مێژووی سەرهەڵدانی ڕۆژنامەگەری لە #کەرکووک#؛ بەشی شەشەم
شوان خورشید

دەرکەوتنی ڕۆژنامە و سەرهەڵدانی زیاتر لەو سەردەمانە، گڕوگاڵی کردووە کە دەنگی ئازادی و ڕێزگرتن لە دەربڕینی ڕای ئازاد بڕەوی هەبووە. بۆیە دەبینین هەر لە دوای پڕۆسەی ئازادی ئێراقەوە بەلێشاو لەشارەکانی ئێراق ڕۆژنامە و گۆڤار و بڵاوکراوە و کۆڕ و کۆبوونەوە و دەربڕینی ڕای جیاواز گەشەی کردووە، ناوچەکانی کەرکووکیش بێ بەش نەبووە لەو هەڵتۆقینە ڕۆشنبیریە و لە ڕێی ڕۆژنامە و گۆڤار و بڵاوکراوەی ناوچەکە، بیروڕا و پەیامی خۆی ئاڕاستە کردووە.

گۆڤاری زیبان
وەک گۆڤارێکی مانگانە لقی #کەلار#ی بنکەی گەلاوێژ بە زمانی کوردی دەریکردووە، ژمارە یەکی لە ساڵی 2004 گەیشتۆتە چاپ و بڵاوکراوەتەوە.

ڕۆژنامەی (کرکوک تورکمن ایلی)
هەفتانەیەکی ئەدەبی گشتی و ڕووناکبیری بووە. یەکێتی نووسەرانی تورکمان لقی کەرکووک ژمارە یەکی لە حوزەیرانی 2003 دەرکردووە، بە زمانەکانی عەرەبی و تورکی لاتینی، سەرنووسەری ڕۆژنامەکە مەولود تەها قایەچی و بەڕێوەبەری سەرنووسەری (ایدن کرکوکی) بووە.

(الوحدە)
ڕۆژنامەیەکی هەفتانەی سیاسی کۆمەڵایەتی ڕووناکبیری گشتی بووە. پاشماوەی #بەعس#یەکانی کەرکووک دەریان دەکرد، خاوەنی ئیمتیازی (تجمع الوحدة الوطنیة العراقي) و سەرنووسەری ڕەعد مەتشەر و بەڕێوەبەری نووسینی (علی الشمري) بوون، ژمارە یەکی لە حوزەیرانی 2003 دەرچووە.

ڕۆژنامەی ڕووناکی کەرکووک
مەڵبەندی ڕێکخستنی کەرکووک دەری دەکرد، وەک بڵاوکراوەیەکی مانگانەی سیاسی، خاوەنی ئیمتیازی مەڵبەندی کەرکووک #یەکێتیی نیشتمانیی کوردستان# بووە، سەرنووسەری بەهجەت ڕەئوف و جێگری سەرنووسەری عەدنان مەنسوور بوون.

گەڕانەوە
ڕۆژنامەیەکی سەربەخۆ بووە، کۆمەڵێک گەنجی ئازدیخواز لە کەرکووک دوو هەفتە جارێک دەریان دەکرد، خاوەنی ئیمتیازی #عارف قوربانی# و سەرنووسەری حەکیم عوسمان و بەڕێوەبەری نووسینی فاروق جەمیل بوون، ژمارە یەکی لە 2003 دەرچووە دوای بەردەوامیەکی زۆر لە دەرچوون وەستاوە.

کەرکووکی ئەمڕۆ
ڕۆژنامەیەکی ڕووناکبیری کۆمەڵایەتی بووە، دوو هەفتە جارێک کۆمەڵەی ڕووناکبیری کۆمەڵایەتی پارێزگای کەرکووک دەری دەکرد، سەرنووسەری سمکۆ بەهرۆز و بەڕێوەبەری نووسینی هاشم کاکەیی بوون، ژمارە یەکی لە تەمموزی 2003 دەرچووە، ڕۆژنامەکە سەرەتا ڕەنگاوڕەنگ بووە. پاشان دوای چواردە ژمارە لە دەرچوونی بووە بە ڕەش و سپی و وەک ڕۆژنامەیەکی سیاسی گشتی بە دوانزە لاپەڕە، درێژەی بە تەمەنی خۆی داوە.

