بەرز پڕی، نزم نیشی
ئی پەندۍ بڕێ فرەو کەسەکا مەگېرۊوە، بەرز پڕای باڵداری هیلاک کەرۊن، وەختێ مەنیشۊوە مەگنۊ یاگێ نزم سەرو زەمینی. پەندێ وېمانۍ فرە مانادارەنە، ئا کەسۍ کە بە هۊکارو زەڕی، یام دەسەڵاتی، یام جوانی جە وېشان فاڕیان، بەخۍ کەران ملو خەڵکیرە، وېشا جە پلێوە بەرزتەر مەوینان، هەر ئەچی دنیانە خوڎای گۆرە لووتەشا چەقنۊ زەمینەرەو نزمېشا کەرۊوە.
بەرزی و گۆرەیی تەنیا پەی زاتو خوڎایەن، پەی ئاڎەمی نامان گۆرەیی برمانۊ. وەڵینا واتەن وەختێ تیرە دلۍ کەمانینە بەرمشۊ، فرە بە دەماخەو لووت بەرزەنە، چوونکوم پەی بەرزی و ئاسمانی ملۊن، بەڵام دمای بڕیەی ئا بەرزیەیە ئیتر هېزش تەمامیۊو مەجبوور سەرەو وار مەگنۊوە، نووکش مەچەقۊ خوڵەکۍ. گەر مروڤ سەرنجەو ئانەیە بڎۊ مەشۊم دەرس و عیبرەت وەرگېرۊن، مەشۊم بڎیۊ پەی وەڵینەکا هەکە جە بەرزە پڕیشانە چېششا سەر ئاما.[1]