەس تەزان ئارەزووی مەوڵەق)
(مەندەن وە ڕەحمەت بۍ پایان حەق)
بەڵام مەمنوونم جە بزورگی تۊ
نەچیرت کەردەن وە باڵام کۊ کۊ
جفتی کەو، کام کەو، ئاڵای نیرەبەق
خاڵ و مل شیرین، پەڕ و باڵ ئەرزەق
چەنی یەک یاهوو نازک ئەندامێ
پاکیزە و لەزیز شیرین تەعامێ
گشت چاخ و چینە پۊرتە هەواران
واردە جە شنۆی پای میرشکاران
خسووسەن خەرگووش تەیار تۊڕی
زەڕابە قامەت وېنەی خەرگۊڕی
وە زەرب ماردم پېکات چەنی تیر
دەس‌خۊش ئافەرین شیری شیران‌گیر
نەچیرت یەک‌یەک وە بەندە یاوا
دووبارە یانەی ئیحسانت ئاوا
جە کۊت پېڎا کەرد ئەی ئەحشاماتە
ئەی گشت وەحشیات ڕووی سەربساتە
مەر پارېز پای کەڵ ڕېزت بەردەن
جە کام شکارگا نەچیرت کەردەن
کۍ کەردەن جەی وەر، وېنەی تۊ شکار
یەند گرۊی نەچیر، یەکایەک یەکجار
ئەڵبەت یا خزر ڕەهنمای ڕېتەن
یا دۊعای چاوبەند، وەحشیان پیتەن
دیڎەی بەڎ دووربۊ دایېم جە مەردیت
جە دەس و ماردم هەوای کۊگەردیت
جە زات شەوان سوب سەحەرخېزیت
جە فرزی و هەڵمەت پەنا و پارېزیت
سا یاشا عومرت زیاڎ بۊ جە سەر
بە حەق ڕوتبەی پاکی پیغەمبەر
منیچ هەم جە نۊ سەفایە بەردم
وە گۊشت نەچیر، وېم شەهید کەردم.[1]