کورد دلۍ چەرخەکا تاریخینە
بەشۍ: سەڎ و سی و نۊهەمە
نویستەی: #هاوڕێ باخەوان#
ساڵەو (1820ز):
* ئەچی ساڵېنە ئەمەریکا جە ڕاو مسیۆنێرە ئایینیەکاوە بنکەو وېش دلۍ کوردەسانینە نیانەرە.
* ئەچی ساڵېنە ژمارەو نیشتەجاکا شارو سلێمانی یاوان دە هەزار کەسۍ، بەپاو ئامارێ کەسێ شارەزای کوردی کە نامېش گمەنە، میستەر ڕیچی باسکەردەن، دیسان باسو ئانەیشە کەردەن کە سلێمانی دۋۍ مزگیۍ ڕېک وپېکۍ و جوانۍ و گەرماوێ پۊشتېش چەنەنە.
* ئەچی ساڵېنە شۆڕشو کوردە زازاکا جە سەرنیشتو کوردەسانینە خېزیان.
* ئەچی ساڵېنە میستەر هارت لوان پەی سلێمانی و ژمارەو نیشتەجایەکاش بە (10000) دەهەزار کەسا نیانەرەو ژمارەو یانەکاچش بە (4412) یانا نیانەرە، کە (130) یانېشا جوولەکۍ و (9) یانېشان کلدانیۍ و (5) یانېشان ئەرمەڼیۍ بیېنۍ، پەنج مزگیېچش چەنەبیېنۍ.
* دۆروبەرو ئی ساڵېنە، ژمارەو گۊرانەکا دلۍ شارەزوورینە چوار تاکو پەنج ئاڼەو خېڵەکییەکا بېیەن.
* تاریخو (01-04-1820ز)ینە گەشتەکەو کلۆدیۆس جیمس ڕیچی پەی کوردەسانی دەسش پەنەکەردەن، کە خانەوادەکەش و بڕێ جە ئەڼاما یانەو نشینگاو بەغڎایش چەنی بیېنۍ، ئا گەشتە یاگۍ ئېژایەن، میستەر ڕیچ گەلێ زانیاریۍ بە قیمەتېش دەربارەو کوردەسانی جە سەدەو ڼوزڎەهەمینە تۊمارۍ کەردېنۍ.
* تاریخو (25-04-1820ز)ینە میستەر ڕیچ درېژەو گەشتەکېشەنە مەیاوۊن ئۆ شارو کفری، چاگە سەرنجە مڎۊن هەکە دلۍ شارو کفرینە بڕێ جوولەکېش چەنەنۍ و کەنیسێوەیچشان هەنە.[1]