دەمەتەقێوە وېمانۍ چەنی ئاشنێوە سۆرانی زوانی
بەشۍ: دوەمە
دمای قسەکاش، منیچ دەسم کەرد ڕۊشن کەردەیۆ، پەرسام ئەو ئاشنا سورانیەکەیم:
من چەنی تۊ ئەنفال کریانا، وېم و زاڕۆڵەکام جە سارا وشک و چۆڵەکاو باشوورو ئێراقی زینڎەبەچال کریاینمێ، دەگایەکام کاولێ کریاینێ، دەربەدەر بېیەنا، سروشتوو وەڵاتیم سۆتەن، ئاوەو ھانەکام یا وشکە کریا یان ژاراویە کریاێنە. کشت وکاڵ و مەڕوماڵاتم بە تاڵان بریان و شیرازەو گلێرگەیم ھۆرڕووشکیانەو. جە هەڵەبجە پاڵو تۆنە ژاراوی کریانا، زاڕۆڵێم وەرەچامامەو خنیکیاینێ و سۆتێنێ. زاڕۆڵە خنیکیایە نازارەکام ھەر دلێ ھەوشەو یانەکەیمەنە بە دەسو وېم ئەسپەردەم کەردێنی، ئانێچ کە مەنێ، ئاوارێ وەڵاتا بیێ و ئیسەیچ هەر بۍ سەروشۊنینێ.
چەنی تۊ پېشمەرگایەتیم کەردەن، ژەن و زاڕۆم بە دەسکورتی و هەژاری ئاستێنێ جیا و وێچم بە ئەورا و تەژنەیی چەنی داگیرکەری شەرم کەردەن و گېیانم بەخت کەردەن. گردو ئی چەرمەسەریا پەی ئا ئامانجیە بێنێ کە تۊ نامۍت نیان کوردایەتی. من ئی ئەوەگژیایەم جە ڕاسیەنە پەی ئازاڎی تاک و کۊمەڵی، پەی مافی یەکسانی و دێمۆکراسی و دادپەروەری و دژ بە داگیرکاریم کەردەن، بەڵام تۆجە ڕاسیەنە هەر پەی ئانەیتە کەردەن کە یاوی بە دەسەڵاتی ڕەھاو وېت. ئیسە کە یاوانی بە دەسەلات، ئا گردە چەرمەسەریا کە ئاماێنێ ملو منیچەرە، ویرت شیەنێوە. چا دەسەڵاتیچە کە کەوت دەست، منت بۍ بەش کەردەنا.
بەڵۍ، جە بەشکەردەی شەڕ و یانەوېرانی و شاربەدەری و ئێش وئازار و مەینەتەنە برایەو دەسودڵوازەنی و فرەیچ خاسەنی. چاگەنە کەریم برابەش و حازرەنی بەشەکەو وێچت بڎەی بە من. بەڵام ئەر سەوای دەسکۆتێوەش چەنە بی، ئیتر برا بۍ برا. چاگەنە مازیم جیا، پەشتیم ماڕی، زوانم بڕی و جە گرد مافێو بی بەشم کەری. ئەر دەنگیچم بەربەێ، هەڕەشێم وەنە کەری. پەی نموونەی چا باشوورەنە کە تۊ دەسەڵاتت زەوت کەردەن، من نە تەنیا بە هیچ مافێوەو وېم نەیاوانا، بەڵکوو جە مافە سەرەتایەکایچم بۍ بەش بېیەنا. تەنانەت جە مافی ئێنسانی وانای و پەروەردەی بە زوانی ئەڎایی وېم بێبەشت کەردەنا. تۊ گەرەکتەن جە گرد مافێو ڕووتم کەریوە و گرد مافێو پەی وېت دەسەبەر کەری. ڕووتکەردەیەو هەر خەڵکێو جە مافە سەرەتایەکاش، ڕا وەش کەردەین پەی قەڵاچۆ کەردەی ئا خەڵکیە. جا ئیسە واچەم پەنە، تۆفیروو هۆرزووکەوتی شۆڤینیستانەو ئارۊو تۊ چەنی منی هۆرامی چەنی هۆرزووکەوتی شۆڤینیستانەو هیزی بەعسی گۆڕبەگۆڕی چەنی من و تۊ چا سەردەمەنە چېشەن؟ و هەرپاسە چەنی شۆڤینیسمی ترک و فارسی؟
دەی ئیسە من پان هۆرامیستنا یان تۊ پان سۆرانیست؟
تۊ و زاڕۆڵەکاو تۊ هەم جە مەحاڵوو وېتانە، هەم جە مەحاڵوو منەنە مافوو وانای و پەروەردەیتا بە زوانی ئەڎایی وېتا ھەن، بەڵام من و زاڕۆڵەکاو من نە جە هۆرامان، کە نیشتگاو وېما و یانەو وېمانە، نە جە نیشتگاو تۆنە ئا مافما نېیەن. ئەر داواو ئی مافە ڕەوایما کەرمۍ، زوو ماچدۍ ئینە مەترسین پەی ئەمنی قەومی. مەخسەڎیچتا جە ئەمنی قەومی بەڕاسی ھەر ئەمنی سۆرانین. بەڵام تۊ کە گردو ئی مافاتە هەنێ، من نمەواچوو مافەکاو تۊ مەترسین پەی منی هۆرامی. من ماچوو هەر مافێو کە تۊ هەنت، مشۊ منیچ بۊم. ئینەیچ مافێو ئێنسانین، هەم پەی من، هەم پەی تۆ.
دەی ئیسە من پان هۆرامیستنا یان تۊ پان سۆرانیست.
موختار کەریمی.[1]