فەتح تەنیای تاک...
نامێوە میرزا ئۆلقاڎری پەی دوسێش، بەڵام دیار نېیەن کېن، سەرەتا بە مەدح و سەناو خالقی دەسپەنەکەرۊن، ئانەی کەمێ نامەکۍ ڕۊشەن کەرۊوە، جە کۊتاو شېعرەکېنە زوانی شېعریش فاڕۊن پەی جافی، دەسەواچەو (خاڵۆی کاشتەری ماوا) بەکارمارۊن، کە دیارەن خەڵکو کاشتەریەن، دماتەریچ ماچۊ: شاگردی شاکرد شوعرای کڵاشیم، ڕەنگە (کڵاشی) عەشرەتێ بان.
فەتح تەنیای تاک، فەتح تەنیای تاک
فەتح بېقوشەن، فەرد تەنیای تاک
ئافەریدەی خەلق جە خاشاک خاک
شارەزای گونبەد، نۊتاق ئەفلاک
سەفابەخش سەف، ساقی و بادە و جام
باش غەواس گەنج، دانەی دەریای فام
نەوای قەتارەی دەروون مەلاڵان
سەر ئېڵ سوپای نازک خەیاڵان
ڕەونەق نمای جەم جەرگەی عاشقان
سەیاد جاسووس سەیر سەرتاقان
ئاهەنگ مەجلیس دەروون پڕ خاران
زامڎار پەیکان، نیگای نیگاران
فەرهاد کۊکەن، قەیس مەجنوون مەشق
زوان یاتاخ، خەڵوەت‌ خانەی عەشق
مەعلوم بۊ جە لای شای دەردەداران
زندەگیم یەکسان وە تاڵ ۋیاران
ویرم وڕاوەم جە شیرین خاران
هەر فەرد خاڵۆی کاشتەری ماوان
جە بەڎبەختی وېم هەرکەس وانام لەیل
دېر سوڵح و زوو جەنگ، کەم‌ وەفا و کەم‌ مەیل
نەوینی جۊی زام، تافی ڕەوانم
نەژنەوی ناڵەی نیوەشەوانم
ئەعزام یەند گېڵان بە دەریای خەم‌دا
چوون سیواک ساف کۊیان وە هەم‌دا
................................................................
فوارەی فرمیسک هووناو مەشانۊ
گرپەی گڕەی نار دەروون ڕوو کەردەم
جۊش سۊتەی جەرگ، کڵ و کۊ مەردەم
هاڕەی بای شەماڵ گەردەلوول تەم
کزەی چزەی دڵ تەکیەزەدەی خەم
ئەر بەیۊت نە گۊش هام‌فەرد گیانی
تۊیچ بېزار مەبی جە زیندەگانی
پەی ئەو خاڵە بی، قەیس بی ئەراگېڵ
نە سارای دووجەیل مەگېڵا وېڵ‌ وېڵ
منیچ هەر ئه و خاڵ ئەو نیگا و نازەن
هەر ئه و تەل و سیم ئه و گیر و گازەن
تا واچی یانەی دڵ جە غەم کەیلەن
لەیل و نەهارم دایم هەر لەیلەن
دەخیل بڕیان پای، تاو و تەوانا
ئیسە هەر وە تۊن جای هانا هانا
یە هوون زامان یە دووی دڵەی ڕېش
یە هیجران دەرد، جەرگ جەفاکېش
یە لافاو هوون یە ئەسرین چەم
یە باغات عەیش هەرەس ماڵای خەم
تەگویری ئامان پەی دەوای دەردم
یا سوورەی یاسین ها گیان سپەردم
بەرامبەر وە لەفز ئیسلاحی جافی
ئەر تۊ لە گەڵ من دیدە و دڵ سافی
لەشکری دەردم لەم دوو ساخە کەوت
(فتح‌الله) ئەم جار بۆ کەی فەتح نووت
منیچ تا ئه و ڕۊ عومرم بوی کەم
هەر سەنای باڵای ئاڵای تۆ ئەکەم
ئەر سەد کە تەمیز هەرزەگۆ باشیم
شاگرد شاگرد شوعرای کڵاشیم.[1]