$Agahiyên şehîd:$
Nav paşnav: Emre Dokûner
Nasnav: Baz Mordem
Cihê jidayikbûnê: Riha
Dayik-Bav: Turkan-Salîh
Dem û cihê şehadetê: 29-04-2019/ Garê

$Kurtejiyana şehîd:$
Di nava wan şert û mercan de ku civak û kesayet parçe parçe bûn, gelê Kurd neçar hate hiştin ku xwe înkar bike û qanûnên mirinê yên mêtingeriyê dihate ferzkirin, Rêber Apo dest li dîrokê werda û gelê Kurd ji xweliyên xwe ji nû ve afirand, rastiya gelekî şerker li Kurdistanê ava kir. Ev têkoşîna ku nîv sed sal e bênavber dewam dike, di nava bêderfetiyan de hate meşandin. Nirxên ku bi keda mezin a şehîdên nemir û xwîna bi dilop dilop hate rijandin hatin afirandin, bûn bingeha têkoşîna me û kevneşopiyeke berxwedanê ya serketinê afirand. Bajarê me Riha ku malovanî ji berxwedana Hîlwan-Sêweregê re kir ku yek ji mînakên destpêkê yên Şerê Gel ê Şoreşgerî yê li Kurdistanê bû, qada destpêkê bû ku Têkoşîna Azadiyê ya Kurdistanê ya bi pêşengiya Rêber Apo lê bi pêş ket û bû gel. Ji rastiya gelekî ku polîtîkayên înkar û tunekirinê bi rengekî bêrehm li dij dihate meşandin, Rêber Apo bi wezîfeya herî bi rûmet rabû ku jiyaneke azad, kesayet û civakeke azad biafirîne û ev yek pêk anî. Gelê me yê welatparêz bi coşeke mezin xwedî li xeta têkoşînê ya PKK'ê derket, ji nifşan re ragihand û vejîna gelê me hate pêkanîn. Riha warê vê meşa pîroz a azadiyê bû. Hevrêyê me Baz jî li Pirsûs a Rihayê li nava malbateke welatparêz ji dayik bû, di nava têkoşîna me de, bi felsefeya jiyana PKK'ê mezin bû. Ji aliyekî ve berxwedana bi rûmet a gelê me ku ber bi azadiyê ve dimeşe, li aliyê din êrîşên bêrehm ên dewleta Tirk a mêtinger ên li ser gelê me didît, rastiya dijmin ji nêz ve nas kir. Ji ber ku li nava malbateke welê mezinb û ku di nava zor û zehmetiyên madî de hewl dida debara xwe bike, hevrêyê me zû hînî kedê bû. Hevrêyê me Baz ji bo xwendina zanîngehê çû navenda çanda serhildanê ya Kurdistanê Amedê, di vê demê de felsefeya Rêber Apo û berxwedana dîrokî ya PKK'ê hîn bêhtir ji nêz ve nas kir. Hevrêyê me ku li Zanîngeha Dîcleyê li Beşa Mamostetiya Fîzîkê dixwend, di vê demê de biryar da ku bi rengekî çalak tevlî nava têkoşîna jiyana bi rûmet û paşeroja azad a gelê me bibe, bi vî rengî beşdarî karên ciwanan bû. Kolan bi kolan geriya, ji bo gelê me û ciwanên Kurd ên paşeroja gelê me ne zane bike, kedeke mezin da, di demeke kurt de bû pêşeng û bi çalak beşdarî gelek xebatan bû. Gelek caran terora destgîrkirinê ji aliyê dagirkeran ve lê hate kirin, lê belê bi bilindkirina têkoşîna xwe bersiv da hemû êrîşan. Hevrêyê me Baz sala 2014'an ku êrîşên înkar û tunekirinê yên li ser gelê me giran bû, qirkirin li gelê me dihate ferzkirin, beşdarî nava refên Gerîlayên Azadiyê yên Kurdistanê bû ku garantiya paşeroja azad a gelê me ye û têkoşîna xwe derbasî çiyayên qedîm ên Kurdistanê kir.
Hevrêyê me Baz taybetmendiyên kesayetiyê yên ku sîstemê afirand tune kir, ji bo karibe xwe li ser xeta Apoyî û milîtaniyê ji nû ve biafirîne gelekî hewl da, bi perwerdeyên wergirtî ji aliyê îdeolojîk û leşkerî ve zû xwe bi pêş ve bir, ji bo armancên partiya me pêk bîne bi daxwazeke mezin tevlî nava pratîkê bû. Hevrêyê me ku demekê li Garê kar kir, li dijî êrîşên qirkirinê yên çeteyên DAÎŞ'ê yên dijminê mirovahiyê li dijî gelê me yê Êzidî, bi hêrseke mezin xwest tevlî nava hevrêyên destpêkê bibe ji bo xelkê me yê Êzidî biparêze. Piştî ku ev pêşniyara wî hate qebûlkirin, hevrêyê me ji bo şer li dijî çeteyên qirker bike derbasî Şengalê bû û êşên ku gelê me dikişand bi xwe dît. Hevrêyê me Baz ku êrîş û êşa bi gelê me dihate kişandin ti carî ji bîr nekir, hêrsa xwe veguherand şer û ji bo gelê me azad bike bi rengekî fedaî şer kir. Piştî ku wezîfeya xwe bi serketî qedand, tevî hevrêyên xwe vegeriya çiyayên azad ku navenda berxwedanê ya Kurdistanê ye. Weke gerîlayekî ku li nava şer bi pêş ket û bû xwedî tecrûbeyên mezin, têkoşîna xwe dewam kir. Bi kesayetiya xwe ya bi enerjî û dînamîk, li her qadê hevrêyên xwe tevlî jiyanê dikir, bi wan re bi hevkarî ruhê komunal diafirand. Bi têgihiştina xwe ya kûr, bi jêhatîbûna xwe dihate naskirin û yek ji hevrêyên li pêş bû. Ji bo xwe û hevrêyên li derdora xwe bi pêş bixîne, ji bo karibe di felsefeya Apoyî de xwe kûr bike û li qada leşkerî xwe şareza bike, her tim kûr dibû. Ev yek ji taybetmendiyên sereke yên hevrêyê me Baz bû.
Hevrêyê me Baz girîngiyeke mezin dida her kêliya jiyanê, kedeke mezin dida her kêliyê, ji xwe re dikir esas ku her kêliyê bike nirxek û li nava refên Têkoşîna Azadiyê ya Kurdistanê li ser xeta fedaiyan meşiya, bi her awayî tevlî nava têkoşînê bû. Bi rêbaza xwe ya ku nirxên heyî diparast, bi pêş ve dibir û nirxên nû diafirand, mîrateyeke xurt a têkoşînê li pey xwe hişt. Hevrêyê me Baz wê di têkoşîna me de her tim bê bîranîn.
[1]