ئێمە وەکو فراکسیۆنی گۆڕان لە پەرلەمانی کوردستان، بەتووندی ئیدانەی پەلاماری دەوڵەتی ئێران دەکەین بۆ سەر حزبی دیموکرات و، بە کۆمەڵکوژیی و پێشێلکارییەکی گەورەی سیاسی و یاسایی لەقەڵەمی دەدەین. بۆیە بەپێویستی دەزانین و داوادەکەین حکومەتی هەرێم هەڵوێستی هەبێت و بێدەنگی بەرانبەر ئەو کارەساتە بشکێنیت و، بەڕەسمی داوادەکەین کۆبوونەوەی نائاسایی پەرلەمان ئەنجامبدەین بۆ هەڵویستی جدی و یاسایی لەسەر ئەم پەلاماردانە.
وەکو فراکسیۆنی گۆڕان وێڕای هاوخەمی بۆ حیزبی دیموکرات و کەسوکاری شەهیدان و هیوای چاکبوونەوەی بریندارەکان، پاڵپشتی خۆمان بۆ خەباتی دیموکراتییانە و چارەسەر ئاشتیانەی پرسی کورد لە ئێران دەردەبرین.
فراکسیۆنی گۆڕان لە پەرلەمانی کوردستان
#08-09-2018#

بۆ ڕای گشتی...

دوابەدوای سەفەرە زەنجیرەیەکانی کاربەدەستانی ئاسایشی کۆماری ئیسلامی ئێران بۆ باشووری کوردستان و بەرنامەرێژی قۆناخێکی نوێ لە شەڕی تایبەت دژی بزووتنەوەی ئازادیخوازی ئاپۆیی لە ڕۆژهەڵاتی کوردستان و ئەحزابی گرێدراوی بارزانی لە ڕۆژهەڵاتی کوردستان (حدکا، حدک) بوونەتە‌ کەرەستەیەکی ئەساسی ئەم شەڕە تایبەتە.

ئەم ئەحزابە زەردانە کە تەجروبەیەکی دەمدرێژیان لە بە فیڕۆدانی وزەی کۆمەڵگای کوردی و تکهەڵچوون لەگەڵ تێکۆشەرانی کورد هەیە، دەیانەوێت تا بە فەرهەنگی فالانژیستی، کۆمەڵگای کوردستان بەرەو‌ گۆڕەپانێکی بیرتەسکانە و مۆغرەزانە ڕابکێشن، ئەم ئەحزابانە لەم ماوە درێژە لە پاسیڤ بوون و کەمپنشینی خۆیان بوونەتە‌ حەوانگەی سیخوری چەند لایەنە و مۆرەی وەزارەتی ئیتڵاعات و سوپای پاسداران.

یەکێک لە ڕێگا ئەساسیەکانی شەڕی تایبەت، ڕەشکردنی ئەو کەسانەیە کە بیروڕای جیاوازیان هەیە و ئەو کەسانەی کە لە چوارچێوەی سیاسەتە هاوبەشەکانی دەوڵەت و ئەم ئەحزابانە جێ ناگرن.

لەم ڕۆژانەی دواییدا بەشێک لەم کەسانە کە ئەندامێتی ئەوان لە ناوەندە ئیتڵاعاتیەکان و ئاسایشی ڕژیم ئاشکرایە و لەهەمان کاتدا خۆیان وەک پشتیوانانی ئەحزابی زەرد نیشان دەدەن و پدەچێت کە کارتی ئەندامێتی ئەم ئەحزابانەشیان له گیرفانیاندا بێت، هێرشێکی بەرفراوانیان بۆ بەدناوکردنی کەسایەتییە مەدەنییەکان و وڵاتپارێزانی کورد دەستپێکردووە.

بێگومان ئەم کردەوە نا ئەخلاقیانەی مۆرەکانی ڕژێم ناتوانن ئەم کەسایەتییە تێکۆشەرو وڵاتپارێزانە ڕەش بکەن، هەروەها ناتوانن ئەو سەرکەوتنانەی‌ کە گەلی تێکۆشەری کورد ڕۆژبەرۆژ بەدەستی دێنێت، کەمڕەنگ بکەنەوە.

