Dewleta Tirk a dagirker ji şeva 19'ê Mijdarê de êrişên xwe yên li ser Bakur û Rojhilatê Sûriyê zêde kirine. Navendên jiyanî yên wekî nexweşxane, navendên tenduristiyê, dibistan, embarên genim, cihên petrol û gazê û herêmên din ên şêniyan dike hedef.
Têkildarî van êrişan, muxalîfê sûriyeyî û koordînatorê giştî yê #Tevgera Çep# a Şoreşger a Sûriyê Dr. Xeyas Neîse ji ajansa me re axivî. Neîse got: Rejîma Erdogan li welatê me, li dijî ax û gelê me şerekî dîn û har dîsa da destpêkirin. Şerekî ku pê binesaziyê wêran dike, ne tenê şervanên qehreman ên Hêzên Sûriya Demokratîk dike hedef, lê belê sivîlên Sûriyê jî dike hedef. Bi bombebarana berfireh û hilweşandina jêderên jiyanê, hewl dide welatiyan bitirsîne û bihêle ku malên xwe biterikînin.
Neîse diyar kir ku rejîma Erdogan di vî şerê hovane de ji bo têkbirina îmkanên #Rêveberiya Xweser# dixebite û wiha dewam kir: Ew wisa difikire ku ew ê bi vî rengî rêveberiyê hilweşîne, bêyî ku neçar bibe operasyoneke bejahî ya dagirkeriyê pêk bîne. Her wiha eger her du dewletên mezin Amerîka û Rûsya çiraya kesk bidinê, amadekariya operasyoneke bejahî dike. Heta niha destûr negirtiye, ji ber gelek sedeman bawer nakim ku bigire.”

ÊRIŞ XIZMETA BERJEWENDIYÊN HÊZÊN DESTWERDANA SÛRİYÊ KİRİNE, DİKİN
Çavdêr dibêjin ku dewleta Tirk a dagirker bi koordîneya Dewletên Yekbûyî yên Amerîkayê (DYA) û Rûsyayê re ku hêz û baregehên wan li herêmê hene, dest bi êrişên xwe yên vê dawiyê kiriye.
Der barê vê yekê de Neîse got: Bê guman Amerîka û Rûsyayê bi awayekî çavê xwe ji êrişên dewleta Tirk re girt, lê bi rengekî sînordarkirî. Bi vî awayî rejîma Erdogan cihên xwe yên siyasî yên di hundir de lawaz, xurt dike û krîzên xwe yên aborî, civakî, siyasî û hilbijartinan derdixe derve. Ew wisa bawer dike ku ev yek îmkanên leşkerî yên Hêzên Sûriya Demokratîk jî lawaz dike.
Neîse got ev armanca dawî li gorî polîtîkayên rejîmê ye û wiha pê de çû: Bi vê êrişa dewleta Tirk a hovane re, rejîma qirêjî bawer dike ku ew ê Rêveberiya Xweser dehf bide da ku şert û mercên wê qebûl bike. Bi dîtina min ev destdirêjiya dewleta Tirk, eger di sînorên bombebarana hewayî de bimîne, dê bikeve xizmeta berjewendiyên hêzên mezin ên destwerdana Sûriyê û pê re jî xizmeta rejîma Sûriyê. Ji ber ku hemû jî ji mayîndebûna projeya Rêveberiya Xweser bi xwezaya wê ya siyasî ya demokratîk, şoreşgerî û civakî ditirsin. Ji ber vê yekê, ev dewletên mezin derewan dikin.
Neîse diyar kir ku li hemberî vê hovîtiya #artêşa Tirk# a dagirker û sûcên wê yên ku dighêjin asta sûcên şer û dermirovî, em dibin şahidê berxwedaneke lehengane û qehreman a şervanên Hêzên Sûriya Demokratîk û îradeyeke polayîn a ji bo têkbirina dijmin û wiha domand: Çavkaniya îradeya bi hêz; ji ber wê yekê ye ku Hêzên Sûriya Demokratîk xwe dispêre girseyên gel ên rêxistinbûyî û li ser îradeyeke siyasî ya hişmend e. Ev berxwedana qehremanî ya gelê me di cîhanê de deng veda, hêzên çepgir û demokrat bertekên xwe nîşan dan, êrişên dewleta Tirk şermezar kirin û piştgiriya xwe ya ji bo Rêveberiya Xweser û Hêzên Sûriya Demokratîk nîşan dan. Ev hevgirtina cîhanî di destpêka xwe de ye, heta ku êrişên hovane yên dewleta Tirk bidomin, ew dê mezin û xurt bibe.

