سەرچەمەو واچۍ هۆرامانی؟
ئەوەنویستەی و دەسکاریکەرڎەی: ئەسعەد ڕەشید
بەشۍ دوەمە
یەکەم تەگبیرێ پەی ئەسکەڼەری کریابۊ، ناستەی یەکیەتی گەلانو ئێرانی، ئاڎییچ بە زیڼەکەردەیۆ گېیانو ناوچەگەری و هۊزگەری و زیڼەکەردەیۆ (خواڵە) گولانا دلېشانە. یەکەم هەنگامەش وڕنای بنەماو ئایینی هامبەشو مېیانو گەلو ئێرانینە، سانسوورو ئایینو زەردەشتی و گېرتەی و ڕاوەنېیای مەڵڵا زەردەشتییەکاو سۊچنای کتېبەکاشا (ئاڤێستا) بېیەن.
هەرپاسەشە کەرد، کتېبە زەردەشتیەکۍ کە سەرو هەزارەها پۊساوە نویسیێبېنۍ، سۊچنێ و مەڵڵای زەردەشتیشان پەی دەرمانی ناست. دمای کارەساتو سەرو زەردەشتیەکا، مەڵڵێ و پیرۍ زەردەشتییۍ، پەی بەرکەردەی گېیانو وېشان، وېشان یاونان مەڕ و قوژبنەکاو هۆرامانی، ئاگە بی بە ناوچێ ئەمین پەیشان، یانی هۆرامان بی بە حەشارگە پەی (ماگایان)و زەردەشتی، یان پیرۍ (ئاهورامەزدا)ی. ئامای زەردەشتییە هیندییەکا پەی حەج و زیارەتو (پیرشالیاری زەردەشتی)، جە هیندستانۆ پەی هۆرامانی و مەنەیۆ چن حەکیمێ هیندی زەرەدەشتی جە هۆرامانی تەختەنە، ئانەیە سەلەمنۊ.[1]