لەم ڕێگایەوە سەرەنجی ڕای گشتی کوردستان بۆ‌ سەر ئەم نەخشە چەپەڵه ڕادەکێشین، هەروەها ئەم مۆرانە و پشتیوانانیان وشیار دەکەینەوە کە هەوڵی تاقیکردنەوەی ئاستی سەبری بزوتنەوەی ئاپۆیی و گەلی وڵاتپارێز کوردستان نەدەن.

مەجلسی پارتی ژیانی ئازادی کوردستان

بەڕێز کاک نێچیرڤان بارزانی، سەرۆکی حکومەتی هەرێمی کوردستان! هەواڵی کۆچی ناوادەی کاک دلۆڤان ئیدریس بارزانی لە ناخی دڵەوە خەمباری کردین. کاک دلۆڤان ڕۆڵەیەکی خەباتکاری کورد لە بنەماڵەی بارزانییەکان بوو کە لە پێناو سەرخستنی بزووتنەوەی ڕەوای گەلی کورددا زۆری چاشت. نەمر دلۆڤان بارزانی لە هەموو ماوەی ژیانیدا، چ لە ئاوارەیی و چ لە شۆڕش و خەباتی کورددا بۆ ڕزگاریی نەتەوەکەیدا تێکۆشا، بەڵام مەرگی ناوەخت مەودای نەدا بەری یەکجاریی زەحمەت و خەباتەکەی بە چاوی خۆی ببینێ. بەو بۆنە خەمناکەوە لەلایەن حیزبی دێموکراتی کوردستانەوە سەرەخۆشی لە بەڕێزتان، جەنابی کاک مەسعوود بارزانی و هەموو بنەماڵەی بارزانییەکان دەکەم و هیوادارم ئەمە دوا خەم و پەژارەتان بێ. ڕووحی نەمر دلۆڤان ئیدریس بارزانی بە بەهەشتی بەرین شاد بێ و ئامانجە بەرزەکانی بۆ سەرخستنی خەبات و شۆڕش و ڕزگاریی نەتەوەیی کورد وەدی بێ. براتان مستەفا مەولوودی سکرتێری گشتیی حیزبی دێموکراتی کوردستان
#03-04-2018#

برای بەڕێز، کاک #عومەری سەید عەلی#.
به سڵاوی گەرم و برایانه.
بەبۆنەی هەڵبژێرانی جەنابت به ڕێکخەری گشتیی بزوتنەوەی گۆڕان لەلایەن ڕێبەرایەتیی #حیزبی دێموکڕاتی کوردستان#ەوه به گەرمی پیرۆزبایی به خۆت و هاوکاره تازه هەڵبژێراوەکانت دەڵێین.
بێگومان جێگرتنەوەی کەسایەتییەکی وەک خوالێخۆشبوو کاک #نەوشیروان مستەفا# ئەرکی قورس و مێژوویی دەخاته سەر شانی ئێوه. هیوادارین له سایەی لێزانی و خەمخۆریی جەنابتەوه، بزوتنەوەی گۆڕان بتوانێ له ئاستی چاوەڕوانییەکانی هەلومەرجی ئێستادا بێ، بەتایبەت له باشووری کوردستان که گەلەکەمان بۆ ڕووبەڕووبوونەوەی ئه و سێناریۆ چارەنووسسازانەی لەپێشیەتی له هەموو کاتێک زیاتر پێویستی به یەکێتی و یەکڕیزی هەیه.
لەگەڵ پیرۆزبایی و هیوای سەرکەوتنی دووباره.
حیزبی دێموکڕاتی کوردستان
دەفتەری سیاسی
26-07-2017