‘GERA CIVÎNÊN ASTANAYÊ ÊRIŞÊN ERDOGAN NIXUMAND’
Ev êriş hemwextî lidarxistina gera Astanayê bûn. Ev gera ku bi daxuyaniyekê ya ku êrişî Rêveberiya Xweser û gelê Bakur û Rojhilatê Sûriyê dike, bi dawî bû.
Encamnameya her sê welatên lihevkirinan (Rûsya-Îran-Dagirkeriya Tirk) ji ya beriya wê ne cudatir bû. Wekî her carê her sê aliyan li hev kirin ku dijberiya Rêveberiya Xweser a Bakur û Rojhilatê Sûriyê bikin û çavên xwe ji hovîtiya artêşa Tirk a dagirker û çeteyên wê li Bakurê Sûriyê bigirin.
Di daxuyaniyê de axaftinên dijberî Rêveberiya Xweser nû kirin û wekî projeyek cudaxwaz hat binavkirin.
Neîse têkildarî vê yekê jî wiha axivî: Bê guman civîna Astana ya dawî derfet da rejîma Erdogan da ku dest bi dagirkeriya xwe ya hewayî bike, Amerîkayê jî heman tişt kir. Her du hêzên mezin ên ku li Ukraynayê şer dikin, her yek ji wan hewl dide ku Tirkiye di vî şerê cîhanî de bikişîne aliyê xwe, lê li ser hesabê axa me û xwîna gelê me.
Di êrişên dawî yên dewleta Tirk a dagirker de, nuqteyên hikumeta Şamê bûn hedef û di encamê de hejmarek ji endamên wê jiyana xwe ji dest dan.
Tevî vê yekê jî hikumeta Şamê li ser van êrişan û jidestdana hejmarek ji endamên xwe neaxivî û bi awayekî fermî û rasterast jî ranegihandiye.
Neîse li ser vê mijarê wiha got: Rejîma Sûriyê li gorî yekê fikreyê dimeşe, ew e ku bê guhertin û bê şirîk bimîne. Ji ber vê yekê ew berpirsê sereke ye yê karesata ku welatê me tê de ye. Tevî vê yekê û ji ber ku ew girtiyê hizra teng e ku taybetmendiya hemû rejîmên desthilatdar e, ew dan û standina bi dewletên dagirker ên welatê me re, ji dan û standina bi gel û hêzên wan ên zindî re, bêhtir tercîh dike. Lê eger rewş wiha bimîne, ev siyaseta wêrankera welatê me, dê wî ber bi dawiyeke xirab ve bibe, rejîmek pûç û tu serdestiya wê tune ye û girêdayî hin aliyan e. Gelek nîşaneyên çûna wê ya ber bi vê çarenûsê ve hene.
Neîse her wiha diyar kir ku bêhelwestiya wê ya li hember êrişên niha yên dewleta Tirk a dagirker ji vê yekê tê û wiha lê zêde kir: Ev tevî wê yekê ye ku endamên artêşa wê di bombebarana dewleta Tirk de hatine qetilkirin jî. Rejîmeke ku bi rastî jî jiyana leşkerên wê ne xema wê ye. Ji bo wê goştê topan e da ku parastina mayîna wê û berjewendiyên wê yên teng bike.

‘ŞERÊ ÇARENÛSÎ’
Ev êriş her wiha hemwextî zêdebûna axaftinên li ser lihevkirina di navbera dewleta Tirk a dagirker û hikumeta Şamê de ne. Bi taybet piştî gera dawî ya Astanayê ku tê de îhtimala hevdîtina Erdogan û Esed dihat gotûbêjkirin.
Neîse got hikumeta Şamê li şûna Rêveberiya Xweser girîngiyê dide başkirina têkiliyên bi rejîma Tirk a dagirker re û wiha lê zêde kir: Bêyî ku dengê xwe bike, dihêle ku artêşa dagirker gelê me bikuje. Di vê rewşê de eger em gotinên rejîmê yên derew bi kar bînin, wê demê welatparêzên ku yekbûna xaka Sûriyê û serweriya gelê Sûriyê diparêzin kî ne? Bê guman ne rejîma Şamê ye, lê belê ew Hêzên Sûriya Demokratîk û Rêveberiya Xweser in.
Neîse wiha dirêjî da axaftina xwe: Têgihîştina di navbera rejîma Tirk û Sûriyê de tê wê wateyê ku welatê me dê demeke dirêj di bin dagirkeriyê de bimîne û di bin çavdêriyê de be. Gelê Sûriyê dê bibe kole û talankirî ji aliyê rejîmeke zalim û girêdayî û ji dagirkeran ve.
Muxalîfê sûrî û koordînatorê giştî yê Tevgera Çep a Şoreşger a Sûriyê Dr. Xeyas Neîse got tişta ku îro pêk tê, di navbera hêzên paşverû, mêtinger û zordest û hêzên azadî, wekhevî, serxwebûn û edaletê de şerekî çarenûsî ye û wiha lê zêde kir: Her sûriyek dilsozê gel û welatê xwe, divê aliyê xwe bi zelalî hilbijêre. Em di kêliya diyarker de bi hêviyên gelê xwe yê azadiyê re disekinin û piştgirên me îro gelê me û hêzên rizgariyê yên Rêveberiya Xweser in.[1]