تۊبەو ۋەرگی مەرگەن
بڕێ کەسۍ کە خڎۍ مەگېران بە هەرمانێوە، ئیتر بە زامەت وازش چەنە ماران، گەر دزی بۊن، یام بەڎ ڕەفتاری بۊن، دەم پیسی بۊن. ئا جۊرە خەڵکۍ ئا ڕەفتارە ناشیرېنۍ لوێنۍ دلۍ ۋنېشا، پېسە وەڵینا واتەن چەنی شۊتی واردېنېشاوە،
هەرچن خەڵکە عالەکۍ هۆڵۍ مڎان پەی خاس سازیشان، مۊچیاریشان مەکەران کە وازباران چا ڕەفتارە بەڎا، ڕەنگە پەی کاتێ کەمی دورۍ بگناوە، بەڵام هەر دەرەتانشا پەی لېویا، ئیتر پېسە واتەنشا نە ۋارانشا دییەن، نە وەشت، ملاوە سەرو خڎەکۍ وېشان، دەسکەراوە بە هەرمانە بەڎەکاشان.
ئیدیۊمەکۍ ئا کەساچە مەگېرۊوە هەکە ئینێ پلێوە باڵاو دەسەڵاتینە، زوڵم کەران، کۊشتە و بڕیەی کەران، هەرچن خەڵک داواشان وەنە کەرۊن هیچ فاییڎەش نییەن، تەنیا چارەو ئا جۊرە کەسا مەرگەن.[1]