بەڕێز کاک کاوه مەحمود سکرتێری گشتیی حیزبی شیوعیی کوردستان !
لەگەڵ سڵاوی برایانه !
هەواڵی کۆچی دوایی هاوڕێ عەزیز محەممەد کەسایەتیی سیاسیی ناسراوی کورد و سکرتێری پێشووی حیزبی شیوعیی عێراق ئێمەشی وەکوو هەموو دڵسۆزان و هۆگرانی ناوبراو غەمبار و بەداخ کرد.
کاک عەزیز محەممەد جیا لەوه که لەریزی ڕێبەره کۆمۆنیسته هەره بەئیعتبار و جێگای ڕێزەکانی ناوچه بوو، نەتەوهپەروەرێکی ڕاستەقینەش بوو. ئه و تەواوی ژیان و هزر و توانای خەباتکارانەی خۆی هەم لەپێناو یەکسانیی نێوان مرۆڤەکان و هەم له ڕێگای ئازادیی گەلەکەی‌دا سەرف کرد.
بەهۆی کەسایەتیی بەڕێز و جێگای متمانەی نەمر عەزیز محەممەد، ناوبراو له چارەسەری کێشه نێوخۆییەکانی ناوماڵی کوردیش بەتایبەتی له باشووری کوردستان دەوری کارای گێڕا و لەنێو کوردەکانی ڕۆژهەڵاتیش‌دا خاوەنی جێگه و پێگەی تایبەت به خۆی بوو. دۆستایەتیی ناوبراو لەگەڵ دوکتور قاسملوو و حیزبی دێموکڕات بۆ زیاتر له نیو سەده لەوه پێش دەگەڕێتەوه و دواتر له تەواوی بڕگەکانی ژیانی سیاسیی خۆی و حیزبی شیوعیدا دۆستێکی دڵسۆز و پشتیوانێکی ڕاستەقینەی حیزبی ئێمه و بزوتنەوەی کورد له ڕۆژهەڵاتی کوردستان بوو.
به لەدەستدانی کاک عەزیز محەممەد هەموو لایەکمان سەروەرێکی خۆشەویست و شوێندانەرمان لەدەست دا. به و هیوایە که یادەوەری و پەیامە ئینسانیی و نەتەوایەتییەکانی ئه و سەرکرده نەمره ئیلهامبەخشی هەنگاوە خەباتگێڕی و نیشتمانییەکانی لەمەودوای هەموو لایەک بێ.
لەگەڵ ناردنی سڵاو بۆ ڕووحی نەمر عەزیز محەممەد، بەناوی ڕێبەری حیزبی دێموکڕاتی کوردستانەوه هاوخەمیی خۆمان لەگەڵ جەنابت و سەرجەم هاوڕێیانی حیزبی شیوعی و بنەماڵەی بەڕێزی ئه و گەوره نەمره ڕادەگەیەنین.
لەگەڵ ڕێز و هەستی برایانە
حیزبی دێموکڕاتی کوردستان
دەفتەری سیاسی
1 ی ژووئەنی 2017
01-06-2017

بەڕێز شۆڕش حاجی وتەبێژی بزوتنەوەی گۆڕان و بەڕێزانی جڤاتی نیشتمانیی ئه و بزوتنەوەیه!
له هەلومەرجێکی هەستیاردا که ناوچه و کوردستانی پێدا تێدەپەڕێ، بە داخ و پەژارەیەکی زۆرەوه هەواڵی کۆچی دوایی نەوشیروان مستەفا ڕێکخەری گشتیی بزوتنەوەی گۆڕانمان پێ گەیشت.
نەوشیروان مستەفا چ وەک سەرکردەیەکی سیاسی و چ وەک ڕووناکبیرێک ڕابردوویەکی دوور و درێژ و جێگه و پێگەیەکی تایبەتیی له مێژوویی سیاسیی نوێی گەلی کورد بەتایبەتی له باشووری کوردستان‌دا هە‌یه. ئه و که یەکێک له دامەزرێنەر و سەرکردە‌ ئەسڵییەکانی یەکێتیی نیشتمانیی کوردستان بوو و دواتریش له چوارچێوەی بزوتنەوەی گۆڕان‌دا، ڕۆڵێکی دیاری لەسەر نەخشەی خەبات و سیاسەتی کورد لەم پارچەیەی کوردستان‌دا گێڕا.
#حیزبی دێموکڕاتی کوردستان# به چاوی ڕێزەوه دەڕوانێته ڕابردووی خەبات و تێکۆشانی ئه و سەرکردەیەی کورد، بەتایبەتی که له قۆناغێکی گرینگی خەبات و خۆڕاگریی گەلی کورد له ڕۆژهەڵاتی کوردستان به ڕێبەریی حیزبی دێموکڕاتی کوردستان، ناوبراو له دروستکردن و پەرەپێدانی هاوپێوەندیی نێوان کوردەکان له باشوور و ڕۆژهەڵاتی کوردستان‌دا کاریگەرییەکی زۆری هەبوو.
ئێمه وێڕای سەرەخۆشی له بنەماڵەی بەڕێزی نەوشیروان مستەفا و سەرجەم هەڵسووڕاوانی بزوتنەوەی گۆڕان و هیوای سەبووری و سەرساغی بۆ هەموو لایەک، ئارەزوو دەخوازین هاوخەمی و پەرۆشیی هەموو لایەک بۆ کۆچی دوایی ئه و نەمره ببێته دەرفەت و هەوێنی تەبایی و ئاشتەوایی زیاتری کورد له باشووری کوردستان.
مستەفا مەولودی
سکرتێری گشتیی حیزبی دێموکڕاتی کوردستان
19ی مەی 2017
19-05-2007

