شین پەی محەمەد بەگو وەکېڵی
بەشۍ چوارەمە
میرزا ئۆلقاڎر، مەردەو محەمەد بەگو وەکېڵی بە زەهرێ وېناکەرۊن کە نۊشانش، ئاڎ وېش کەرۊن فیداو ژیوایش، یانەیش، موڵک و ماڵیش، ڕاوەشکاریش، پۊشاک و یاگەی خاویش، زیاڎە ڕەویێ تەر جە میرزا ئۆلقاڎریۆ پەی کەسێ بە نامبانگی کە کۊچی دمایینش کەردەن، ئینەیچە ملۊنە قاڵبو وۍ بە کەم زانای و ئاتاجی.
وە فدای قەسر پاک بېقسوورت بام
وەفدای تاق نیم تاق سفیدکاریت بام
دایېم جای دیوان یادگاریت بام
وەفدای فەرش خاس ڕەخت و خاوت بام
موتەکای سنجاب بۊ گوڵاوت بام
وەفدای دۊشەکان پەڕقووی سافت بام
گشت پارچەی پەڕبەند حەریربافت بام
وەفدای سەرئەنداز بانی قاڵیت بام
وەفدای سەرای چۊڵ یاگەی خاڵیت بام
وەفدای شەوق و زەوق پەڕئاهەنگت بام
ڵلە و مەروەنکی هەزار ڕەنگت بام
وەفدای زەم‌زەمە و خۊشی و بودت بام
هەرشەو نەدەوران کورسی و عودت بام
وەفدای خوش‌خانان مەکتەب نۊت بام
چریکەی ساعات شەوانه و ڕۊت بام
وەفدای مەحزەری مەعجووناتت بام
وەفدای موجریان توحفەجاتت بام
وەفدای یەخدانان ڕەخت ئاڵات بام
جای لباس زەڕ کاڵای باڵات بام
وەفدای تەداروک نەزم یانەت بام
وەفدای ئەندەروون سەندوق خانەت بام
وە فدای مهتابی دڵ‌گوزینت بام
وەفدای برووجات جای نشینت بام
وەفدای یاتاخان شاپەسندت بام
ئەیوان و سەیوان ئاینە بەندت بام
وەکېڵ وەفدای حەوز کەوسەر بېزت بام
وەفدای فوارەی ئەسرین ڕېزت بام
وەفدای باغچەی خۊش دڵ‌حەزینت بام
دەروازە و حەسار کەس نەدینت بام
وەفدای ئەسپەکەی بەهاربەندت بام
ئەسپانی تازی ڕەمەی ڕەندت بام
وەفدای زەردی زنج زەردەخەنەت بام
دایېم دەلایل قورئان وەنەت بام
وەفدای کۊی تاعەت کەس نەکەردەت بام
وەفدای دین‌داری پوشت پەردەت بام
وەفدای چەتر زەڕ سایەبانت بام
عەبای لەحسایی سورمەی شانت بام
وەفدای مەلبووسات کەس نەپوشت بام
وەفدای عەقڵ و دەرک فام و هۊشت بام
وەفدای قەبای زەرد شوخ و شەنگت بام
سەلتە و سینەپۊش گشت قەشەنگت بام
وەفدای ئەو خەنجەر دەستەماهیت بام
دەوان جەوهەر حەربەی شاهیت بام
وەفدای ئەو نگین سەرئەنگوشتت بام
وەفدای شاڵ سەوز زەریف پشتت بام
وەفدای سەماوەر دایېم جۊشت بام
وەفدای مەجالیس نۊشاونۊشت بام
وەفدای پیاڵە و جام و بادەت بام
جوانی و شەوکەت خودا دادەت بام
وەفدای زەم‌زەمەی دیواخانت بام
وەفدای کارخانە و سفرە و نانت بام
وەفدای ڕەمەی خاس وەجامەندەت بام
کەلەی بېساحیو پەڕاکەندەت بام
وەفدای فەرزەندان جە تۊ جیات بام
چوون ئاهووی سەرسام سەرلېشېوات بام
وەفدای بەخشایش خارا و کیشت بام
خەڵات و ئەنعام بېئەندېشت بام
وەفدای دەرد دڵ زام کاریت بام
وەفدای ئېش سەخت نادیاریت بام
وەفدای کۊچ خاک سەرای سەنگت بام
هەواری تازەی تار و تەنگت بام
سا من چېش کەروون جە زوان لاڵ بام
با وېنەی قەقنەس وە کۊی زووخاڵ بام
تۊ جە قەبر قووڵ سیای پەڕخەتەر
نە شەم نە حەرەم نە یار نە یاوەر
کەس ئاگاش نیەن زەرەی جە حاڵت
چۊنەن چتەورەن حاڵ و ئەحواڵت
یە چە ژارێ بۍ تۊ ئەو ڕۊ وەردی
یانەی وېت وە دەس وېت وېران کەردی.[1]