ڕاگەیاندنی ماتەمینی گشتی و سەرەخۆشی لە خەڵکی کوردستان
نیوەشەوی ڕۆژی چوارشەممە 20ی پووشپەڕ، ژمارەیەک لە هاووڵاتییانی مەدەنی و مسافیرانی #سنە#یی دەچوون بۆ شاری تاران، لە ئۆتووبانی مەولەوی شاری سنە تووشی ڕووداوێکی دڵتەزێن بوون. لەو ڕووداوە دەڵتەزێنەدا دەیان کەس لە ئاگری تەقینەوەی پێکدادانی تریلی هەڵگری ماددەی سووتەمەنی، لەگەڵ ئۆتووبووسێک و ماشینێکی مسافیرکەشی، گیانیان لە دەست داوە.
بەپێی هەواڵە پشتڕاست نەکراوەکان و ڕاگەیاندنی هێندێک لە سەرچاوە سەربەخۆکان، ماشینی بارهەڵگری تریلی، هەڵگری نەوتی قاچاخ لە شاری #کەرکووک#ی داگیرکراو و باشووری کوردستان بەرەو ئێران بووە، کە لە لایەن مامەڵچییەکان و تاڵانکەرانی دەوڵەتی و ناوچەیی جێبەجێ دەکرێن.
ڕێکخراوی داکۆکی لە مافی مرۆڤی کوردستان، وێڕای بەداخبوونی خۆی لەو ڕووداوە هەژێنەرە، ڕایدەگەیەنێت، وێڕای سەرەخۆشی لەگەڵ بنەماڵەی گیان لە دەستداوان و برینداربووانی ئەو ڕووداوە، سەرەخۆشی لە خەڵکی شاری سنە دەکات و سەرەڕای ڕاگەیاندنی ماتەمینی گشتی لە کوردستان، هاوخەمیی خۆی لەگەڵ تازیەبارانی ئەو ڕووداوە لە کوردستان ڕادەگەیەنێت.
ڕێکخراوی داکۆکی لە مافی مرۆڤی کوردستان
20ی پووشپەڕی 97
#11-07-2018#

نەوڕۆز و ساڵی 2719 له گەلی کورد پیرۆز بێت
ڕێکخراوی داکۆکی لە مافی مرۆڤی کوردستان، هاتنەوەی نەورۆز و ساڵی نوێ، ساڵی2719 کوردی لە گەلی کورد بەگشتی و خەلکی ڕۆژهەڵاتی کوردستان پیرۆزبایی دەکات.
ڕێکخراوی مافی مرۆڤی کوردستان نەورۆز بە نوێکردنەوە و بووژانەوەی سرۆشت و ژیان و کۆمەڵ و کۆمەڵگای مەدەنی دەزانێت و لەسەر ئەو بڕوایەدایە کە نەورۆز لەهەر ئاستێکدا یادکردنەوەێکە لە سەرکەوتنی جماوەری خەڵک. ئەوە نە تەنیا لەمێژووی کورد، بەڵکوو لەئێستایشدا وەکوو جێژنی سەرکەوتنی خەڵکە بەسەر دەسەڵاتدارە ستەمکارەکان و حکومەتە نادادگەرەکان.
هەر بەم بۆنەوە برز ڕاگرتن و تایبەت بەڕێیەوە بردنی ڕێیەوڕەسمی نەورۆزی کوردەواری، وەکوو جێژنێکی مێژویی و مرویی و نەتەوەی بۆ گەلی کورد پیرۆزە. نەورۆز دەبێ ببێت بە بنەمای یەکرێزی و یەکگرتوویی نەتەوەی کورد لە هەرچوارپارچەی کوردستان.
رێکخراوی مافی مرۆڤی کوردستان دیسانەوە پیروزبایی نەورۆز لە گەلی کورد لە هەر چوارپارچەی کوردستان دەکاتەوە.
27ی ڕەشەمەی 2718
سەرۆکایەتی ڕێکخراوی داکۆکی لە مافی مرۆڤی کوردستان

پیرۆزبایی لە #نادیە موراد# براوەی خەڵاتی ئاشتیی نۆبێلی 2018
کۆمیتەی پێشکەشکردنی خەڵاتی ئاشتیی نۆبێل ڕاگەیاندووە،؛ نادیا موراد لە کوردستانی باشوور و دوکتور دنیس موکوگ لە کۆنگۆی ئافریقا براوەی خەڵاتی ئاشتیی نۆبێلی ساڵی 2018ی زایینین.
نادیا موارد کچە کوردی ئیزەدی، خەڵکی شاری شەنگال، یەکێک لە چالاکانی مافی ژنان و مافی مرۆیی بووە، کە خۆی ماوەیەکی زۆر دیلی گرووپی داعش بووە و لە لایەن ئەندامانی ئەو گرووپەوە تووشی ئازار و ئەزیەتی نامرۆڤانە بووە.
