یاڎەوەریەکېم
بەشو: یاڼزەی
خەبەرەکەش جەراحەتێوە قووڵش وستەنە یەھەرم، قووڵتەر جە ئی چن مانگ و ساڵەی دمایی. زەخمێوە عەمیق، شېڎار و تەڕ. ھەم جەسەش لەڕ و لاواز کەردەنا و ھەم دڵ و ڕۊحم سەرگەردانەن و گیریانەرە. وجوودمەنە نمەیۆزووشەوە. جاران جوغرافیایش ئشناسێنێ و سەرنیشت و پانیشتیش، زانێنێ ئینا چکۆگەو لاشەیمەنە! ئیسە نمەیۆزووشەوە. گومم کەردەن، بۍ سەروشۆن، بۍ قوڵاخ!
یانەیچنە کتېبەکام کە خەریکنا وانووشاوە، پژگیاینێ. پاسە مزانینە کە ئاڎیچێ زانانشا بە خەبەرەکەی و جەرەیانەکەی، فاجێعەکەی. منیچ پېسە زاڕۊڵەیوە ئەورا و تەژنای، کە نەزانۆنە چېشش گەرەکەن، سەرگەردان، شێویا. شېویانا و پەشۆکیا. مووسیقا نمەیاوۆنە لام و دووری دوور کەوتەنوەوە. سیاوچەمانەی نمەژنەوونە، کەڕ و کاس بییەنان. یەھەرش گەرکەن، مننە جەراحەتەکەی کوشتەن. جەستەش گەرەکەن، لار و لوېر کەوتەن. دڵ و ڕۊحش گەرەکەن، وێڵ و سەرگەردان و بېیابان زەدەن.دەمش وشک بییەنوە و جە گۆی کەوتەن.
جاران بېیایە، شێعرێوە جە حەزەراتوو ئەرز و ئاسمانی، مەولەوی و بېسارانی، ئی زەخمییە ساڕێژ کەرېنە و چن چرکە ساتێوەیچ بېیایە، نازێنە ۋنیش وەستایەنە، ئاودزش کەردایە.ئی جەراحەتە ھیچ کە بە ھیچ چېویە نمەسرەوۆنە، ئاودزش کەردەن و ۋنیش وەستەنەنە و نائارام و بۍ قەرار کەوتەنەرە. جاران بېیایە، مەززێوە جە کەلیمەکاو ڕۊمانەو بەردینەی، گۆڕەشاری، پاژێوە جە یووسای، کافکای، میلان کوندێرای بەرێتەنە ئەسفەلەسافلین و کەسی نەوینینی، پېسە سۆفییەوە جە خەڵوەتکەدەکەو پیشالیاری. زەخمەکەت سۆچێ و ساڕێژ بێنە. ئەی چی یووسا مواچۆنە: کتېبخانە پەناگایېوەن پەی ڕۊیاو خېیاڵا. وېش جادوون و سێحراویی. ئێش و ئازار نمازۊنە. پېسە ئەڎایېم واچۍ: دوور گۊشدارا، دەواو ئازارەبارکێ و سنانین.
سەی قادری ھیدایەتی جە ڕۊمانەو بەردینەینە ماچۊ: ئانە ئەڎا تۆخوڎا، حیکایەتوو بەنگین و شارۍ چن شەوېتەر کۆتاییش مەینە. ئەدایېم وات: ئاڼە پەنەت وەش هەن زوو ئی حیکایەتێ دماییش بەینە؟ واتم: ئەرۍ وەڵڵا پەنەم وەش هەن مەینەت و خەموو شارۍ زوو دماییش بەینە. ماچۊ واتش : وەرلەکەم حیکایەتەکەیچ کۆتاییش بەینە، خەم و بەڎبەختی شارۍ قەلەنەدەری یانەوېران دمایش نمەینە. خەبەرەکا و قۊمیاکا ھەمیشە ئینە کیسەمانە و حەر پېسە تۆمی، ترووکنمێشان. کێ جە جەھەڼەمی تەرسنینە؟ من ئینانا ئەسفەلەسافلینەنە. من کە وېم مەردەنان، ئیجا پەی کێ موهیمما مەنەی و نەمەنەی من.
بورهان ئەختەر.[1]