لاچەمېوی گولانە سەرو کتېبوو (ژیان لە بازنەی ڕووداوەکاندا)
بەشۊ: حۆتەمۍ
دیسان چا بەشەنە نویسەر باسوو خەتەنە کەردەی کوڕ و کناچا دلێ گردو دەگایەکا ئا مەنتێقەیەنە کەرۊ و ئی هەرمانێ بە تەرسناکتەرین و قیزەونتەرین هەرمانە نامۍ بەرۆ. بە تایبەت فرە سەرو خەتەنەو کناچا ملۆ و باسش کەرۊ.لاپەڕەو (223).
جە فرەو یاگانە چەمما گنۆ پا عادەتە ناشیرین هەن کە بېیېنۍ بەشێو جە فەرهەنگوو خەڵکی. پاسە باو بېیەن ئەر کەسېو وەختوو درەوێ درەوەو خەلەی، کە درەوانش واچېنێ، داسەکېش کولە بیێ، مەشیێ قروونجێش گرتێ ئۆ کناچە دۆمێ تاکو دەسێش تێژێ بېیېنۍ و داسەکېش خاس درەوەو خەلەکەیش کەردێ. لاپەڕەو (246).
هەرمان و پیشەو خەڵکی چی بەشەنە ئاندە بە وردی باس کریێنێ، کە وەختێو موانیشاوە، پاسە ویر کەریۆ نویسەر هیچش ناستەن جیا و باسوو گردچیویش بە خاس و خرابۆ کەردەن.
هەرچی بەشەنە باسوو فەسڵوو وەهاری و هامنی کەرۊ و ئا گژ و گیواوێ کە خەڵکی فەقیر چا فەسڵانە پەنەشا ژیواینێ.
نامۍ فرەتەروو گیواوا، کە هەم پەی واردەی و هەم پەی دەرمانی، چی بەشەنە دانە بە دانە نامۍ بریا و وزیا وەروو باسی. فرەو ئا گیواوا هۆرامانیچەنە هەنێ بەڵام بڕېوشا بە نامۍوەتەرە.
پاقلانجە، ددان تێژکەرە، ترشکە، خەردارە، چاوبازە، چاوبۊرە، کووز و ماکووز، کۆزەڵە، پیژۆک، هاڵەکۆک، دەمگەنە، ڕېزڵە، ڕازیانە، سیاسۆنی، گیا قەتران و بە دەیان گیواوېتەرێ.
دیاردەو ڕاوێ و تەڵەنیای پەی ڕواسا، بە حەکایەتێ وەشێ باس کریا و شەرحە مدریا.
جووتیار هەر جە ساڵەکا نۆجوانیشەنە خولیاو گۊرانی واتەی سەرەشەنەبۊ و ئاشنا بېیەی چەنی (یەدوڵڵا ڕەحمانی) هۆنەرمەند و دەنگ وەشوو سەرپوڵ زەهاوی و مەنتێقەو کرماشانی، میاونۊش ئا یاگێ کە فرەتەر تێکەڵوو هۆنەروو گۊرانیا بۊ و پەی ئەوەڵ جارێ هەر بە یاردیدای ئا هۆنەرمەندیە ڕاش گنۆ ئۆ ڕادیۆ کرماشان و چن گۊرانیېوە زەپت کەرۊ.
چی بەشينە سەرو کەسایەتی و هۆنەروو (یەدوڵڵا ڕەحمانی) فرە ملۆ و چن حەکایەتێ و بەسەرئامێ وەشێ باس کەرۊ.
دەوران فرە زوو ویەرۆ و جوانی جووتیاری گنوونە دلێ دەس پەنە کەردەو ئینقلابوو خەڵکوو ئێرانی دژوو پاشایەتی.
چی بەشينە جووتیار باسوو دەس پەنە کەردەو شۆڕشوو ئێرانی و ئامای ئایەتۆڵڵا خومەینی و بەرشېیەی شاو ئێرانی کەرۊ. بە دەسپەنە کەردەو شۆڕشی جە ئێرانەنە خەڵکوو کوردیچ جە ڕۊژهەڵاتوو کوردسانېیەنە هەر پېسەو بەشەکاتەروو ئێرانی بەشداری چا ئێنقلابەنە کەرا. ئاندە مەبەرۆ دەسەڵات فاریۆ و جە ئەوەڵین وەهاروو ئازادیەنە، حێزبێ و سازمانە سیاسیەکێ وېشا بەر وزا و دەس کەرا بە فەعالیەتی ئاشکرا.
نویسەر چی بەشەنە دیسان مێوە سەرو بار و دۊخوو ڕۊژهەڵاتوو کوردسانی جە وەهاروو ئازادیەنەو و گنۆ باسوو حیزبە سیاسیەکاو کوردسانی.
کەم کەم چەنی ویەروو زەمانی و گەشەو شۆڕشی جە ئێران و بە تایبەت کوردسانەنە. نویسەر بەسەرئاماکا بەپاو ویڕ و ئەندیشەو وېش باس کەرۊ. ئینە بە بڕواو من ئاساییا تاکو زەمانێو چەواشەکاری دلێ نەقڵ کەردەو ڕووداوەکانە نەکەریۆ، هیچ ڕەخنێو مەگنۆ سەرش. بە ڕاسی چېگەیچەنە نویسەر فرە سەرکۆتەن، چوون بە زوانی کەسەکاوە ڕووداوەکا پاسە کە بېیېنۍ گېڵنۊشاوە.
ئاشکرا بېیەی حێزبێ سیاسیێ چا وەختەنە پەی جووتیاری تازە پەنە یاوای، سەرنج کېشێ بېیېنۍ و فرە بە تاسۆ باسشا کەرۊ.
نۆرۊزوو وناوی سنەی، یۊ چا ڕووداوانە کە نویسەر فرە سەرش ملۆ و پېسە ئەوەڵین زەخمېوی کاری کە جە بنکاوڵوو خەڵکوو ڕۊژهەڵاتوو کوردسانی دریان، نەقڵش کەرۊ.
دەس پەنە کەردەی جەنگوو پاوەی و فەرمانەو جەهادوو خۆمەینی یۊ چا مەسەلانە کە چی بەشوو ئاخروو کتېبېیەنە فرە باس کریۆ. ئی بەشیە من ئیتر مدەو دەسو وانەرێ کتېبەکەی.
چی بەشێنە مادامێو نویسەر وېش جە هیچکام چی جەنگانە بەشدار نەبېیەن، بەسەرئاماکا مسپارۆ بە شاهێدا دلێ جەنگەکەی و بە زوانێ ئاڎۍشاوە قسەکا کەرۊ. هەر ئینە یۊ چا تاکتیکانە کە هەم ویرەوەریێنە و هەمیچ ڕۊمانەنە بەکار بریۊ و بە بڕواو من یۊ چا خاڵە هەرەقەتین و پتەوا ئی کتېبیە ئا بششەنە.
ڕەزا بەهمەنی.[1]