بەرێزان:
سەرۆکی پەرلەمانی ئەوروپا – ئەنتۆنیۆ تاجانی
سەرۆکی کونسوڵیەتی ئەوروپا – دۆناڵد توسک
سەرۆکی کۆمسیۆنی ئەوروپا – جان کلوود
بەرپرسی سیاسەتەکانی دەرەوەی یەکێتی ئەوروپا – فێدریکا مۆگرینی
پەرلەمانی ئەوروپا – دیسکی عێراق
پەرلەمانی ئەوروپا – کۆمیتەی مافەکانی مرۆڤ
کۆمیتەی کاروباری دەرەوەی پەرلەمانی ئەوروپا
ساڵی 1991 لە میانەی جەنگی نێوان عێراق و هاوپەیمانان، کۆمەڵانی خەڵکی هەرێمی کوردستان ڕاپەرین دژ بە دەسەڵاتی ستەمکار و دیکتاتۆری سەدام حسێندا بۆئەوەی لە ستەمکاریی ڕزگاریان بێت و ژیانێکی شایستە و دیموکراسیانەیان هەبێت. بەڵام دوو پارتی سیاسیی کوردیی (یەکێتی نیشتیمانیی کوردستان و پارتی دیموکراتی کوردستان) نەیانتوانی ئامانجەکانی خەڵکی کوردستان بهێننە دی، لەبەرامبەردا بە هەڵگیرساندنی شەری ناوخۆ و کوشتنی هەزاران کەس لە یەکتر، کوردستانیان کردە پرسەخانەیەکی گەورە.
پاش شەری ناوخۆ و لەناوچوونی ڕژێمی بەعس، ئەو دوو پارتی سیاسیی، لەرێگەی بەرپرسانیانەوە دەسەڵاتیان بەکارهێنا بۆ بازرگانیی و بەرژەوەندیی تاکەکەسیی و حزبی. بەوەش گەندەڵی دارایی و ئیدارییان گەشتە لوتکە و ئابووری هەرێمی کوردستانی پوکایەوە. هەروەها بە هۆی کێشەیان لەگەڵ حکومەتی ناوەندیی و ئەو گەندەڵیە زۆرە داراییەوە تەنانەت توانای پێدانی مووچەی مانگانەی فەرمانبەران و هێزەکانی پێشمەرگەشیان نیە. هەر سێ مانگ جارێک مووچەی یەک مانگیان بە نیوەیی پێ دەدەن. ئەوە لەکاتێکدایە کە شەڕی دژە تیرۆر هێشتا کۆتایی نەهاتووە.
خەڵکی هەرێمی کوردستان بۆئەوەی داواکاریەکانیان بە دەسەلاتدارانی هەرێم بگەیەنن، چەندین ڕێگەی مەدەنیانەیان بەکارهێناوە و بە شێوەی ئاشتیانە ویستوویانە بە چارەسەرێک بگەن لەگەڵ دەسەڵاتداراندا، دیارترینیان خۆپیشاندانەکانی 17 ی شوباتی ساڵی 2011یە کە دەسەلاتداران دیسانەوە پەنایان بۆ چەک و توندوتیژیی بردەوە و لەئاکامدا سەدان خۆپیشاندەریان شەهید و بریندار کرد. داواکاریەکانی خەڵکیش چارەسەر نەکران. پاشان خەڵکی هەرێمی کوردستان لە ڕێگەی ناوەندەکانی ڕاگەیاندن و میدیای کۆمەڵایەتیەوە درێژەیان بە نارەزایەتیەکانیان دا. بەڵام دەسەلاتی هەرێمی کوردستان گوێی بۆ ئەو داواکاریانە نەگرتووە.
لە سێ ڕۆژی ڕابردوودا 18 و 19 ی 12 ی 2017 لە شارەکانی سلێمانی، ڕانیە، کۆیە، تەقتەق، کفری، تەکیە، چەمچەمال و چەند شوێنێکی تر، فەرمانبەران، مامۆستایان و تەواوی چین و توێژەکانی خەڵکی کوردستان ڕژانە سەر شەقامەکان و نارەزاییان دەربڕی دژ بەو بارە ناهەموارەی کە دەسەڵاتدارانی هەرێمی کوردستان خوڵقاندوویانە. لە بری ئەوەی لەگەڵ خۆپیشاندەراندا گفتوگۆ بکەن و هەوڵی چارەسەرکردنی کێشەکانیان بۆ بدەن، هاوڵاتیانیان بەر گولەی تفەنگەکانیان داوە و لەئاکامدا 5 خۆپیشاندەر لە ڕانیە شەهید بوون و 80ی تریش برینداربوون. لە شارەکانی تریش تا ئێستا سەدان خۆپیشاندەری تر بریندار بوون. پاشان هێزە ئەمنیەکان لە ڕەشبگیریەکدا بە لێشاو خۆپیشاندەرانیان لە کونجی زیندانەکان توند کردووە. هەروەها باری سەربازییان سەپاندووە بەسەر تەواوی شارەکانی کوردستاندا. بۆئەوەی کە دەنگی نارەزایی خەڵکی کوردستانیش نەبیسترێت، دەسەڵاتدارانی هەرێم دەزگای ڕاگەیاندنی ئێن ئار تی)یان داخستووە.
لیژنەی مافەکانی مرۆڤ لە پەرلەمانی کوردستان لە ڕاگەیاندراوێکیدا ئەوەی ئاشکراکردووە کە دەسەڵاتدارانی هەرێم بەو چەکانەی کە هێزەکانی هاوپەیمانان پێیان داون بۆ شەری دژە تیرۆر، تەقەیان لە هاوڵاتیان کردووە و هاوڵاتیانان پێ شەهید کردووە.
ئێمە داواکارین لە کۆمەڵگەی نێودەوڵەتیی و هاوپەیمانان و ڕێکخراوەکانی مافی مرۆڤ کە هەرچی زووە فشار بخەنە سەر دەسەڵاتدارانی هەرێم بۆئەوەی دەستگیرکراوان ئازاد بکات، تاوانباران و بکوژان دادگایی بکات و سزابدات، هاوکات داواکاریەکانی خەڵکی کوردستان جێ بە جێ بکەن.
رێکخراوی کوردستان فۆروم- بەلجیکا
ناوەندی بەدواداچوون بۆ گەشەپێدانی دیموکراسی- بەلجیکا
#24-12-2017#