چەمۍ قووجنا، ئەجۊشا ئېمەیچ نمەوینمېشا

دەگاکێما فرە زمسانش سەختبێ، قەڎیمیاما فەرماوابېشا: (هەرکەس چل شەوۍ پاییز مەنۆ بڎۆ کەلی ڕەق بیۆ مەلمێ شۊنیشرە) .
ئی دەگاو ئېمە حدودە بۍ، چەنی وەرکەوتەو هۆرامانو تەختی.
ساڵەبۍ ویس ڕووۍ گەلە نەزیۍ، بن پاسارۍ بەرزەڵخۍ ئازێنېرە، بەرەو هەیوانۍ نەکریېوە چوون وەروە گېرێش، شەوەی چانۍ بۍ یەرۍ جار بان ماڵێنمۍ، پەلەوەر پەل نەشانۍ، تفت کەردێ عاسمانی بەسێش، چوون زمسان چلێش هەنە، بورجو پیرەژەنېش هەن، مرۊ وشکانش چەنەن، چەنی ئی سەختی زمسانیچە دەگا جمەش ئێ چەنی مێمانا.
دوۍ یەرۍ نۆعۍ مێمانېش چەنە بێنێ، نۆعێشا کۊڵبەرێ بێنۍ، وەرکەوتەو دەگێکێماوە ئامێبێنێ پەنگیێبێنێ، دەسێچشا گەرمەسێرۆ ئامێبێنێ شەل و کۊرشا پەنەبۍو بەرایشا بەرێنۍ پەی لاو شێخ و مەشایێخی پەی دوڕوی پەی هۆرامانو تەختی پەی لاو جەڕاحا، کۊڵبەرەکۍ مزگینە خەڵک بەرێشاوە چوون فرێشا ئشناسێبێنۍ، بەڵام کۊڵبەرەکێ تاکو هەوا وەشش نەکەردەبیێ نەلێنێوە، فرە خەجاڵەت فامێنۍ، زوو زوو دیێنۍ پەی کەلی تاکو کوچێ فەسڵ دێش پەنەو یۊ کۊڵێ چایی بەرێنێوە و لوێنێوە، وەختی چانەیچ بۍ قۆمیێشا وەنە دەگانە جاڕ دێنۍ لۆدۍ فریایشاوە، ئی کۊڵبەرۍ خوڎا خوڎاشابۍ ڕات گنۆ ئۆ دیم، داڵاو دواڵا گېڵێنۍ شۊنیترە بەرێنێتۆ یانە، ماسو مەیا و کەرۍ گاوە زەردۍ و دۊ بزات پەی نیێنېرە، وەختێچ ئامێنیوە کیسێ خەنێ و یۊ ئوسمە و یەرۍ چوار خەپلۍ زەڕاتینێو چوار پەنج دەسۍ وەزی وەزەپەڕاتیت پەی پېچێنێوە.
بەڵام نۆعێ تەر مێمانێما بێنۍ بە نامۍ مێمانێ بێنێ، چوار فەسڵە بیێبێنۍ بار ملو دەگێوە، ئینۍ سەرو حەوزیوە یان چایخانەو دەگێنە تەوزێحێ بێنۍ ملو یانارە، وەختێ ئێنۍ یانەیچت قەرزار بارت کەرېنۍ، واچېنۍ ئېمە ئی گرد تەقەلاو شەو نە وتەیما پەی شمەن، بەش ڕوێ بەیۊ وەرۆ دەوران فاڕیۆنەو عەیزاتا دەیمێ. بە یانەکایچۆ نەمردێنۍ هەر لایێ زڕەو زەنگی ئامێ پاکەشاوە لوێنۍ تەڵەبو شوانەی داماگیچ هەرچیێش پەنەبېیۍ بەرێنېش، جە نان و تۆشەیش بییێ یان قومە ئاوەو کونیشکڵەیش.
وەختێ دەوران فاڕیاو کاشی بە عەمەل ئاما لوێ سەرو سفرەی حازری، ئیسە ئەر ساڵی جارێ وینیشا چەمۍ قوجنا ئەجۊشا ئەرئاڎی ئېمە نەوینا ئېمە ئاڎیشا نمەوینمۍ.
عەفان دەرەمەڕی.[1]