لە بەرانبەر سازشکردن بە #شاناز ئیبراهیم ئەحمەد#، #بافڵ تاڵەبانی# سەرۆکی #یەکێتیی نیشتمانیی کوردستان# لە هەوڵدایە بۆ ئەوەی #بەرهەم ئەحمەد ساڵح# سەرۆک کۆماری پێشووی ئێراق دووبارە بگەڕێندرێتەوە و بکرێتەوە بە سەرۆک کۆمار.
ماوەیەکە بافڵ تاڵەبانی لە گفتوگۆ و هەوڵدایە، بۆ ئەوەی بەرهەم ساڵح بگەڕێنێتەوە بۆ گۆڕەپانی سیاسی و لە شوێنى #لەتیف ڕەشید#، سەرۆک کۆمارى ئێستاى ئێراق بیکات بە سەرۆک کۆمار.
بافڵ تاڵەبانی بەم هەنگاوەی دەیەوێت لە داهاتوودا وابکات بەرهەم ساڵح دوورنەکەوێتەوە، هەروەها لە هەمان کاتدا بەهۆى ناکۆکییەکانى لەگەڵ شاناز ئیبراهیم ئەحمەد، ئەندامى دەستەى کارگێڕى یەکێتیى ئەو کارتە بەکاربهێنێت.
بافڵ تاڵەبانی دەیەوێت بە پێدانی پۆستى سەرۆک کۆمار، کە لە داهاتوودا لەسەری ڕێکدەکەون، بەرهەم ساڵح بگەڕێنێتەوە بۆ گۆڕەپانی سیاسی، کە لە دوای دەستبەرداربوونی لە پۆستی سەرۆک کۆماری ئێراق گۆڕەپانەکەی چۆڵکردووە.
دەستبردن بۆ گۆڕانکارى لە پۆستى سەرۆک کۆمار لەلایەن بافڵ تاڵەبانى لە کاتێکدا، کە بەشێک لەلایەنە ئێراقییەکانیش ناکۆییان لەگەڵ سەرۆک کۆمارى ئێستا هەیە و لێى ڕازى نین و دەیانەوێ بیگۆڕن. [1]

هەواڵی مەرگی هەڤاڵ و هاوڕێ و هاورێبازمان کاک #عادل موراد# تاساندمی.. کۆچی ناوادەی ئە م پياوە تيکۆشەرە کۆستێکی گەورەيە بۆ يەکێتی نيشتمانی کوردستان و ميللەتي کورد، لەدەستدانی ئەم سياسەتمەدارە لێهاتووە خەسارەتێکی گەورەيە بۆ پرسی نيشتمانی و نەتەوەييمان، پڕ بەدڵ سەرەخۆشی لە مناڵەکانی و بنەماڵە بەڕێزەکەی کاک عادل ئەکەم، هاوبەشی خەمتانم.
بەڕێزم : کاک عادل تەنها هەڤاڵێکی يەکێتيم نەبوو، بەڵکو براو هاوڕێی تەمەنيشم بوو، بەدرێژايی ويستگەکانی ژيانمان پێکەوە کارمان کردوه و، لە تاڵی و سوێری ڕۆژگارە سەختەکانی خەباتی سياسيمان پێکەوە بەشدار بوين، لەساڵانی سەرەتای حەفتاکانەوە ئەم کەڵە پياوەم ناسيوه و، تا ساتی کۆچی دواييشی هەميشە يەک ڕێبازو يەک بيرکردنەوه و يەک هەڵوێستی و وەفا بۆ يەکێتی و کوردايەتی پێکەوە کۆمانی کردۆتەوە، مايەی شانازيە بۆ من لەتەک تێکۆشەرێکی گەورەی وەکوو کاک عادل موراد لەسەر ڕێبازەکەی مام جەلالی نەمر بەردەوامی بە خەباتی نەتەوەيی ميللەتەکەمان بدەين.
کاک عادل بەدرێژايی تەمەنی سياسی خۆيەوە کە لەنيو سەدە تێپەری ئەکرد، پياوێکی خەباتگێڕ و دڵسۆز بۆ پرسی نەتەوه و، پياوێکی دەمڕاست ودەستپاک، پياوێکی هەقبێژ چاونەترس، نەيارێکی سەرسەختی ديکتاتۆريەت و ستەمکاری، پشتو پەنای خەڵکی لێقەوماو وهەژارانی وڵاتەکەم.
هەزاران سڵاو له گيانی پاکی کاک عادل مورادی گەورە سياسی و تێکۆشەری ميللەتەکەمان
نەمری و سەربەرزی بۆ کاک عادلی ئه ندامی دەسته ی دامەزرێنەری يەکێتی و ڕۆڵەی شاخەکانی کوردستان
داوا لەخوای گەورە ئەکەم بە بەهەشتی بەرينی شاد بکات سێبوری ئێوەش بداتەوه و تەمەن درێژيش بۆ مناڵەکانی لەگەڵ ئەوپەڕی ڕێزو خۆشەويستيم بۆ هەموتان..
انا لله وانا اليه ڕاجعون
براتان
دکتۆر #لەتيف ڕەشيد# هاورێ و هەڤاڵی خوالێخۆشبوو
بەغدا #19-05-2018#

