میرزا ئۆلقاڎر، نامێوە گلەیی ئامېزە مەکیانۊ پەی دۊسێش، هەواڵش مەپەرسۊ، گلەیۍ نادیاریش ۋەنەکەرۊن، هەر جە نامەکېنە مەڵامەتو بۍ مەیلی و بېتاقەتی دۊسەکەیش مەگېڵنۊوە پەی بۍ نیازی یارەکېش، یارە چن ڕەنگەکېش، گا سرکەی ترشەن، گا شیر و شەکەر، گا دەوای زامان، گا مایەی ئازار ئېشی سەختەن، پەنەش ماچۊ:
بۊ ڕاس واچە پېم، بزانۊ پەشېویت هۊکارش لەیلەن یان نا؟ گەر لەیلەن، ئانە خەتاو وېتەن، من چن جارۍ لاڵام وە تۊ کە نەگنی دامەو نەزان هەواڵا، چونکم جە لاو ئاڎییشاوە سەنگی سەرد خاستەرەن جە تەڵای ئەحمەر.
مەولام ئەحواڵت
مەولام ئەحواڵت مەولام ئەحواڵت
دووربای پەشېوەن ئارۊ ئەحواڵت
پەی زەوق مەتای سودای ئېساڵت
لېڵەن سەرچەمەی دەریای خەیاڵت
سا بۊ بە شەوق عەشق پارینت
بەین بەستەی خاس ئەو ئیمجارینت
وە گیان د ڵبەر سەوگەند وەردەکەت
بۍ وزوو هەرگیز نام نەوەردەکەت
گا نۊبەر نەمام گا نۊ خېزەکەت
گاهێ ئەغیار و گا هوون ڕېزەکەت
گا شۊخ شیرین گاهێ زشتەکەت
گا دۊس قاتڵ باوان کوشتەکەت
گا قیبلەی یەقین دنیا و دینەکەت
گا بەدر کامڵ سەرزەمینەکەت
گا دەوای زامان پەڕ جە خارەکەت
گا یار یەک‌ڕەنگ وەفاڎارەکەت
گا مایەی ئازار ئېش سەختەکەت
گاگا وانای زام، تۊ نەبەستەکەت
گا کەعبەی مراد گاهێ لەیلەکەت
گاهێ بۍ شەرتی گا بیمەیلەکەت
نازدار نازکیش جای نیازەکەت
بەڎ خۊی بەڎ مەقام بەڎ مەجازەکەت
گاهێ دڵ ئارام گاهێ دڵ‌پەیکەر
گا سرکەی نارەس گا شیر و شەکەر
بۊ ڕاس واچە پېم پەشېویت چېشەن
یا جە سەوگەند، لەیل، دەروونت ڕېشەن
چن جار لاڵام لېت چوون لەنگ لاڵان
نە گنی نە تۊڕ دام نەزان هەواڵان
هەر کەسێ کەسەن پەنا وە کەس بەرد
کەی کەسی فەقیر ئەهلی ناکەس کەرد
وە خەیاڵ خام ئەهل نەزان‌حاڵ
مەفرق خاستەرەن جە دوڕدانەی لاڵ
چوون خەربازاران ناڕەوای عاجەن
خەرموورە ئەو بار خەیلێ ڕەواجەن
وە عەقڵ سەراف ناشیی بېخەبەر
سەنگ سەرد خاسەن جە تەڵای ئەحمەر
من پاسەم زانا واتم سا ڕاسەن
تا یەومەلمەحشەر هەر ئاشناسەن
ئەرسەد چوون یۊسف خەریدارش بان
یا سەڎ شای خەسرەو ئینتزارش بان
گرد گەنج عاڵەم پېش کەران وە کۊ
مەحاڵەن هەرگیز بویەروون جە تۊ
ئیستە مەژنەوون گەرمە بازاڕش
یارش ئەغیارش، ئەغیارش یارش
وەفاش وەفای باد وەڵگ دارانەن
شەرتش شۊن پای ڕاویارانەن
حەیف سەڎ حەیفەن پەی ئه و جەمین گوڵ
شەرت و وەفای وېش نەوەرد وە مەنزڵ
نەگرتش نەوەر ڕاِی وەفاداران
نەتەرسا جە تیر ئاهی بیماران
ناوەردش وە یاڎ وەفای بەین مەیل
نە مەیل مەجنوون خاتر نەکەرد کەیل
جە هیجران دۊس هانا و داڎ نەکەرد
شیرین ئاسا کۊچ، لای فەرهاد نەکەرد
وەسوەسە و خەیاڵ نیمەشەو نەکەرد
تەرک ناز باڵش مەستی خەو نەکەرد
سەرتاپای باڵاش قەڵاخی نەکەرد
جە قەوم و خوېشان وېش یاخی نەکەرد
یاد شەرت و شۊن ماهو ساڵ نەکەرد
پارچەی دەرونش وە زووخاڵ نەکەرد
حەرف حاڵ زانان کەس بە گۊش نەکەرد
باڎەی وەفا و مەیل زەڕەی نۊش نەکەرد
خان خاترش پەڕ جە خار نەکەرد
ئیشارەی ئەبرۊ لای دیوار نەکەرد
قەتع ئامۊشۊی ئەغیاران نەکەرد
مەیل دیڎەنی خەمباران نەکەرد
جە واتەی بەڎان سەمعش کەڕ نەکەرد
دیڎەش وە ئەسرین فەراق تەڕ نەکەرد
فوتەی تانەی ماڵ خەم نە پېڵ نەکەرد
وېش نە ڕەقیبان هەرگیز وېل نەکەرد
ئارەزووی واڎە وېڵ یار نەکەرد
وەفای وېش جە لای دۊس ئیزهار نەکەرد
مەولام وە گیانت خاتر پەڕ خارم
جە بېکەیفی تۊ تەمام ئەوگارم
ئەر هەر کەوتەبۊ وە خاترخاهیی
بېشەرت و شۊنی ڕای بېوەفایی
(قادر) حاسڵەن جە دەوران یاسش
هەنی جە لای من مەدارە باسش.[1]