لەسەر ڕاسپاردەی سەرۆکی #حکومەتی هەرێمی کوردستان#، ئەمساڵ 2024 ژمارەیەکی زۆر قوتابخانە لە پارێزگای #هەولێر# درووست دەکرێت.
ئەمڕۆ یەکشەممە #14-01-2024# لەسەر ڕاسپاردەى #مەسرور بارزانى#، سەرۆکى حکوومەتی هەرێمی کوردستان و لە چوارچێوەی گرنگیدانى کابینەی نۆیەم بە کەرتى پەروەردە و فێرکردن، کۆبوونەوەیەک لەنێوان وەزیری پەروەردە و سەرۆکی دەستەی وەبەرهێنان و پارێزگاری هەولێر سەبارەت بە پلان و ئەنجامدانى پڕۆژەى درووستکردنی چەندین قوتابخانە لە سنوورى پارێزگاى هەولێر بەڕێوەچوو.

لە کۆبوونەوەکەدا لە چوارچێوەى ئەو ئامادەکارى و پلان و بەرنامەیەى بۆ ئەمساڵ 2024 لەلایەن وەزارەتى پەروەردە و پارێزگاى هەولێر داڕێژراوە، بڕیاردرا بە درووستکردنى ژمارەیەکى زۆرى قوتابخانە بەپێى ئەو نەخشە و کوالێتییەى دیارى کراوە لە سنوورى پارێزگاى هەولێر، بە تایبەتى لەو ناوچە و گەڕەک و شوێنە هەژارنشینانەى کە پێویستن.
هەر لە کۆبوونەوەکەدا، جەخت لەسەر ڕاسپاردەى سەرۆکى حکوومەت و ئەولەویەتی کارى کابینەى نۆیەمى حکوومەتى هەرێمى کوردستان کرایەوە، لە برەودانى زیاتر بە کەرتى پەروەردە و فێرکردن لە هەرێمى کوردستان بەگشتی و هەولێرى پایتەخت بە تایبەتى، هەروەها دەستپێشخەرى و هەنگاوەکانى ئەو وەبەرهێنەر و خێرخوازانەش بەرز نرخێندرا کە لە ساڵانى ڕابردوودا هاوکار و یارمەتیدەر و هەماهەنگ کارى حکوومەتی هەرێمی کوردستان بوونە لە ئەنجامدانی پڕۆژەی هاوبەش و درووستکردنى قوتابخانە.
کۆبوونەوەکە بە ئامادەبوونی هەریەک لە د. #ئالان حەمەسەعید#، وەزیرى پەروەردە و د. محەمەد شوکرى، سەرۆکى دەستەى وەبەرهێنانى حکوومەتى هەرێم و #ئومێد خۆشناو#، پارێزگارى هەولێر و مەسعود کاڕەش، جێگرى پارێزگاری هەولێر بەڕێوەچوو. [1]