دەقی پیرۆزباییەکەی لەتیف ڕەشید:
بەڕێز کاک کاروان ئەنوەر سەرنووسەری بەڕێزان ڕۆژنامەنووس و کادیر و تەواوی ستافی سایتی(PUKmedia)
سڵاوێکی گەرم..
بەبۆنەی ساڵیادی دامەزراندنی سایتی (PUKmedia) جوانترین و گەرمترین پیرۆزباییتان ئاڕاستە دەکەم، هیوای سەرکەوتن وبەردەوامیتان بۆ دەخوازم.
هیوادارم لەساڵی نوێی تەمەنی کارکردنتان بەردەوام بن لەخزمەتی ڕاگەیاندن و ڕۆژنامەگەری وڕۆشنبیری کوردی وعەرەبی، ئەم ماڵپەڕە هەمەڕەنگە توانیویەتی هەواڵ و زانیاری بەکەڵک و پێویست بەخوێنەرانی بگەیەنێت، وببێتە پێگەیەک وپردێگی گرنگ بۆ گواستنەوەی هەواڵی گەلی کوردستان بۆ گەلانی تر، لە ڕوی کەلتورو فەرهەنگ ڕۆشنبیریەوە.
دووبارە پیرۆزبێت ساڵ یادی دەمەزراندنی سایتەکەتان..
سەرفراز وسەرکەوتووبن...
دکتۆر لەتیف ڕەشید[1]

عەبدوللەتیف جەمال ڕەشید
لەساڵی (2003)وە وەک وەزیری سەرچاوە ئاوییەکانی عێراق بەرپرسی کۆمەڵێک پرسی پەیوەندیدار بە سەرچاوە ئاوییەکانی عێراق لەئاودێری و دابینکردنی ئاو بۆ مەبەستی پیشەسازی و شارەوانی و وزەی کارۆمائی بووە و سەرپەرشتی ئەو چاکسازیانەی کردوە لەو بوارەدا ئەنجام دراون. دکتۆر عەبدوللەتیف ساڵی 1944 لە #سلێمانی# لەدایک بووە و ئەندامی یەکێتی نیشتمانی کوردستانە، خاوەن بڕوانامەی بەکالۆریۆسە لە ئەندازەی شارستانی ساڵی 1968 لەزانکۆی لیڤەرپول و ماستەر لە ساڵی 1972 و دکتۆرا لە ساڵی 1976 لە زانکۆی مانچستەر. لەگەڵ زۆر ڕێکخراوی پەیوەندیدار بەکاری ئەندازەیی و گەشەپێدانی کشتوکاڵ کاری کردوە. پێشتر لە یەمەن و سعودیە بەڕێوەبەری پڕۆژەی ڕێکخراوی خۆراک و کشتوکاڵی جیهانی UNFAOی سەر بە نەتەوە یەکگرتووەکان بووە. ئەندامی ئەنجومەنی جێبەجێکردنی کۆنگرەی نیشتمانی عێراقی INC و نوێنەری یەکێتی نیشتیمانی کوردستان بووە لە بەریتانیا (1986) و وتەبێژی بەرەی کوردستانیش بووە. لە ساڵی (2003)وە وەزیری سەرچاوە ئاوییەکانی عێراق بووە. [1]
لە #13-10-2022# پۆستی سەرۆککۆماری عێراقی بەدەستهێناوە.[1]
لەتیف ڕەشید هاوژینی #شاناز ئیبراهیم ئەحمەد#، هاوەڵزاوای #مام جەلال#ە.

