شین پەی موحەمەد بەگو وەکېڵی جوانڕۊی
بەشۍ یەکەمە
میرزا ئۆلقاڎر، ئی جارە گلەیېش جە دەسو گەردوونی، پەی کۊچی ناواڎەی دۊسێ عەزیزیشەن، موحەمەد بەگو وەکېڵی، میرزا فەلەکی تاوانبار کەرۊن پانەیە کە بېڕەحمەن، وەفاش تا سەر پەی کەسی نېیەن،
فەلەک وە بەختم...
فەڵەک وە بەختم فەڵەک وە بەختم
فەڵەک نەردی بەڎ شانای وە بەختم
سیاپۊش کەردی سەرتا پای ڕەختم
ها کولناتەوە زامی چن وەختم
بېواڎە تیرێ دای نە تۊی جەرگم
هەر زووخ مەشانۊ تا وە ڕووی مەرگم
فەڵەک وە ئەڵماس مەودای بۍ ئامان
پەی کەردی باڵای نەو تووڵ نەمامان
فەڵەک تۊ ڕەحمت تووخوڎا وە کۍ کەرد
ئاخر چەنی کۍ مەیلت وە سەر بەرد
جە دەوران دوور تا حاڵ تەقریر
فەڵەک کېت وە مەرگ نەکەردەن زەنجیر
کام بەگ، کام بېگلەر، کام میر، کام وەزیر
وە سەنگ ئەلحەڎ سا کېت نەڎا گیر
کام سوڵتان بۍ بۊت، نەۋستەن واشە
تووخوڎا بەخت کېت نەکەرد چەواشە
سا جای کېت نەکەرد خاڵی جە شېران
تووخوڎا تۊ یانەی کېت نەکەرد وېران
خسوسەن وەکېڵ ئەمیر عادڵ
قەڵای قەدیم شار جوانڕۊ مەنزڵ
شای بەهمەن وەقار دەنگ دلېر هەور
جاگیر جای گشت کەیانان دەور
شېر بۍ ئەندېش شای بڵەند ئیقباڵ
خەسرەوی لاڵ پۊش دارای کەمەر لاڵ
چېش واچوون فەڵەک چەپ‌گەردی کەچ نەرد
تا مەعجوون مەرگ مفاجات پېت وەرد
بېواڎە کۊچ کەرد جەی دنیای فانی
تەشریف بەرد وە پورت جای جاویدانی
چەرخ بۍ ئەندېش گەردوون بېباک
بېواڎە بەردش وەسای سەرای خاک
بېگلەران دڵتەنگ گرد وە پەژارە
نە چەم سەیل هوون، یەخەی سەڎ پارە
دەس دەس مەڕېزان گرد وە سەردا خاک
بانگ و سەڵاشان مەشۊ وە ئەفلاک
سەر هۊردار نە خاک شای وەش دەماخان
داخ کەردی دەروون دڵ پەڕ جە داخان
لاڎێ نیگا کەر پەی فەرزەندانت
وە ئەهل حەرەم دڵ‌ پەسەندانت
گرد وەیلان وە نېش خار ستەمدا
بەکر وېش کېشان وە لیتەی خەمدا
گشت وە ئەندووی دڵ گشت وە ئاهی سەرد
سەڎای زاریشان جە گەردوون ویەرد
عەبدلکەریم بەگ ئاغەی نامدار
جەم بیەن جە لاش خەمان وە خەروار
شەوان تا وە ڕۊ مەڎۊ وە سەردا
مەناڵۊ جە ئېش زام خەتەردا
ماچۊ ئەی بابۊی کەس نەدارم ڕۊ
مەعروف دەوڵەت شای خونکارم ڕۊ
دووریت قامەتم خەم کەردەن وەکېڵ
مەینەت گشت پەی من جەم‌ کەردەن وەکېڵ
دەردی ناچارم دېونای وەکېڵ
زەوق جوانیم شېونای وەکېڵ
بازاڕ شادیم بی بە خەم وەکېڵ
وە بۍ تۊ کام خاک وەسەر کەم وەکېڵ
ناوەشیت خەسمان دڵ وەش کەرد وەکېڵ
مەرگت دوشمنان سەرکەش کەرد وەکېڵ
شەرتەن تا زیندەم نەی دنیا بېتۆ
تا چوون تۊ نەشوون وە سەرای گڵکۊ
دڵ جە داخ تۊ هەر جۊش دۊ وە جۊش
نەکەم هەرگیز شەم یاد تۊ خامۊش.[1]