بارەگای بارزانی لە سەنگەسەر، 1963ی زایینیی. لە ڕاستەوە: حەمە فەرەجی بانەیی، حەسەنی ئیسحاقی، حاچک بارزانی، ئەحمەد تۆفیق (ڕێبەری حدک)، سەلیم ئەسعەد خۆشەوی، سەید حاجی کەڵوێ، ڕەسووڵی پێشنەماز.

بە ئاگاداریی بیروڕای گشتی دەگەیەنین، کە کاتژمێر 10:48ی پێشنیوەڕۆی ئەمڕۆ (شەممە، 8ی سێپتامبری 2018) قەڵای دیموکرات، بنکەی دەفتەری سیاسیی حیزبی دیموکراتی کوردستان، لە کاتی بەڕێوەچوونی پلینۆمی کۆمیتەی ناوەندیدا کەوتە بەر هێرشی مووشەکی و هەوایی کۆماری ئیسلامیی ئێران. لە کاتی ئەو هێرشە و بە دوای ئەو هێرشە دا، فڕۆکەی بی سەرنشین بە ئاسمانی کۆیەدا خولاوەتەوە. هەر دوا بە دوای هێرشە مووشەکییەش بۆ سەر سکرتاریای حیزب، قەڵای دیموکرات کەوتە بەر هێرشی چەندین مووشەکی دیکە.
بە داخەوە ژمارەیەک لە تێکۆشەرانی حیزب بەهۆی ئەم هێرشەوە، شەهید و بریندار بوون. لە ڕاگەیەندراوەکانی داهاتوو دا زانیاریی زیاتر بە ئاگاداریی بیروڕای گشتی دەگەیەنین.
دەفتەری سیاسیی حیزبی دیموکراتی کوردستان
نیوەرۆی 8ی سێپتامبری 2018 17ی خەرمانانی 1397
#08-09-2018#