#لەتیف ڕەشید# سەرۆک کۆماری نوێی ئێراق، پێشنیازی پۆستی ڕاوێژکاری بۆ چەند سەرکردەیەکی کۆنی #یەکێتیی نیشتمانیی کوردستان# کردووە.
لە ماوەی دوو ڕۆژی ڕابردوودا و لەمیانی کۆبوونەوەکانی لەگەڵ چەند سەرکردەیەکی کۆنی یەکێتی، لەتیف ڕەشید پێشنیازی پۆستی ڕاوێژکاری بۆ ئەو سەرکردانەی حیزبەکەی کردووە.
یەکێک لەو سەرکردانە، #مەلا بەختیار# ئەندامی ئەنجوومەنی باڵای بەرژەوەندییەکانی یەکێتییە، کە داوای لێ کردووە، ببێتە ڕاوێژکاری پێشکەوتوو لە سەرۆکایەتی کۆمار.
کە جگە لە مەلا بەختیار، لەتیف ڕەشید ئەو پێشنیازەی بۆ چەند سەرکردەیەکی تری یەکێتی کردووە، لەوانە #محەمەد سابیر ئیسماعیل# و #ملازم عومەر عەبدوڵڵا#. [1]

#لەتیف ڕەشید#، سەرۆک کۆماری ئێراق لە شاری بەغدا پێشوازی لە وەفدێکی کۆمیسیۆنی باڵای سەربەخۆی هەڵبژاردنەکان کرد بە سەرۆکایەتی دادوەر عومەر ئەحمەد محەمەد، سەرۆکی ئەنجوومەنی کۆمسیاران.
لە دیدارەکەدا سەرۆک کۆماری ئێراق تەئکیدی لە پێویستی پابەندبوون بەخشتەی کاتی ئەنجامدانی هەڵبژاردنی ئەنجوومەنی پارێزگاکان کردەوە و ڕاشیگەیاند دەبێت ئەنجامی هەڵبژاردنەکان لەکاتی دیاریکراوی خۆیدا و بەپێی ڕێکارە یاساییەکان ڕابگەیەندرێن.
لای خۆیەوە سەرۆکی ئەنجوومەنی کۆمسیاران ئاماژەی بەوەکرد کۆمیسیۆن بەتەواوی ئامادەیە بۆ ئەنجامدانی هەڵبژاردنەکان لەکاتی خۆیدا لە هەموو ناوچەکانی ئێراق جگە لە پارێزگاکانی هەرێم لەبەر هۆکاری تەکنیکی، ڕاشیگەیاند هەرێمی کوردستان خواستی خۆی بۆ ئەنجامدانی هەڵبژاردنەکان دەربڕیوە بەڵام هۆکاری تەکنیکی ڕێگر بووە لە بەردەم پڕۆسەکەدا. [1]

#لەتیف ڕەشید# سەرۆک کۆماری نوێی عێراق تەواوی تیمی ڕاوێژکاری و فەرمانبەرانی سەرۆکایەتی کۆمار دەگۆڕێت.
لەتیف ڕەشید ئامادەکاری کردووە، بۆ ئەوەی دوای دەست بە کار بوونی تەواوی تیمی ڕاوێژکاری سەرۆکایەتی کۆماری عێراق بگۆڕێت.
ئامادەکارییەکە بەشێوەیەکە، ئەوانەی بە هەمیشەیی لە سەرۆکایەتی کۆمار کراون بە ڕاوێژکار ڕاژەکانیان دەگوازێتەوە بۆ شوێنی تر، ئەوانەشی گرێبەستن گرێبەستەکانیان هەڵدەوەشێنێتەوە و کەسانی تر لە شوێنیان دادەنرێن.
کە ئەو گۆڕانکارییە زۆرینەی بەڕێوەبەر و فەرمانبەرەکانی بەشەکانی سەرۆکایەتی کۆمار دەگرێتەوە، ئەوەش لە پێناوی دوورخستنەوەی ئەو کەسانەی لە #بەرهەم ئەحمەد ساڵح# نزیکن لە سەرۆکایەتی کۆمار.
زانیارییەکان باس لەوەش دەکەن، ئەم پرۆسەیە لەلایەن تیمێکی تایبەت ئەنجام دەدرێت، خودی #شاناز ئیبراهیم ئەحمەد# هاوسەری لەتیف ڕەشید سەرپەرشتی دەکرێت. [1]

$سەرۆک کومار جەخت دەکاتەوە لەگرنگی چارەسەرکردنی کێشەکان بەشێوازیکی ئاشتیانە و بەپێی یاسا و دەستور$

