دنیا پۆچی وەشەنە، بۍ بەرېنە
ئی واتۍ مانێوە قووڵەی سیاسییە، هەم کومەڵییەش هەنە، ئینسان بە ئازاڎی ئامان دنیاوە، مەشۊم بە ئازاڎی بژیوۊ، بەڵام ئازاڎیێ کە سنوورو خەڵکا تەری پاشېل نەکەرۊن. ئاشکەران هیچ کەس نمەتاوۊ (بەرە _ دەربازە) وزۊ دنیێ و کرېڵەکەیش بنیۊ کیسەش، چوونکووم گەر پاسنە بۊن، پېسەنە ئی دنیێ کریێبۊ بە هۊڎێ و بەرەکەش ژنیابۊ، هەرچن ویرۆکەردەی بڕێ جە خەڵکە دیکتاتورەکا و پارتە خاوەن ئایدولوجیە نامۊکا بە ژیوای ئینسانی، نیەتی چامنەشا هەن، بەڵام سرووشت، هەم فیترەتو ئینسانی دنیێوە بۍ بەرېش گەرەکەنە.
واتاو پەندەکۍ ئەچاگۆ ئامێنە هەکە گرڎ ئینسانێ کاتێ پا منیۊ سەرو ئی دنیێ، پەرس بە هیچکەسی نمەکەرۊن، هیچ کەس قودرەتو ئانەیش نییەن ڕاگیریش چەنه بکەرۊن، کارو خوڎایەن و هەرمانەو بەندەی نییەنە. واتێوە تەرەش ئانېنە هەکە ئی دنیا فراوانە و پانەنە، پەی هەر یاگێ نیاز و حەز بۊ، مەتاوی بلی، گەر ڕاگیری خەڵکەکا نەبۊن، خوڎای گۆرەیچ فەرماوۊ: زەمینو خوڎای فراوانەن، گېڵڎېش پۊنە. [1]