لە هەلومەرجی هەستیاری ئێستای ڕۆژهەڵاتی ناوەڕاستدا بە تایبەت لە سووریا، نیازی دۆناڵد ترامپ، لەمەڕ کشاندنەوەی هێزەکانی لە باکووری سوریا یان ڕێگەدان به جێبەجێبوونی پلان و هەڕەشەکانی دەوڵەتی تورک بۆ سەر ڕۆژئاوای کوردستان، نیگەرانی و کاردانەوەی زۆری لەنێو کورد و کۆڕ و کۆمەڵە ئەمریکی و نێونەتەوەییەکاندا بە دوای خۆیدا هێناوە.
بۆ جیهان و ئەمریکا ئاشکرایه که کوردەکان چ له عێراق و چ له سوریا له ساڵانی دواییدا ڕۆڵی یەکلاکەرەوەیان بۆ یارمەتیدانی هاوپەیمانیی نێودەوڵەتی لەدژی تێرۆریزم و کۆتایی هێنان به دە سەڵاتی وەحشیانەی #داعش# گێڕاوه، له سوریا، سەڕەرای ئاڵۆزیی چەند ساڵی ڕابردووی ئه و وڵاته، کوردەکانی ڕۆژئاوا توانیویانه هەم لە ناوچەکانی ژێر دەسەڵاتیان سەقامگیرییەکی ڕێژەیی و خۆبەڕێوەبەرییەک دابین بکەن، هەم له باکووری سوریەدا له شکستهێنان به داعش و گرووپه تێرۆریستەکانی دیکەدا ڕۆڵی چارەنووسساز بگێڕن، بۆیە جێبەجێ کردنی نیازه ڕاگەیاندراوەکەی سەرۆکی ئەمریکا، کاریگەری نەرێنی سیاسی و مرۆیی هەم بۆ ماف و هەبوونی کورد، هە م بۆ ئاشتی و ئاسایش له ناوچهکە و له جیهاندا دەبێت، ئەگەری پاشگەزبوونەوەی ئەمریکا له پشتیوانیی مەیدانی له کوردەکانی ڕۆژئاوا، نەک هەر دەستی دەوڵەتی تورکیه بۆ هێرش بۆ سەر ئەزموونی ڕۆژئاوای کوردستان و گۆڕینی پێکهاتەی ئەتنیکیی ئەم دەڤەرانه ئاوەڵا دەکات، بەڵکوو دەبێته هۆی ماڵوێڕانی و ئاوارەبوونی خەڵکی ئه و ناوچە یه و بۆشاییەکی ئاسایشیش دروست دەکات که تەنیا یارمەتی به سەرهەڵدانەوه و بەهێزبوونەوەی داعش و گرووپه هاوشێوەکانی دەکات.
لەلایەکی دیکەوه دنیای ڕۆژئاوا بەتایبەتی ئەمریکا که لە باری جەهانبینی و بەهاکانەوه گەلی کورد له ناوچەدا به نزیک له خۆی دەزانێ و له شەڕی دژه تێرۆریشدا قەرزداری فیداکاریی کوردەکانه، به پشت تێکردن له کوردەکان و تووشکردنیان به چارەنووسی نادیار زیان به متمانه و سەنگی خۆیان دەگەیەنن و بەم کاره تەنیا لایەنه خراپکارەکان له ناوچەدا بەتایبەتی دوژمنانی کورد لە ناویاندا کۆماری ئیسلامیی ئێران مەیدانی مانۆڕی تێکدەرانەیان بەهێز دەبت.
لە بەشێکی دیکەی ڕاگەیەندراوەکەدا هاتووە: حیزبی دێموکڕاتی کورستان وێڕای لەقەڵەمدانی نیازە ڕاگەیاندراوەکەی بەڕێز ترامپ به کارێکی هەڵنەسەنگێندراو و زیانبار، خۆشحاڵیی خۆی له و شەپۆله له هاوپێوەندیی ئەمریکیی و جیهانی لەگەڵ ڕۆژئاوای کوردستان بۆ پاشگەزکردنەوەی دۆناڵد ترامپ له و نیازەی دەردەبڕێت، هاوکات هیوامان وایە ئاقاری ڕووداوەکان به چەشنێک بێت که نه ماف و ئازادییەکانی گەلی کورد له سوریا و له وڵاتانی دیکەدا لەوه زیاتر بکەوێته بەر مەترسی و نه پێوەره مرۆیی و شارستانی و نێونەتەوەییەکان و مافی گەلانی ناوچەکە له بەستێنی توندڕەوی و ناسەقامگیریدا هێندەی دیکه پێشێل بکرێن.
بۆ سەرجەم نەتەوەی کورد بەتایبەتی گەلی کورد له ڕۆژئاوای کوردستانیش له و باوەڕەداین که له گرتنەبەری هەر هەنگاو و هەڵوێستێکدا پێویسته یەکگرتوویی نێوماڵی کورد لەبەرچاو بگیرێ.[1]