سەرۆک کۆمار دکتۆر #لەتیف ڕەشید#، ڕۆژی چوار شەمە #08-02-2023#، لە کۆشکی #بەغدا#، پێشوازیکرد لەشاندێکی خۆنیشاندەران.
لەمیانەی دیدارەکەدا، سەرۆک کۆمار دووپاتیکردەوە لە مافە دەستوورییەکانی هاووڵاتیان لە خۆنیشاندان و ئاماژەشی بەوەکرد: کە ئەرکی دەوڵەتیشە گوێ لە داواکاری ڕۆڵەکانی گەل بگرێت و کاری تەواویش بکات بۆ دابینکردنی ژیانێکی شکۆمەندانە و ئارام و چارەسەرکردنی کێشەکان بەشێوەیەکی ئاشتیانە بەپێی یاسا و دەستور.
هەر لە دیدارەکەدا، سەرۆک کۆمار، ئاماژەی بەوەکرد: کە پێویستە تیشک بخرێتە سەر سەقامگیریی، ئاساییش و ئارامیی، بەتایبەتی کە ئێراق وڵاتێکی دەوڵەمەندە و هەموو توانایەکی تێدایە، و ئێراقیەکانیش بارودۆخێکی سەختیان تێپەڕاند لە ماوەی ڕابردوودا بەهۆی توندڕەوی و تیرۆر و جەنگەوە.
لەلای خۆیانەوە شاندی میوان، ڕێز و پێزانینی خۆیان بۆ سەرۆک کۆمار دەربڕی بۆ وەڵامدانەوەی هەرچی زووی داواکارییەکانیان و دووپاتیانکردەوە کە ئەمڕۆ هەست بە کەشێکی نوێ دەکەن بەتایبەتی کە پارێزەری دەستور دەرگای بە ڕووی خۆنیشاندەراندا واڵاکردووە و بڕوایشمان وایە کە بەڕێزیان گوێی لە داواکارییەکانمان گرتووە و کاریشیان بۆ دەکات، ئاماژەشیان بەوەکرد: کە سەرۆکایەتی کۆمار داواکاریی و خواستەکانمان بەهەند وەردەگرێت. [1]

#لەتیف ڕەشید# سەرۆک کۆماری ئێڕاق، چەند ڕاوێژکارێکی #بەرهەم ئەحمەد ساڵح#ی سەرۆک کۆماری پێشووی ئێڕاقی دەرکرد.
بەپێی نووسراوێک، کە واژووی نزار محەمەد بەرێوبەری نووسینگەی سەرۆک کۆماری لەسەرە، بڕیاردراوە بە کۆتایی هێنان بە ڕاژەی چەند ڕاوێژکارێک، کە لەسەردەمی بەرهەم ساڵح دا ڕاوێژکاری سەرۆکایەتی کۆمار بوون.
هەر بەپێی نووسراوەکە، کە لە ڕێکەوتی #26-10-2022# دەرکراوە بڕیاردراوە بەو ڕۆژی #31-10-2022# دەرچێتە بواری جێبەجێکردن، بڕیادراوە بە کۆتایی هێنان بە ڕاژەی هەریەکە لە وێدان حەمود و بەدان ئەلسەعدون و خودایر عەباس توەیینی و مەیسون سالم فاروق الدملوجی و ‎وائل عەبدوللەتیف حسێن و ساڵح حسێن جابر و حەسەن جیهاد ئەمین عەلی و مشتەق غەیب حەسەن الجبوری.
ئەمە لە کاتێکدایە پێشتر بوار ئاشکرای کرد، کە لەتیف ڕەشید بڕیارە چەند ڕاوێژکارێکی نوێ بۆ سەرۆکایەتی کۆماری ئێڕاق دابمەزرێنێت و پێشنیازی بۆ چەند سەرکردەیەکی کۆنی #یەکێتیی نیشتمانیی کوردستان# کردووە، پۆستی ڕاوێژکاری وەربگرن. [1]

#لەتیف ڕەشید# سەرۆک کۆماری نوێی ئێڕاق گرێبەستی بەشێک لە پاسەوانە تایبەتەکانی سەرۆکایەتی کۆماری هەڵوەشاندەوە.
لەتیف ڕەشید لە چوارچێوەی گۆڕانکارییەکان لە سەرۆکایەتی کۆمار، گرێبەستی ئەو پاسەوانە تایبەتانەی هەڵوەشاندووەتەوە، کە لە سەردەمی #بەرهەم ئەحمەد ساڵح# سەرۆک کۆماری پێشووی ئێڕاق دامەزراون.
ئەو پاسەوانانە لەسەر بودجەی سەرۆکایەتی کۆمار لە سەردەمی بەرهەم ساڵح دامەزراون و بەهۆی نزیکییان لە بەرهەم ساڵح، سەرۆک کۆماری نوێ گرێبەستەکانیانی هەڵوەشاندووەتەوە.
ئەمە لەکاتێکدایە، پێشتریش سەرۆکایەتی کۆمار لیستی چەند ناوێکی بڵاوکردەوە، کە ئەویش هەڵوەشاندنەوەی گرێبەستی چەند ڕاوێژکارێکی سەرۆکایەتی کۆمار بوو، کە لە سەردەمی بەرهەم ساڵح دامەزرێنرابوون. [1]