ڕۆژنامەی (الفیصل)
تۆڕی ڕاگەیاندنی ئێراق وەک ڕۆژنامەیەکی هەفتانەی سیاسی بەهەشت لاپەڕە دەریان دەکرد، خاوەنی ئیمتیاز و سەرنووسەری محەمەد شاهین و جێگری سەرنووسەری ئامینە مەحمود بوون.

بانەڕۆژ
گۆڤارێکی ڕۆشنبیری گشتی کۆمەڵەی ڕووناکبیری و کۆمەڵایەتی پارێزگای کەرکووک بوو، سەرنووسەری لەتیف فاتیح فەرەج و جێگری سەرنووسەری عەدالەت عەبدوڵڵا بوون، ژمارە یەکی لە کانونی یەکەمی 2003 بەشێوەی ڕەنگاوڕەنگ دەرچووە.

گۆڤاری (المستقبل) بانەڕۆژ
وەک گۆڤارێکی ڕۆشنبیری گشتی کۆمەڵەی ڕووناکبیری و کۆمەڵایەتی پارێزگای کەرکووک، بە عەرەبی دەریان دەکرد، سەرنووسەری لەتیف فاتیح فەرەج و جێگری سەرنووسەری عەدالەت عەبدوڵڵا بووە. ژمارە یەکی لە 01-03-2004 دەرچووە.

ڕۆژنامەی خۆرنەوازان
ڕۆژنامەیەکی گشتی ئازاد بوو مانگی جارێک دەردەچوو، خاوەنی ئیمتیازی سەڵاحەدین عەبدولحەمید سەرنووسەری سەڵاح #گەرمیان#ی بووە.

ڕۆژنامەی بەرەو شار
ڕۆژنامەیەکی مانگانەی سەربەخۆ و ئازاد بووە، لەلایەن کۆمەڵێک گەنج، ژمارە یەکیان لەپپ 20-02-2004 دەرکرد، هەریەک لە عەدنان سەید حسێن وەک سەرنووسەر و سامان عەزیز بەڕێوەبەری نووسین و ئەحمەد کاکە سەرپەرشتیاری هونەری کاری ڕۆژنامەکەیان تێ دەپەڕاند.

ڕۆژنامەی ئاوەسپی
کۆمەڵێک لە ڕۆشنبیران و ڕۆژنامەنووسانی دوز#خورماتوو#، دوو هەفتە جارێک چاپ و بڵاویان دەکردەوە، وەک ڕۆژنامەیەکی ڕۆشنبیری گشتی ئازاد.

گۆڤاری زانست
نەخۆشخانەی ئازادی لە شاری کەرکووک وەک گۆڤارێکی زانستی بە زمانی ئینگلیزی دەریان دەکرد، ژمارە یەکی لە ئۆکتۆبەری 2003 بڵاوکرایەوە، خاوەنی ئیمتیازی دکتۆر سەباح زەنگەنە و سەرنووسەری دکتۆر هیوا محەمەد شوانی بوون.

(التمریض)
بڵاوکراوەیەکی ناوبەناوی پەرستاری بووە، سەرپەرشتیاری گشتی بڵاوکراوەکە دکتۆر حەمید محەمەد ئەلسەبعاوی و سەرنووسەری ئەیاد گورگیس داود بوون.

گۆڤاری (الاصلاح)
گۆڤارێکی سیاسی ڕووناکبیری بوو حیزبی ئیسلامی ئێراقی لە کەرکووک دەریان دەکرد، سەرنووسەری عەبدولکەریم عەلی بووە.