ڕێکخراوی داکۆکیی لە مافی مرۆڤی کوردستان، پێشوازی لە هەڵبژاردنی نادیا موراد وەکوو براوەی خەڵاتی ئاشتیی نۆبێل دەکات و پیرۆزبایی لە ناوبراو و هەروەها هەموو ئیزدەییەکان، خەڵکی کوردستانی باشوور و کوردستان دەکات و هیوای سەرکەوتنی لە یارمەتیدان بۆ باشتربوونی مافی مرۆڤ لە کوردستانی بۆ خواست.[1]
#06-10-2018#

ڕۆژی 2ی ڕێبەندانی، بەرانبەر بە 22ی ژانویە، ڕۆژی دامەزراندنی یەکەمین دامەزراوەی مەدەنی دەوڵەتی کورد لە ڕۆژهەڵاتی کوردستان و ڕۆژی دامەزراندنی کۆماری خودموختاری کوردستان لە ئێرندا، 72 ساڵی بە سەردا تێپەڕ بوو.
لە 22ی ژانویەی ساڵی 1946ی زایینی #قازی محەمەد# لە باڵای ڕێبەرێکی نەتەوەیی، هاوئاهەنگ و هاوڕێ لەگەڵ خواستی بزووتنەوەی ئازادیخوازنە و خودموختاریخوازانەی خەڵکی کورد، خودموختاریی کوردستانی ڕاگەیاند.
قازی محەممەد وەک یەکەمین سەرکۆماری کورد، دەوڵەتێکی لە سەر بنەمای مافه نێودەوڵەتییەکان دامەزراند. دەوڵەتێک کە لە سەردەمی خۆیدا بەپێی لەبەرچاوگرتنی ئەسڵەکانی دێموکراتیک و کۆماری و مەدەنییەت جێگای شازنازی و پێداهەڵگووتنە.
ئەو دەوڵەتە ناوچە کوردنشینەکانی پارێزگای ورمێ و بەشی باکووری سنەی لە خۆ دەگرت، کە داکۆکی لە مافی خەڵک دەکرد و ئەمنییەتی خەڵکی دەپاراست.
ڕێکخراوی داکۆکی لە مافی مرۆڤی کوردستان، وەک یەکەمین ناوەندی مەدەنی مافی مرۆڤی داکۆکی لە دیاریکردنی مافی چارەنووس لە کوردستان، هاوئاهەنگ و هاودەنگ لەگەڵ خەڵکی کورد، ساڵڕۆژی دامەزرانی دەوڵەتی کوردی و بە واتایەکی دیکە کۆماری خودموختاری کوردستان لە ئێراندا پیرۆزبایی دەکات و ئەو ڕووداوە مێژوویییە بە خەڵکی کوردی هەر چوار بەشی کوردستان، بەتایبەت خەڵکی ڕۆژهەڵات پیرۆزبایی دەڵێت.
بە هیوای ئازادی و گەیشتنی خەڵکی کورد بە مافی چارەنووس و ئازادی.
2ی ڕێبەندانی 1396ی هەتاوی
22ی ژانویەی 2018ی زایینی
ڕێکخراوی داکۆکی لە مافی مرۆڤی کوردستان
#22-01-2018#

هەر وەکوو مێژوو بۆمان شایەتی دەدات لە دەیەکانی شەست بەتایبەتی لە ساڵی 1367ی هەتاوی، بە هەزاران بەندکراوی سیاسی لە بەندیخانەکانی ڕێژیم لە لایەن حکوومەتی کۆماری ئیسلامیی ئێرانەوە کۆمەڵکوژ کران.
بەندکراوە کوژراوەکان کە زۆرینەیان ئەندامانی ڕێکخراو و حیزبە ئۆپۆزیسیۆنەکانی ئێران و بەتایبەتی ئەندامی ڕێکخراو و حیزبە ئۆپۆزیسیۆنە کوردییەکان بوون، بە بڕیاری پێڕەوان و شەرعییەتی ڕێبەرانی کۆماری ئیسلامی، بە شێوەیەکی دڕندانە قەتڵ و عام و کۆمەڵکوژ کراون.
کوشتاری خوێنینی دڕندانە و کارەستباری بەندکراوانی سیاسی بێ هیچ لێپرسینەوە و دادگایی کردنێک، بەمەبەستی بەتاڵ کردنی بەندیخانەکان لە هەزاران بەندکراوی سیاسی، ئەو تاوانانە ئەنجام دراون کە وەکوو دڕندانەترین کارەساتی دژی مرۆڤایەتی لە مێژوودا تۆمار کراوە. بۆیە نابێت لە بیر بکرێت کە پێش لەو تاوانانەش لە کوردستان دیسان تاوان و ڕەشەکوژی هەبووە و بەداخەوە ناوەندە نێونەتەوەییەکانی مافی مرۆڤ، وەکوو بێدەنگییە مەبەستدارەکانی حکوومەتەکان کە چاوەڕوانی کۆتایی هاتنی شەڕ و ئاڵوگۆڕی بەرژەوەندییان لەگەڵ ئێراندا هەبوون، ئەوانیش لەو تاوانە دژە مرۆڤایەتییانە چاوپۆشییان کردووە و بێ دەنگییان هەڵبژارد.
