پروسەو وەزەبانی جە هۆرامانەنە
هۆرامان جە وېیەردەی وەڵینەنە، کانگاو ڕازە نەنویسیایەکا و فەرهەنگېوی دۆڵەمەندی بېیەن. ئی فەرهەنگە و ئی عاڎەت و کردارێ، بڕېوشا چەنی لوای دەورانی نەمەنێنێ و بۍ ڕەنگێ بیېنۍ. ئینەیچە هۆرگېڵۆوە سەرو مەجبوور کەردەو خەڵکی بە کۆچی نەبەدڵانەی جە دەگاکاوە پەی دلێ شارەکا، بەبۊنەو جەنگیۆ.
هەر پاسە نەبېیەی کەرەسەو ژیوای دلێ یاگە گولانەکانە خەڵکەکەش بۊقە پۆ نیان تاکو وېش بېیاونۆ یاگێو کە ئارامتەر و ئاسووڎەتەر بژیوۆ.
ئینێ گرد بیېنۍ پانەیە تاکو بڕېو عاڎەتێ وەشێ کەمێ باوە و نەمەنا.
یۆ چا وەشیا، یام باوە وەشا کە دێر زەمانێوا نامەکێچش ویرە شیێنۆ، وەزەبانا
وەزەبان، هەم پېسە کایێوێ و سەرگەرمیێوی وەشێ و هەمیچ پېسە عاڎەتێوی پەی هامیاری و دەسەواموو خەڵکی چەنی یەکتری، فرەتەر زمسانەنە کریان.
دلێ دەگێنە هەر کەس کناچېش فرێ بیێبا و ئاخر جار بیەبۆ ساحێبوو کوڕېوی، وەزەبانش پەی کریان.
جار جاریچ کوڕە بەگزاڎێو یا خۆڎای پەنەدېو کوڕش بیەبۆ، ئاڎیچ وەزەبانش پەی کریان.
بە داخۆ من نەژنەویەنم ئی کارە پەی کناچۍ کریابۆ. چوون هۆرامان هەمیشە زیاتەر جە هامساکاش ئێژایی کناچە و کوڕیش لاوە یۊ بېیەن.
وەزەبان پېسە کریان:
بڕېو جە باخدارەکا، وەختوو وەز تەکنایەنە، وەزیشا کەردێنێنە دلێ هەلیزێوێ کە هەڵای فرە وشکە نەبیێنۆ و نم دارە بیېنە. بەرەکەشا تڼ بەستێنە. زمسانەنە پېسە سەوقاتێوی هەڵیزەی پەڕ جە وەزەشا بەرڎېنە پەی ئا یانەیە کە کوڕەکەشا بېیەن.
هەڵیزە وەختێو وشکەبۊوە ئیتر نمەتاوی بەرەکەیش کەریۆ و پەڕەیچەنە وەزی. خڕە خڕوو وەزەکایچ دلێشەنە سەرنج کېش بېیەن.
چا وەختەنە یاوێنێ وەروو بەرەو یانەو ساحێب کوڕی، کاردېوەشا دێنە ئۆ تەموەو هەڵیزەکێ و وەزی مجیێنێ و زارۆڵێ کۊ بیېنېوە و بە شاڎی و شۆق وەزەکېشا ئەڕفێنێ.
سپاس پەی کاک کەیۆمەرسی نیکرەفتاری کە چا بارۆ زانیاریێم چەنە هۆرگرت.
ڕەزا بەهمەنی.[1]