بڕیاردەری فراکسیۆنی یەکێتیی لە پەڕڵەمانی ئێراق ئاشکرای دەکات، مادەی پاشەکەوت دەنگی هێنا، دەنگدان و ژماردن 30 چرکەی خایاند و دەشڵێت: کۆتایی بەقەیرانی مووچە دێت و پڕۆژەکان لە کوردستان دەستپێدەکاتەوە.
#کاروان عەلی یاروەیس#، بڕیاردەری فراکسیۆنی یەکێتیی لە پەڕڵەمانی ئێراق لە پەیجی خۆی لە فەیسبووک نووسیویەتی: مادەی تایبەت بە پاشەکەوت دەنگی هێنا، بەڵام سەرۆکی پەڕڵەمان زانی سەرۆک فراکسیۆنە سەرەکییەکانی ئیتار ناڕازین، وتی دەنگی نەهێناوە، خستنە دەنگدان و ژماردنی دەنگەکان 30 چرکەی پێ نەچوو.
بڕیاردەری فراکسیۆنی یەکێتیی وتیشی: لایەنی کوردستانی هەبوو پێی خۆش نەبوو 15 هەزار مامۆستا و وانەبێژی کەرکووک مووچەکەیان لە هەرێمەوە بخرێتە ئێراق چونکە پێینوابوو لە ڕووی سیاسیەوە لە بەرژەوەندی یەکێتییە.
هۆشداری دەدات لەوەی، ئەگەر کورد خۆی چاک نەکات و یەکگرتوو نەبێت، هەرێم و ناوچە کوردستانییە دابڕێنراوەکان ڕۆژ لەدوای ڕۆژ دۆخیان خراپتر دەبێت.
لەبرەی دۆخی دارایی هەرێمەوە لە ئاییندەدا دەڵێت: کۆتایی بەقەیرانی مووچە دێت و پڕۆژەکان لە کوردستان دەستپێدەکاتەوە. [1]