نابێت لە ڕوانگەی ویژدانیی جیهان شاراوە بێت کە بۆ یەکەم جار تاوانەکانی کۆمەڵکوژیی و لەسێدارەدان لە کوردستانەوە دەستی پێکرد و پاشان بۆ شوێنەکانی تری ئێران پەرەی پێدراوە. لەسێدارەدانی بە کۆمەڵ لە شارەکانی #سنە#، #سەقز#، #مەهاباد#، #مەریوان#، #پاوە#، #کرماشان# و هەروەها کۆمەڵکوژییەکان لە گوندەکانی قاڕنێ، قەڵاتان، ئیندرقاش، سۆفیان، سەراوقامیش، پاییزئاوا، قەرەگۆل، چەقەڵ مستەفا، خەڵیفان، گۆڕخانە، جبرەئیل ئاوا، گوندەوێڵە و هەروەها کۆمەڵکوژیی و دەرکردنی بە کۆمەڵ لە کوردەکانی شاری #نەغەدە# نابێت لە بیر بکرێت.
ڕێکخراوی داکۆکی لە مافی مرۆڤی کوردستان لە ساڵەکانی دەسپێکی چالاکییەکانی خۆیدا و لە پازدە ساڵی ڕابردووشدا لە سەر کۆمەڵکوژیی و لەسێدارەدانی بە کۆمەڵ و کوشتنی بەندکراوانی سیاسی لە ساڵی 1367ی هەتاوی و ناساندنی هەموو جۆرە تاوانەکانی دژی مرۆڤایەتی لە کوردستان، چەندین جار داوای لێکۆڵینەوەی ڕاستەوخۆی لە کۆمەڵگا نێونەتەوەییەکان کردووە، بەڵام لە بەرانبەر پێداگری لە سەر داواکارییەکان و لانیکەمی سازی تاوانەکان، سەرکوتی ئەو ڕێکخراوە و گرتنی درێژخایەنی بەڕێوەبەرانی لێکەوتووەتەوە.
هەڵوێستەکانی ئەم دواییانەی ڕێکخراوی لێبوردنی نێونەتەوەیی (ئەمنستی) بە مەبەستی هەوڵدان بۆ لێکۆڵینەوە و بەدواداچوون لە سەر چۆنیەتی و هۆکاری کۆمەڵکوژیی هەزاران بەندکراوی سیاسی لە دەیەکانی شەستدا، وێڕای ساڵانێک لە بەسەرچوونی ئەو تاوانانە و دێر هەنگاو هەڵگرتن لەمبارەیەوە، بەڵام لە جێگای خۆیەتی و شایانی ڕێز و پێزانینە و لە لایەن ڕێکخراوی داکۆکی لە مافی مرۆڤی کوردستانەوە پێشوازی لێوە دەکرێت. هەروەها ئەم ڕێکخراوەیە داوا لە ڕێکخراوی لێبوردنی نێونەتەوەیی دەکات کە لەسێدارەدان و کۆمەڵکوژییەکانی کوردستان نەخاتە پشت گوێ و لێکۆڵینەوەیەکی جیددی لە سەر لەسێدارەدانی بە کۆمەڵ و کۆمەڵکوژییەکان لە نێوان ساڵەکانی 1359 تاکوو 1370ی هەتاوی لە کوردستان، بە لێکۆڵینەوەکانی خۆی زیاد بکات.
ڕێکخراوی مافی مرۆڤی کوردستان هەوڵ بۆ ڕووناک کردنەوەی گۆشەیەک لە تاریکی تاوانە شاراوە و لەبیرکراوەکانی ڕێژیم و ناساندنی هەموو جۆرە تاوانێکی دژی مرۆڤایەتی دەدات و هاوکات ئیدانەکردنی ئەم جۆرە تاوانانە لە لایەن کۆمەڵگای نێونەتەوەییەوە بە ساڕێژ کردنی ڕۆحی برینداری بنەماڵە و کەسوکاری کوژراوەکان و ئارام کردنەوەی ویژدانی کۆمەڵگای ئێران و خەڵکی کوردستان دەزانێت.
ڕێکخراوی مافی مرۆڤی کوردستان، داوای پاڵپشتیی جیددی هەموو لایەنەکان لە هەوڵەکانی ئەم دواییانەی #ڕێکخراوی لێبووردنی نێونەتەوەیی# لە داواکاری لێکۆڵینەوە نێونەتەوەییەکان لە سەر کوشتنی بەندکراوانی سیاسی لە ساڵەکانی 1367ی هەتاوی و هەوڵەکانی هاوشێوە و لەسێدارەدان و کۆمەڵکوژییەکان لە کوردستان، دەکات.
ڕێکخراوی داکۆکی لە مافی مرۆڤی کوردستان
14ی سەرماوەزی 1397ی هەتاوی
#05-12-2018#