رووداو دیجیتاڵ
داڕشتنەوە: هیدایەت جان
ئەمڕۆ 33 ساڵ بەسەر تیرۆرکردنی د. عەبدولڕەحمان قاسملوو، سکرتێری گشتیی حیزبی دیموکراتی کوردستانی ئێران لە ڤیەنای پایتەختی نەمسا تێدەپەڕێت، کە لە کاتی دانوستاندندا لەگەڵ نوێنەرانی کۆماری ئیسلامیی ئێران تیرۆر کرا. سکرتێری گشتیی حیزبی دیموکراتی کوردستان دەڵێت، دوای یەکگرتنەوەی دیموکراتەکان کار لەسەر بەگەڕخستنەوەی دۆسیەکە دەکەن و دەشڵێت، ئەو جۆرەی پێویست بوو بەدوایدا چووباین، زۆری بەدوادا نەچووین و ئەو هەوڵانەی ئەنجامیشمان داوە، زۆر شێلگیرانە نەبووە.
خالید عەزیزی، سکرتێری گشتی حیزبی دیموکراتی کوردستان لە هەڤپەیڤینێکدا لەگەڵ تۆڕی میدیایی ڕووداو لە بوولتەنی ڕۆژهەڵاتی کوردستانی تیشکی خستە سەر دۆسیەی تیرۆرکردنی د. عەبدولڕەحمان قاسملوو، سکرتێری گشتیی حیزبی دیموکراتی کوردستان و ئەو هەوڵانەی بۆ بەگەڕخستنی دۆسیەی تیرۆرەکەی لە نەمسا ئەنجامیان داوە.
دەقی هەڤپەیڤینی ڕووداو لەگەڵ خالید عەزیزی، سکرتێری گشتیی حیزبی دیموکراتی کوردستان:
رووداو: دۆسیەی تیرۆری د. قاسملوو و یاوەرانی داخراوە یان هێشتا کارایە؟
خالید عەزیزی: تاوەکو ئەو جێیەی پەیوەندیی بە دۆسیەی تیرۆری د. قاسملووەوە هەیە، ئەو دۆسیەیە نە کراوەیە و نە داخراوە، داخراو بەو مانایەی هیچ دادگایەکی بەخۆوە نەبینیوە کە لەو دادگایەدا حوکم بدرێت و کراوەش بەو مانایەی هێشتا باسێک نییە لەسەر ئەوەی ئەو پرسە بێتەوە بەرباس؛ بەڵام کاتێک ئێمە لەگەڵ بەرپرسانی نەمسا قسەمان کرد، بەتایبەت سێ ساڵ پێش ئێستا، بۆ خۆم لەگەڵ یەک دوو کەس لە وەزارەتی داد و هەندێک کەسایەتی لە پەرلەمان و کەسایەتییە سیاسییەکانی نەمسا قسەم کرد، ئەوان لەو باوەڕەدا بوون، ئەو پرسە لە داهاتوودا دەتوانێت ببێتەوە دۆسیەیەکی یاسایی، هۆیەکەشی ئەوەیە کە تاوەکو ئێستا ئەو دۆسیەیە نەچووەتە دادگە و بڕیارێکی لەسەر نەدراوە. بەهۆی ساتوسەودای بازرگانیی نێوان دەوڵەتی نەمسا و ئێران، کاتی خۆی ئەو دۆسیەیە پشتگوێ خرا و بووە کەرەستەیەک بۆ مامەڵەی نێوان ڤیەننا و تاران. لە ئەنجامدا ئەو دۆسیەیە دەگەڕێتەوە سەر هەوڵ و تێکۆشانی ئەندامانی حیزبی دیموکرات و دۆستانی ئەو حزبە لە دەرەوەی وڵات و هەموو شوێنێک کە بتوانن کاری لەسەر بکەن.
رووداو: بەنیازن چۆن لەڕووی یاسایی و سیاسییەوە هەوڵی بەگەڕخستنی ئەو دۆسیەیە بدەن؟
