چناری هەوڵی
بەشۊ حۆتەمۍ

چناری هەوڵی، ماچۊ: میرزام من چا وەختەنە هەڵای کامڵ نەبیەبېنا، ناپۊختە بېنا، چەنی نەماما بازیم مەکەرد، ڕوێشا جە ناگا دەنگو تەپڵێ ئاما نە گۊشم، سوپاو عەبدوڵڵاو کوڕو عومەری، دیارشدا، خەڵکو پاوەی گرد ئیمانشان ئاوەرد، ڕووەشا کەردە دینو محەمەڎی، یاگۍ بت و بتخاناشا، کەردە بە مزگی، چاگۆ سوپاکۍ جمارە تا یاوا بە(یەزگرد)ی پاشاو ساسانەکا، جە حەیبەتیېنە ڕەما، لوا دلۍ ئاساوێ وېش شارتۆ، پەنەشا زانا، گېرتشا.
میرزام من جەودەم، ناپوختە خام بیم
ساوای ساف نەرم تووڵە نەمام بیم
هەر سوب تا ئېوار هەر بازیم مەکەرد
چەنی شاتوڵان شانازیم مەکەرد
ئەوەن پەی ئەوان جەرگم زوخاڵەن
تاریخ عومرم سی هەزار ساڵەن
کەس چوون من سەفای دنیاش نەوەردەن
کەس وېنەی من سەیر دەوران نەکەردەن
یەک ڕۊ جە ناکا پەشېو بی هۊشم
دیم سەدای تەپڵێ ئاما نە گۊشم
جەیش شای حەریم عەبدوڵای عومەر
دیار دا وېنەی ۋرشەی نور خوەر
گەنج گەنجەگەش جە بېخ بەر ئاوەرد
قەڵای پاسکەش زیر و زەبەر کەرد
وە زەرب شمشېر مەودای ئاو وە دەم
شار شمشېرش شېونا وە هەم
زەلزەلەی عەزیم خېزا جە پاوە
لەرزە کەوت نە جەرگ سەرقولەی شاوە
ئەی وەلایەت گرد ئیمانشان ئاوەرد
ڕووشان وە‌قوبەی موحەممەدی کەرد
یاگەی کلېسا و بوت و بوتخانان
کەردەن وە مەسجد پەی موسڵمانان
جە تەنخوای ناقووس واڎەی سوب سەحەر
خېزا بانگ بەرز (الله اکبر)
چەو دما ڕوکەرد وە حەوز خانی
یاوا یەزدجرت نەمرود سانی
جاور کە جادار ئه و ئەلخەناس بۍ
پادشای ئەحشام قەوم سەریاس بۍ
وە حوکم حەزرەت عەبدوڵای عومەر
جاور وەشاڎیی و تەرب تەسخیر کەر
داش وە زەمیندا جەرگش بەر ئاوەرد
ڕۊحش وە مالک دۊزەخ تەسلیم کەرد
یەزدجرت کە دی ئەی ماجەرای سەخت
وە ناچار بەرشی گوریزا جە تەخت
عەکاشەی پەڕزۊر نیا وە شۊنش
ئەنفاس حەزرەت بی ڕەهنموونش
مەنزڵ وە مەنزڵ تا مامۊخ بەردش
تەمام خەستە تەن پەشېوحاڵ کەردش
ئاخر فەرار کەرد وە ئاسیاوێ
وە دۊزەقەی سەرد دۊڵین خراوێ
باز نە شۊن ئەو عەکاشە یاوا
هەرچەند پەرسا کەرد جەو زەید و ماوا
چوون بازشش دانگ نەچیر گوم کەردە
مەگېڵا وە سۊز هەردە وە هەردە
ئاخر ئاساوچی تەڵەب کەرد وە بەر
واتش بەو عەشقەی دەهەندەی داوەر
کەسێ وە تۈمار تاج زەردەوە
وە جقەی شاهی لاجیوەردەوە
وەر جە من ئاما ئیستە گوم بیەن
بۊ ڕاس واچەپېم یە ئەو کۊ شیەن
ئاساوچی واتش نوور چاو من
هانە دۊزەقەی ئاسیاو من
دەرسات پەیاپەی شېر بېئەندېش
شیی نە دۈزەقە پەی شکار ۋېش
گرتش کەمەربەند ئاوەردش وە بەر
جا کەردش وە چۊڵ دین پېغەمبەر
جەودما ساتێ ساکن بی جە دەرد
ئاساوچی سوار ئەسپ مەلعون کەرد
دەرسات ئاساوچی چەنی وېش بەردش
حوکم کوردستان بە ئەو سپەردش
ئیسە گشت میر و خان و خانزادە
والی والیان خوڎا پېدادە
هەرچی خەوانین جە کوردستانەن
یەکسەر نەبیرەی ئه و ئاسەوانەن
هەم بشین وەلای سەحابەی سەروەر
عەکاشەی پەڕ زۈر، عەبدوڵای عومەر
تەمامی ئیران وە دەس ئاوردەن
دنیا هەم وە دین موزەیەن کەردەن
کارشان تەمام وە ئەنجام یاوا
ڕوو هەم کەردەن پەی مەدینە ماوا
تا سەدساڵ دنیا بەو تەور قەرار بەس
هەنی جەودما کەس نەڎا وە کەس.[1]