فەلەک خامۊش کەرد
بەشۍ یەکەمە
میرزا ئۆلقاڎر پەی وەفاتو شای نیزامەدینی و سەیید ئیبراهیمی، دیسان گلەیۍ جە گەردوونی کەرۊن کە ئەلحەڎ سەرای سەنگش کەردەن بە ماواو مەسکەنشان، چانەی زیاتەر ماچۊ بېیەن بە ماواو ئاخیرەتو گرڎ کەسێ، گەردوونی بېوەفا باڵاو نازارا و پاشایا و سەرهەنگاش نە گڵکۊی تاریک قاییم کەردەن.
فەڵەک خامۊش کەرد، فەڵەک خاموۊش کەرد
شەوق شەوچراغ، شاڎییم خامۊش کەرد
حوجرەی دڵ وە هوون خەمان خەم‌پۊش کەرد
دیڎەم چوون جەیجوون ئەسرش خرۊش کەرد
نېش خەم جە نۊ، قامەتم قاخ کەرد
وە داخمای خەم دەروونم داخ کەرد
نەک هەر من تەنیا چەواشەن تاڵەم
خەم وەشتەن وە بان فەرق گشت عاڵەم
فەڵەک ماتەمەن ئافتاب بېنوور
ڕۊی ڕۊشن بېیەن وە زاج دەیجوور
سەرزەمین یەکسەر پەردەی خەم پۊشان
هەردان یەک یەک گشت بادەی خەم نۊشان
مەخلوقات یەکسەر شین و زاریشەن
(الوداع) گەرم بۍ قەراریشەن
چېشەن یە کام نەرد کام نەڎامەتەن
یە زەلزەلەی گەرم ڕۊی قیامەتەن
یا واڎەی دادەی دانای داوەرەن
غەوغای ڕەستاخېز (یوم المحشر) ەن
یا حوکم ئەقدەس بۍهەمتای فەردەن
شای نیزامەدین وەفاتش کەردەن
زام دڵ جە زووخ هۊرشانۊ قایم
لاڵ بام پەی وەفات سەیید ئیبراهیم
یاران هام‌سەران هەی دەردەداران
ئەی خېڵ مەینەت ئەهل خەمباران
چن زووخاو دەرد ئەحبابان وەردم
مەنام مەکەردۍ گرانەن دەردم
نەمام شاڎییم فەڵەک هەم کەرد پەی
هەرەس وەماڵم هەی وە ماڵم وەی
دەروونم جە زووخ سەروازەن جە خەم
چوون بەحر توفان مەوج مەڎۊ وە هەم
تک تک مەڕېزۊ زووخاو نە جەرگم
کوڵ هونەی هونەن سەرتاپای بەرگم
چېش واچوون فەڵەک چەواشەی کەچ‌نەرد
بەخوڎا جە پاکان دنیات گشت چۊڵ کەرد
چوون نەجاڕ وە تېغ مەودای بۍئامان
پەی کەردەی باڵای نەوتووڵ نەمامان
فەڵەک هەی هانا هەی داڎ هەی بۍداد
ڕەنج کېت نەکەرد وە ڕەنج فەرهاد
جامەی سفیدت وە کۍ نەپۊشا
یا جورعەی مەوتت وە کۍ نەنۊشا
ئەنگوشتت پەی کۍ نەڎا وە ماشە
باڵای بەخت کېت نەکەرد چەواشە
کام شېخ کام سەیید کام ئەولیای وەقت
نەبەردت وەپای ئەلحەدسەرای سەخت
واچە کام والی کام میر کام وەزیر
کېت وە دام سەخت مەردەن نەدان گیر
سا لاشەی کام شات نەکەردەن فەرتووت
تەخت کېت نەکەرد وە تەخت تابووت
کام میر و سەرهەنگ، سەرنگون نەکەرد
یا کام سەردارت وە ناکام نەوەرد
باڵای کام مەحبووب شای گەردەن بېگەرد
نەکەرد وە پەشتان خاک سیاسەرد
یا کام نۊجوان چوون سەی ئیبراهیم
نە گڵکۊی تاریک نەکەردت قاییم
فەڵەک بۊ چەنیم بکەر زاری و شین
پەی فەوت ئاغەی شای نیزامەدین
ئاخ ئاخ پەی ئه و کۊی کەشف و کەماڵە
داخ پەی ئه و لوقمان حاڵزان حاڵە
وەی پەی ئه و باتن ئه و کەراماتە
داخ پەی ئه و سەردار سوپای ساداتە
داڎ پەی ئه و کردار بەشەر نەکەردە
جە ئەولیاهان گشت گره و بەردە
هانا پەی شېخی بەستامی تەرزە
سەدای بزورگی نە عالەم بەرزە
ئه و ئاگا جە حاڵ ئەهل قبوورە
ئه و مەست جورعەی بادەی تەهوورە
چوون هەوای هەردان هەناسەم سەردەن
لاڵ بام سەی نیزام وەفاتش کەردەن
ئه و یەتیم پەروەر مەزڵووم نەوازە
ئه و مەعروف موڵک شام و شیرازە
ئه و سام و ستووت نام و نگینە
ئه و جەبهە و جەماڵ شېوە شیرینە
ئه و زیکر و تەوحید تەقوا و تاعەتە
ئه و فیکر و خەیاڵ ئه و قەناعەتە
ئه و تام و تەئسیر عەقڵ و کەماڵە
ئه و تەسەروفات ئه و جەزبە و حاڵە.[1]