خالید عەزیزی: هەردووک لایەنەکە لەخۆدەگرێت، هیوادارم لە کاتی یەکگرتنەوەی دیموکراتەکان، ئەوکات هەردوولا کە ئەوکات بەیەکەوە دەبین، دەست ئاوەڵاییەکی زیاترمان هەبێت بۆئەوەی لەڕووی یاساییەوە ئەو دۆسیەیە زیندوو بکەینەوە و لەو سۆنگەیەوە بیگەیەنینە قۆناخێک کە بکرێت لە لایەنی سیاسی و یاسایی و مرۆییشەوە بەشداریی ئەو دۆسیە بین. جەوهەری ئەو دۆسیە ئەوەیە کە کۆماری ئیسلامیی ئێران کاتی خۆی بڕیاری لەسەرداوە و د. قاسملووی تیرۆر کردووە و بە بڕیاری عەلی ئەکبەر ویلایەتی، وەزیری دەرەوەی ئەوکات و سەرکردەکانی کۆماری ئیسلامیی ئێران، ئەو تیرۆرە کراوە و ئەو کەسانەی تاوانەکەیان ئەنجامداوە بە هاوکاری دەوڵەتی نەمسا گەڕاونەتەوە ئێران. بۆیە ئەو دۆسیەیە تەنیا دۆسیەیەکی یاسایی نییە، بەڵکو دۆسیەیەکی مرۆیی و سیاسیشە، ئەوەش دەبێت لە داهاتوودا کاری زۆرتری لەسەر بکرێت.
رووداو: لەو پەیوەندییەدا بە شێوەی ڕاستەوخۆ توانیوتانە لەگەڵ بەرپرسانی نەمسا گفتوگۆ بکەن؟
خالید عەزیزی: بەهۆی ئەوەی 33 ساڵ لەو دۆسیەیە تێپەڕیوە و لەو ماوەیەدا لە نەمسا حکومەتی جۆراوجۆر هاتوونەتە سەر کار و ڕۆیشتوون و دۆسیەیەک لە ئارادا نەبووە تاوەکو ئەو دەوڵەتانە کاری لەسەر بکەن، بۆیە وەکو دۆسیەیەکی یاسایی ئێستا شتێک لەبەردەست نییە، بەڵام لەناو ڕای گشتیی سیاسی و دادوەری و یاسایی و میدیا و لای پارێزەرەکان ئەو دۆسیەیە دۆسیەیەکی لەبیرکراو نییە، هەموو ئەوانە گرێدراوی ئەوەن کە ئێمە لە داهاتوودا چەندە کاری لەسەر دەکەین. هەندێک بەڵگە ڕوونن، ئەو ڕووداوە لە ڤیەننا ڕوویداوە و لە ڕووداوەکەدا د. قاسملوو، ڕێبەری حیزبی دیموکرات خەریکی دانوستان بووە لەگەڵ دیپلۆمات -تیرۆریستەکانی کۆماری ئیسلامی و ئەوان ئەو تاوانەیان ئەنجامداوە، بەرپرسانی پۆلیسی ڤیەننا و کاربەدەستانی حکومەتی ئەوکاتی نەمسا ئەوە دەزانن. واتە لەو بوارەدا بەڵگە و هۆکار بە ڕادەی پێویست بەردەستن کە ئەو پرسە بۆ جارێکی دیکە بەگەڕبخرێتەوە.
رووداو: لە ماوەی ساڵانی ڕابردوودا ئایا ئەو دۆسیەیە لەلایەن دیموکراتەکانەوە پشتگوێ نەخراوە؟
خالید عەزیزی: بە ڕاشکاوی دەڵێم، تا ئەو جێیەی پەیوەندیی بە ئێمەی دیموکراتەکانەوە هەیە، کەمکاری و کەمتەرخەمیمان کردووە، ئەو جۆرەی پێویست بوو بەدوایدا چووباین، زۆری بەدوادا نەچووین و ئەو هەوڵانەی ئەنجامیشمان داوە، زۆر شێلگیرانە نەبووە، بۆیە دەڵێم هیوادارم لە داهاتوودا یەکگرتنەوەی دیموکراتەکان یارمەتیدەر بێت هەموومان یەکدەست، بەیەکەوە بتوانین لە بواری جۆراوجۆردا ئەو دۆسیەیە چالاک بکەینەوە. با، من دەبێت بە ڕاشکاوی ئەوە قبووڵ بکەم. هەوڵمان داوە، خەممان لێ خواردووە و بەدوایدا چووین و دەکرێت بڵێم هەموو ئەندامێکی حیزبی دیموکرات زۆری پێوە ماندوو بووە، بەڵام ئەوە کێشەیەکی یاسایی و سیاسییە و کار و شوێنی خۆی پێویستە و پسپۆڕی و پشوودرێژیی خۆی دەوێت، بۆیە هیوادارم لە داهاتوودا لەو بوارانە دەستکراوەیی زیاترمان هەبێت.
