میرزا ئۆلقاڎر، باس جە بەختەی سیاۋەو ۋېش کەرۊن، نەک هەر بەختەش، بەڵکم لاشەش، میاچەماش، خامەش، دەفتەرش، سەوادش، ئینجا وېچش بە ڕوو ڕەشو بارەگاو خوڎای مزانۊ. میرزا گلەیۍ جە لاو نەقاش (خوڎا) یۆ کەرۊن، کە چی پا تەرزە بەڎبەختەن، میرزا پەی زەریفتەر کەردەی شېعرەکېش، گوڵی ڕەش مەوزۊ دلېش، کە نیشانۍ سیاۋی بەختېنە، هەریاگێ گوڵێ ڕەش بەرمەیۊ نە خاک، من شەرمناک مەبوون، چونکم بەختەو ۋېم مارۊۋە یاڎم، دمایی زیاتەر پا مەگېرۊرە جە گلەییەکاش، خەلقو ۋېش پا تەرزە، ماچۊ: خەلقێ چیمنە، هونەرێن ئەی نەقاش؟
دیارەن میرزا چی شېعرېنە مەبەسش جە نەقاشی (گەردوون) ەن.
نەقاش ڕوو ڕەشم
نەقاش ڕوو ڕەشم نەقاش ڕوو ڕەشم
هەر جە ڕۊی ئەزەڵ ڕەشیت دا بەشم
هەر جە نووکی پا، هەتا بن کەشم
ڕەشەن ڕەشی ڕەش سەرتاپا لەشم
ڕەشەن قەڵەمم، ڕەشەن دەفتەرم
ڕەشەن سەوادم، ڕەشەن هونەرم
ڕەشەن کەلەی پووک، ڕەشەن دەمینم
ڕەشەن موژگانم، ڕەشەن جەمینم
ڕەشەن بەختی بەڎ، بە ڕەشی مەستم
من هەر ِڕوو ڕەشی، ڕۆژی ئەلەستم
ڕوو ڕەشم نەقاش جە لای قەوم و خوېش
گلەییت بۊ نەقاش زندەگیم پەی چېش
ڕەشم ڕووڕەشم جە لای خاس و عام
خەجاڵەت بارم لای عالەم تەمام
خەجاڵەت بارم نەقاش سەرسەخت
چوون بە ڕوو ڕەشی منت کەرد بەدبەخت
هەر کۊ (گوڵێ ڕەش) سەوز مەبۊ جە خاک
من پەی بەخت بەڎ، مەبوو شەرمناک
کام نەقاش نەجا چوون تۊ بېکارەن
کام جسمی لار وېنەی من لارەن
نەقاش گیروڎەی دەرد گران بۍ
کېت بە ۋېنەی من قیمەت هەرزان بۍ
کېت بە ۋېنەی من زوان لەنگ کەردەن
بېشوعلە و خامۊش زوان لەنگ کەردەن
مەگەر ئەی نەقاش من عەبد تۊ نیم
پەی چېش تا وە سەر هەناسەسەرد بیم
دەک نەقاش هەم تۊ، دەس کۊتەرە بی
جە غەم و خەفەت پەڕخەتەرە بی
داخم هەر ئانەن ئەی ئوستای ناشی
بە تەعریف واچی ئینە نەقاشی.[1]