گۆڤاری زەوی
گۆڤارێکی سیاسی ڕووناکبیری مانگانە بووە، حیزبی سەلامی کوردستان لە کەرکووک دەری دەکرد، خاوەنی ئیمتیازی سوار ڕەشید باجەلان و سەرنووسەرەکەی بێستون جەلال بوون.

بڵاوکراوەی (الشفاء)
بەڕێوەبەرایەتی تەندرووستی کەرکووک دەری دەکرد، ژمارە یەکی لە 2002 بڵاوکرایەوە.

(الذهب الاسود)
بڵاوکراوەیەکی بزیشکی زانستی بووە، بەڕێوەبەرایەتی تەندرووستی کەرکووک دەریدەکرد.

گۆڤاری (التاجر)
ژووری بازرگانی کەرکووک دەریدەکرد، گۆڤارێکی مانگانە بووە تایبەت بە کاروباری بازرگانی و ئابووری و ڕۆشنبیری، ژمارە سفری لە ئەیلولی 2003 بڵاوکراوەتەوە، سەرنووسەری سەباح ساڵەیی و سکرتێری نووسینی محەمەد تۆفیق بوون.

کەرکووکی ئازاد
بڵاوکراوەیەک بووە تایبەت بە ئازادکردنی شاری کەرکووک، ڕاگەیاندنی کۆمەڵەی خۆێندکارانی کوردستان دەریان دەکرد، خاوەنی ئیمتیازی کۆمەڵەی خوێندکاران و سەرنووسەری سامان جەلال بوون.

بابەگوڕگوڕ
بڵاوکراوەیەکی ڕۆشنبیری گشتی وەرزی بووە، کۆمەڵەی ڕۆشنبیری و کۆمەڵایەتی بابەگوڕگوڕ دەری دەکرد.

گۆڤاری ڕابوون (الصحوة)
مەڵبەندی کەرکووکی حیزبی ئیسلامی ئێراقی دەریدەکرد، وەک گۆڤارێکی ڕۆشنبیری گشتی، سەرنووسەری گۆڤارەکە خالید جاف و دەستەی نووسەران یوسف عوسمان و محەمەد حەمید و ئەحمەد پاڵەوان بوون.

(صوت کرکوک)
بڵاوکراوەیەکی هەفتانەی گشتی سەربەخۆ بووە بە زمانی عەرەبی، ژمارە یەکی لە حوزەیرانی 2003 چاپ و بڵاوکراوەتەوە، لەسەر بڵاوکراوەکە نووسراوە (تصدر عن ڕابطة کرکوک للثقافة والفنون) .

پنار
گۆڤارێکی هونەری ڕۆشنبیری بووە لە قەبارەی پەرتووک، ژمارە یەکی لە تەمموزی 2003 بڵاو کرایەوە، بە زمانی عەرەبی و تورکمانی.

شەم
گۆڤارێکی ڕۆشنبیری گشتی بووە، بەشی ڕاگەیاندن و ڕووناکبیری ڕێکخراوی ئازادی لاوانی کوردستان، سەنتەری #کفری# دەریدەکرد، سەرنووسەری شەم ئاری عوسمان خەیات بووە.

گۆڤاری باوە شاسوار
گۆڤارێکی ڕۆشنبیری گشتی بووە، لە کفری جار نا جار دەردەچوو، سەرنووسەری سامان کەریم و بەڕێوەبەری نووسینی هیوا عەلی بوون.

گۆڤاری ڕازی
گۆڤارێکی پزیشکی بووە، ژمارە یەکی لە 2003 دەرچووە، سەرنووسەری گۆڤارەکە جاسم محەمەد شندی بووە.

گۆڤاری (الرحیق)
گۆڤارێکی ئیسلامی ڕۆشنبیری مانگانە بووە، ژمارە یەکی لە تەمموزی 2003 بڵاوکراوەتەوە، سەرنووسەرەکەی حازم نازم فازل و بەڕێوەبەری نووسینی سامی سلێمان عارف بوون.[1]