رووداو: باسی یەکگرتنەوەی دوو لایەنی حیزبی دیموکراتت کرد، هەنگاوەکان بە کوێ گەیشتوون؟
خالید عەزیزی: پرسی یەکگرتنەوەی دیموکراتەکان قۆناخگەلی جۆراوجۆری هەبووە و دانیشتن و دانوستاندنەکان تاڕادەیەکی زۆر لەسەر ئەو ڕێککەوتنە گشتییانەی کە کردوومانن، گەیشتوونەتە ئەنجام؛ بەڵام سرووشتییە، دەیان دامەزراوە و ئۆرگان و ئەندام و کادیرانی حیزبی دیموکرات دەخەینەوە سەریەک و دەبنەوە بە یەک حیزب، ئەوە لەڕووی کاتەوە ماوەیەکی تێپەڕاندووە کە ئەو کاتە لە زۆر بوارەوە توانیویەتی یارمەتیی زۆرمان بدات و باشتر لە ویست و داخوازییەکانی یەکدی تێبگەین.
رووداو: کەواتە گەیشتوونەتە ئەو قۆناخەی بڵێن پرسی یەکگرتنەوە بڕیاری کۆتایی لەسەر دراوە و دەبێت یەکبگرنەوە؟
خالید عەزیزی: پێموایە کارێکی زۆری لەسەر کراوە و گەیشتووەتە قۆناخەکانی کۆتایی، هۆیەکەشی ئەوەیە بە دەیان جار جەختمان لەوە کردووەتەوە، هەم خەڵکی ڕۆژهەڵاتی کوردستان ئەو یەکگرتنەوەیان ویستووە و ئێمەش گوێمانداونەتێ و هەم ئەندام و کادیرانی حیزبی دیموکرات لە هەردوولا ئیدی گەیشتوونەتە ئەو باوەڕە کە دوو حیزبی دیموکرات چیدیکە پێویست نییە و دەبێت ببێتەوە بە یەک حیزبی دیموکرات. بۆیە هیوادارم لە داهاتوویەکی نە زۆر دوور، ئەو پرۆسەیە بگاتە ئەنجام و کۆتایی پێبێت.
رووداو: هیچ هەوڵێک هەیە بۆئەوەی ئەو پرۆسەیە بە جۆرێک لەبارببرێت؟
خالید عەزیزی: بێگومان نەیارەکانی حیزبی دیموکرات و ڕۆژهەڵاتی کوردستان، بەتایبەت دەست و پەیوەندییەکانی کۆماری ئیسلامیی ئێران، هەرگیز لە یەکگرتوویی و یەکڕیزیی گەلی کورد لە ڕۆژهەڵاتی کوردستان نەک هەر دڵخۆش نین، بەڵکو هەوڵ دەدەن بە شێوازی جۆراوجۆر تێکی بدەن، بەڵام ئیرادە و ویستی ئێمە دەتوانێت بەسەر هەموو ئەوانەدا زاڵ ببێت، چونکە ئەوە ئێمەی دیموکراتین لەسەر داهاتووی حیزبی دیموکراتێکی یەکگرتوو بڕیار دەدەین، نەک خەڵکێکی دیکە. بۆیە من زیاتر گەشبینم و پێموایە هەوڵ و تێکۆشانی لایەنە نەیارەکانی حیزبی دیموکرات، بەتایبەتی دەستوپێوەندییەکانی کۆماری ئیسلامی لەو بوارەدا ناتوانێت سەرکەوێت، هۆیەکەشی ئەوەیە کە خەڵکی ڕۆژهەڵاتی کوردستان بەگشتی ئەو یەکگرتنەوەیان دەوێت و ئەندام و کادیرانی حیزبی دیموکرات هەموویان گەیشتوونەتە ئەو باوەڕەی کە ئیدی کاتی ئەوە هاتووە ئەو دوو حیزبە یەکبگرنەوە.[1]