دەردە دڵێو چەنی فەرهەنگ دۊس و قەڵەم بە دەسەکا هۆرامانی
دەردە دڵێو چەنی فەرهەنگ دۆس و قەڵەم بەدەس و هۆنەرمەند و شاعێر و گۊرانی واچەکا هۆرامانی.
من پېسە قەڵەم بە دەسېوی گولانەو ئا سەرزەمینیە کە ساڵهای ساڵا پەی گەشە پەنەدای بە فەرهەنگ و زوانو وەڵاتەکەیم هەوڵم دان و هەوڵ مڎەو، چەنی شمەی ئازیزی چن قسێ کوڵێم هەنێ.
بە تایبەت ڕوەم ئینا لاو ئا قەڵەم بە دەس و شاعێر و نویسەر و هۆنەرمەنداوە کە دلێ بەشوو هۆرامانوو ئێرانېیەنە مژیوا.
وەشەویسا،
گەرەکم نېیا پېسە فارس واتەنی جە دوورۆ واچوو لنگش کن من وېم تاتەنا و پەی ساتێوی وېم منیەو یاگێ شمە و مزانوو ئەر کوڕ یا کناچەکێتا شەوانە دلێ ئا ئێر و ئاسنېیەنە سەعاتێو دێر بېیاوە یانە حاڵتا چەنینا!
وەلێم چارە چېشا؟
هەرپاسە مزاندێ یەکانەکەو تارانی بە هێمەتوو جوانەکا کوردسانی و ئێرانی، زەخمېوی کاریش وەنە کۆتەن و ئیسە شەلم کۊرم کۆتەنەنە گېیانوو خەڵکی بۍ دفاعی و بە ئۆپەڕوو بۍ ڕەحمی و دڕندەیۆ دەسش دان گرتەی و کوشتەی جوانەکاوە.
ئیسە ئیتر پاسشە پەنە ئامان هیچ کەس چا وەڵاتەنە نمەتاۋۊ بۍ لایەنبۊ. ئارۊ هۆنەرمەند و نویسەرێ و شاعێرە گۆرەکێ ئێرانەنە فرەتەرێشا ئامێنێ دەنگێ و بە نویسەی و بە سەردای شوعارێوە گولانۍ یا نیشاندای عەکسێو ژینای، وېشا وسەنەنە بەرەو خەڵکی.
ئی هەرمانەو هۆنەرمەندا ئێرانیە تازێ نېیەنە، بەڵکوم بە درێژایی سەدان ساڵێن هەمیشە ئا بەشە جە کۊمەڵگای، دۆرێوی ئەساسیشا بېیەن جە پېش لوای ئێنقلابا دنیایەنە.
هۆرامانیچ هەر ئینا دلۍ ئا خێتانێنە و مشیۊ قەڵەم بە دەسەکېش و هۆنەرمەندەکېش گنا چەنی خەڵکی و ڕا نیشاندەرێ با.
ئارۊ هەر کام جە شمە متاوۆ لانی کەم بە نا فەرمانی مەدەنی و بایکوت کەردەی دەم و دەسگا دۆڵەتیەکاوە دەس پەنە کەرۊ.
ئانەیە بزاندێ کە حەرەکەتوو ئارۊ شمە چەنی بەرەو خەڵکی، دما ڕۊنە کەرۊ بە سەربەرزی و شانازی پەی وېتا و زارؤڵەکاتا.
ڕەزا بەهمەنی.[1]