بەڼەو خوڎای بۍ عەیب نیەن
ئەچی دنیانە هیچ کەسێ کامڵ نییەن، مرۊڤی کامڵ تەنیا بە نامېنە، ئڼا گرڎ بەشەرێ بڕێ کەم و کوڕیۍ و عەیبېش هەنۍ.
گەر لایەنی فیزیکی بگېرمۍ، وېنمۍ هەر یۊ جە لاشەشەنە کەمیێ هەن، ئیتر ڕەنگە ئا کەمییە دیار بۊن، ڕەنگەیچ فرەو خەڵکی هەسش پەنە نەکەرۊن.
ئانەیچ بییەن بە پەندێ خەڵکی بەکارش ماران، زیاتەریچ پەی کەم و کوڕیە مەعنەویەکا، یام سیفەتەکا.
پەی نموونەی (ڕەزیلی، چەم پیسی، دڵ پیسی، تالېق دەری، کەم ئاوەزی، ۋیر کۊڵی، تەممەڵی، ..هتد) .
پەی نموونەی چن کەسێ باس جە نەفەرێ کەران، باس جە پییاوەتیش و نان بڎەییش و دەس و دڵ عالیش مەکەران، بەڵام عەینو وەختینە باس جە سیفەتێ خرابیچش کەران، ماچان فرە دوۊەن، یام چەنەبازەن، ئیتر کەسێ جە کۊنیشتەکەنە ماچۊ: ئیتر پاسنەن، بەڼەو خوڎای بۍ عەیب نییەن.[1]