لەیلۍ مەجنوون کەرد
بەشۊ دوەمۍ
چ دیمەنێن؟ چ مەیلانێ گەردوونییەن؟مەعشووقە شۊنەو عاشقیرە گېلۊن؟
ئی جارە میرزا ئۆلقاڎر، دیمەنێ زەریفتەرینمان پەی نەخشنۊ، گەر دیمەنە وەڵینەکانە عاشق سەرمەشقو عەشقین، ئی جارە مەعشووقە کەشکۊڵەو دېوانەیی کەرۊ نە کۊڵ و عەساو دەروېشا مەگېرۊ نە دەس، ئی جارە لەیلۍ عامری ساراو دەشت و دەر مەگېڵۊن پەی دیڎارو مەجنوونی.
لەیلۍ زاناش قەیس شییەن وە دووجەیل، ئایېرو عەشقی هۊرپېتە، وېش یاونا دووجەیل، شیی وە سەرینش، مایېل بی وە قەیس وە سەڎ نازەوە، مەپەرساش مەجنوونی: پەی کېن ئاهوو ناڵەت؟ڕەنگ زەردیت پەی کېن؟پەی کۍ وەحشییان جە لات جەم بییەن؟ڕاس واچە پەنەم نووری بیناییم.
ئیتر مەجنوون چېشش گەرەکەن؟


بەڵی چوون گەردوون مەیلان مەیل کەردەن
لەیل تاسەی مەجنوون وېڵ دووجەیل کەردەن
ئەو شەو جە تەقدیر قەیس شیی وە دووجەیل
مەناڵا چەنی سەودای مەیل لەیل
دیش ئاما سەوڵی ڕۊح‌ ئەفزای شیرین
سەفا دا بەو قەیس شەیدای ماتەمین
شی وە سەرینش وە بۍ مودارا
ئەسرینان چوون سەیل جە دیڎەش وارا
دەرلا ئەو ناڵەی قەیس شنەفت بە گۊش
ئەو نە جامەی هۊش ۋېش بی فەرامۊش
مایېل بی وە قەیس وە سەڎ نازەوە
وە سەڎ عیشوە و لەنج بۍ ئەندازەوە
وە سەڎ نەزاکەت وەفا و مەیلەوە
وە سەڎ ئەساسەی شېوەی لەیلەوە
وە سەڎ شەوق و زەوق شاڎیی و سەفا و سەیر
واتش هەی مەجنوون عاقبەت وە خەیر
چېشەن مەر پەی کۍ ئاهوو ناڵەتەن
پەی کۍ هەر سەحەر شین و زاڵەتەن
پەی کۍ ڕەنگ‌ زەدەی چوون خەزانتەن
یە دېق پەنهان کەس نەزانتەن
پەی کۍ ئەساسەی دەف وە پۊستەن
پەی کۍ چوون عەوداڵ هەر یا دۊستەن
پەی کۍ مەناڵی پەی کۍ زاریتەن
پەی کۍ ئېش سەخت دەرد کاریتەن
پەی کۍ (یا مەن هۊی) کۆسارانتەن
پەی کۍ (هوو یا هووی) موغارانتەن
پەی کۍ وەحشېیان جەلات بېیەن جەم
مەر نام لەیلەن نمەگنۊت جە دەم
پەی کۍ مووی فەرقت وە دامان ئامان
پەی کۍ گیرۊڎەی جە ئېش زامان
ڕاس واچە ئەی قەیس نوور بیناییم
ڕەفیق ڕای چۊڵ، کوشتەی تەنیاییم
هەی تاک دیڎەی ئەسرین چارەکەم
ئارامی دڵەی خەفەت بارەکەم
قیبلەی دنیا و دین، دنیا و دینەکەم
سەرمایەی حەیات عومر و ژینەکەم
مەجنوون سەرمەشق دەردەدارەکەم
خەمناک خەمبار خاتر خارەکەم
ئاوارەی هەردی کۊی دووجەیلەکەم
ساحیب شەرتوو شۊن، وەفا و مەیلەکەم
پەڕ بەین و پەڕ شەرت، پەڕ قەرارەکەم
یەک عەهد و یەک قەوڵ، وەفاڎارەکەم.[1]