قەڵاڕۊچن
بەشۍ دوەمە
بەڵؽ هەرو هەسەرەما حازرو ئاماﮆە کەردؽ، چەنی گونیاو شلیفاو خەراراو ڕەشکا پەی ئاردەیۋ سمەرو گزرەکەی.
بەڵؽ چەنی لالوەکام لوایمؽ سەرو خەرمانی، حەر سەر سەعب دماو نانوچایی ناستما وەر بزیۋ، تەپما کوا سەرو خەرمانەکا (هەم سمەرەکا هەم گزرەکەی)، ئیتر لالوەکؽم سەروملشا پۋژنارەو دەماخشا کەرد (دەماخشا بەست)، بە وؽشاو سؽلکەکؽشاوە خەریکؽ بؽنؽ سمەرو گزرەکەی کۋکەرؽنؽوە، چوون وەڵتەر دلؽ خەرمانەکەیرە پژگېیان کاتو کوایشەنە بە گاو هەرو هەسەرەکەی، ئەر ئیسە کۋ کریۋوە خاستەر هەرمانەش چەنە کریۋ، خەرمانەکە پاک بۋوەو حەر وەرەنە کریۋ دلؽ خەرارو ڕەشکەکا.
پؽسە واتما بە سؽلکەکاشا خەریکؽنؽ خەرارو ڕەشکەکا پەڕکەرا سمەریو گزرە.
منیچ هەرو هەسەرەکەم بەستەنۆ، کوچؽ ئۆ لاشاوە بە مؽخ زەنجیرەکاشا کوؽنؽمەرە، بە تەوەنی گەورؽ چەقنؽنؽم زەمینەرە، کونەکەیچم پەڕ کەرڎەن ئاوەو چنارەکؽ، جا چ ئاوؽ ( فؽنکە، سوکە، پاکە) حەر حەزکەری سەرو خەرمانیۋ وەریشۋ، کونەکەم پاڵو گرۋرؽنە نېیانەرەو بازؽ پووش ( قاشاخو گەنمام) وستەن سەر و جوان پۋژنانمەرە، تا ئاوەکؽ گەرمە نەبۋ، ئیتر پاوەرو وەرە قاقەیۋ تەماشەشا کەرؽنؽ، کەی واچا ئادەی کوڕو لالوش، کوچؽ ئاویما پەی بارە، منیچ بە وؽمو جامڵکەکەیمۋ (جامڵە فافۋنەکەیمۆ)، بە سەرو وؽ بەرەو کونەکەی کەروە تا ئاوەکؽ نەمجیۋ، ڕەنجما بۋبە ڕەنجو قۊلانچؽ، چوون حەر مشۋم من دوەبارە بلو ئاوی باروە، ۋەرو ئانەیە فرە بە هاگاﮆاریۋ، پوشەکەی سەرو کونەکەیۋ لابەرؽنؽ و بەرەو کونەکەی کەرؽنؽوە، سوک ئاوی کەرؽنؽرەو کەرؽنؽش دلؽ جامڵکەکەی و پەیشا بەرؽنؽ، ئانەبؽ گرڎو خەرارو ڕەشکەکاشا پەڕ کەرڎؽ سمەری و گزرە.
دکتور هیدایەت گوڵپی.[1]