واران نم نم واریا...
هناێگ پیا کەفتە ڕێ، ژن چیە ناو تەم و مژ...
شەوق* چراخ فانووسەگە بی وە چه و گورگێگ و ئیکەش لە پشت چریکەێ بەرزێگ کوشریاوه...
شه و وە مکوڵ* نیشتۊد...
گیس خیس ئه و ژنە و پرشنگەگان واران بوو خۊن وە خوەێان گرتۊن.
کۊوەێگ لە سێفەیل گەنیاێ ڕێ پیاگە بەساۊدن.
پیا و ژنێگ بوو سێف گەنیاێ وە خوەێان گرتۊن، لە ناو گڵا و چیلیەگان و گژ و گیا ڕەد بین.
لە ناو دەر ماڵە بۊچکڵانەێ باخەگە، ژنێگ وە گیسەیل خیس وە شان و کووڵ ڕشیا و شەۊ دڕیا، سەر و مل و مەمگەیل وە دەر‌ه و کەفتێیه و ڕکیاد و لەرزیاد.
«پیا-ژن» وە دەمە چەقوو تێژێگ مل «ژن-پیا» گرتۊدە نیشانە...
سێ مناڵ هەر وە شێوەێ خووشەیل ڕەنگ پەڕیاێ هەنگۊر دیار دیان و ژنێ ترەک دەس وە کەمەر و داس وە دەس وساۊد و وە چه و زاق و دڕیاگه و نووڕستیاد...
دەنگ پاێگ لە ناو تەم و مژ هاتیاد...
دەنگ پاێ «ژن-پیا»، «پیا-ژن»، ئه و ژنە؟!
ژنێ ک هاتۊد ئەڕاێ ها‌وچەوی* وە گەرد ئەوانه.
پیا، ژنەگە ناسی؛ چۊ خەزاڵێگ ڕەم کردێ، زڵفەیل هۊل، چۊ کەڵ مەسێگ، خرامان، خرامان ژنێگ، ژنێ ک پیا هاوردۊد ئەڕاێ ها‌وچەوی وە گەرد ئه و ژنەیله.
دێو ژنێگ وە دەسێگێ خەنجەر و وە دەسێگێ داسێگ تێژ.
چریکەێ بەرزێگ، پرشنگەێ خۊن، واران، دەم ئێوارە، ڕۊ وە سەرشەو، تەم و مژ نەمەن، هسارە هەڵات
لە ژێر پووس سەرد و سیەێ شەو، پیا و ژن چین وەره و ئاوای
هسارەێ دۊدارێگ دۊر و دۊرترەکه و بیادن...
رێیەگە تەمام بی، لە ئاوای دەنگ ساز و دێوڵ هاتیاد
وە گەرد هەر زرمەێگ ک وە دێوڵ کوتیان ژن و پیا چیانە نووا.
وە بان زین ئەسب کەوێگ دۊوەتێگ وە شەۊ دۊوتانەێ خوەێیه و نیشتۊد و پیا هەوسار لە مل و کووڵ ئارام ئارام گام هێز دیاد و جامەک و ئاینەگەردنێگ لە وەراێوەرێانا.
دۊکە‌ڵ ئەسپەن و گژ و گیا بۊدە هەورێگ لە بان سەرێان، هەر جوور کەشکەشان*، جوور تەم و مژ
پیا دەنگ بەرزه و کرد، نه! کەسێگ دەنگێ نەشنەفت...
چمان دەنگێ لە دۊره و هاتیاد
جوور ڕمەێ دێوڵێگ بی ک لە ئاسووەیل دۊر و کەوکەوی ئاسمان هاتیادە گووش
وەتی هوورە چڕێگ بی لە خێڵ هوورەچڕەگان باوانم
واران وارانه! نه! ئاگروارانە
نه! کەسێگ دەنگێیان نەشنەفت
ئاسمان سا کردۊد.[1]
مکوڵ: کمین
شەوق: نور، ڕوشنایی
ها‌وچەوی: ڕقابت