سایتی شەفافیەت کە نووسینگەی #قوباد تاڵەبانی# سەرپەرشتی دەکات و داهاتی ڕۆژانەی #سلێمانی# لە ڕێگای شەش گەنجینەوە دەخاتەڕوو. داهاتی یەکشەممە 18ی کانونی یەکەم، بریتی بووە لە 8 ملیار و 750 ملیۆن دینار. داهاتی ڕۆژی دواتر بریتییە بووە لە 2 ملیار و 143 ملیۆن دینار، جیاوازی داهاتی ئەو دوو ڕۆژە 6 ملیار و 607 ملیۆن دینار بووە.
ئەو داهاتەی ڕۆژانە دەگەڕێتەوە بانکەکان لەنێوان 2 ملیار بۆ 2 ملیار و 750 ملیۆن دینار دایە و هۆکاری ئەوەی داهاتی 18ی مانگ زیاتر بووە لە 8 ملیار دینار دەگەڕێتەوە بۆ ئەوەی ئەو ڕۆژە، ڕۆژی یەکشەمە بووە و داهاتی گومرگ و هاتوچۆ و چەند داهاتێکی تر لە دوا نیوەڕۆی پێنج شەمە و ڕۆژانی هەینی و شەممە بەهۆی ئەوەی دەوامی گەنجینە و بانک و فەرمانگەکان نییە وەکو ژمارە لەسەر داهاتی ڕۆژی یەکشەممە کەڵەکە دەبێت و زۆربەی کات داهاتی ڕۆژانی یەکشەممە بریتییە لەداهاتی زیاتر لە سێ ڕۆژ.
گەنجینەکانی سنووری سلێمانی تەنیا داهاتیان وەکو ژمارە بۆ دەگەڕێتەوە، بەشێوەی ژمارە لەگەڵ فەرمانگە و بانکەکان پاکتاوی دەکەن و هیچ زانیاریەکیان لەسەر شێوازی کۆکردنەوەی داهاتەکە پێ ناگات.
بەپێی زانیاریەکانی سایتی شەفافیەت بێت لە هەندێ ڕۆژدا داهاتی کارەبا زیاترە لە داهاتی هەردوو مەرزی #پەروێزخان# و #باشماخ# و مەرزەکانی تری سلێمانی، تەنیا لە ڕۆژی 19ی 12 پتر لە 50٪ی داهاتی سێمانی پارەی کارەبا بووە کە بریتی بووە لە یەک ملیار و 81 ملیۆن دینار لەکۆی 2 ملیار 143 ملیۆن دینار. [1]