بەناوەی خوای بەخشندەی میهرەبان
راگەیەندراوێک لە مەکتەبی سیاسی یەکگرتووی ئیسلامی کوردستان
لەسەر ڕووداوەکانی دوزخورماتوو.
هاوڵاتیانی خۆشەویست
حزب و لایەنە سیاسیەکان
بەداخ و پەژارەیەکی زۆرەوە ماوەی دوو ڕۆژە خەڵکی شاری دوزخورماتوو ڕووبەروی تەنگژەیەکی سەخت و ئالۆز بونەتەوەو بوەتە مایەی بریندارکرن و گیان لەدەست دانی چەندین هاولاتی سڤیل و سوتاندنی مزگەوت و شوێنی کەسابەت و ماڵی هاوڵاتیان.
ئێمە لەیەکگرتووی ئیسلامی کوردستان نیگەرانی و دڵتەنگی خۆمان بۆ ئەو دۆخە نالەبارەی دوزخورماتوو ڕادەگەیەنین و پرسەو سەرەخۆشی خۆمان ئاراستەی کەس و کاری قوربانیانی ڕوداوەکەی ئەم دواییەی دوزخورماتوو دەکەین و دوعای خێرو شیفای بەپەلە بۆ بریندارەکان لەخودای بەدەسەلات دەخوازین.
داواکارین لە هاوڵاتیان و سەرجەم لایەنەکانی ناو دوزخورماتوو بەگیانی برایەتی و ڕۆحی پێکەوە ژیانەوە ڕووبەروی هەر هەوڵێک ببنەوە کە ئاسایشی کۆمەڵایەتی و سەرو ماڵی هاوڵاتیان دەخاتە مەترسیەوە.
داوەکارین لەلایەنە پەیوەندیدارەکانی سیاسی و سەربازی و ئیداری لە هەرێم و بەغدا بەزوترین کات لە ڕێی گفتوگۆوە چارەسەرێک بۆ ئەو دۆخە بدۆزنەوەو بەهێورکردنەوەی خێرای دۆخەکەو چارەسەری کێشەکە، هەروەها دەخوازین هەردوو ئیدارەی پارێزگای کەرکووک و صلاح الدین کۆبونەوەی هاوبەش بکەن بۆ گیرانەوەی متمانەو ڕۆحی پێکەوە ژیان بۆ ناوچەکە و قەرەبوکردنەوەی هاونیشتمانیان.
ئێمە لە یەکگرتووی ئیسلامی کوردستان ئامادەین بۆ هەر هەوڵێک کە ئاشتی و تەبایی و پێکەوەژیان بگەرێتەوە بۆ ناوچەکە.
جارێکی ترئیدانەی هەر هەوڵ و جوڵەیەک دەکەین کە تیرۆر بەرهەم دەهێنێت و هاوڵاتیان دەتۆقێنێت و ئاسایشی کۆمەڵایەتیمان لەناو دەبات.
مەکتەبی سیاسی
یەکگرتووی ئیسلامی کوردستان
15-11-2015

بەرپرسێکی #پارتی دیموکراتی کوردستان# ئاشکرایکرد: بڕیاردراوە دۆسیەی ئەمنی #دوزخورماتوو# ڕادەستی ھێزی پۆلیس بکرێتەوە، ئێمەش خەریکی ڕێکارەکانین و لە ماوەیەکی نزیکدا بارەگای خۆمان دەکەینەوە، ئەمەش دەبێتە دەرفەتێک بۆ گەڕانەوەی ئاوارەکان.

بەختیار ھیجران، کارگێڕی لقی 22ی پارتی دیموکراتی کوردستان لە گەرمیان و بەرپرسی لیژنەی ناوچەی پارتی دیموکراتی کوردستان لە دوزخورماتوو، بۆ ماڵپەڕی فەرمیی پارتی دیموکراتی کوردستان وتی: سەرۆک وەزیرانی ئێراق بڕیاریداوە دۆسیەی ئەمنی بدرێتە پۆلیسی ناوخۆیی و تا ئێستا ئەمە لە شەش پارێزگاش جێبەجێکراوە، لە دوزخورماتووش جێبەجێ دەکرێت، بەڵام بەداخەوە لە پۆلیس تەنیا پۆستێک دراوە بە کورد و ئێمە ئەفسەرمان لە پۆلیس کەمە، بەڵام ھەر باشە دۆسیەی ئەمنی لەدەستی پۆلیس دابێت، چونکە پێشتر لە دەست میلیشیادا بوو دواتر درا ھێزەکانی وەڵامدانەوەی خێرا و دواتر درا دەست سوپا و ئێستا دەدرێتەوە ھێزەکانی پۆلیسی ناوخۆ.
بەختیار ھیجران وتیشی: ئەمە زۆر باشە بۆ کورد و دۆخی ئەمنی باشتر دەبێت، چونکە ئێمە ئاوارەیەکی زۆرمان ھەیە و تەنیا خەڵکی پارتی 170 ماڵ ئاوارەن و نەگەڕاونەتەوە، بۆیە دەرفەتێکی باشە بۆ ئەوەی ئاوارەکان بگەڕێنەوە. ھیجران باسی لەوەش کرد: بڕیاردراوە پارتی دیموکراتی کوردستان لە دوزخورماتوو بارەگای خۆی وەربگرێتەوە و بەفەرمیی بیکاتەوە، بۆ ئەو مەبەستەش خەریکی ڕێکارەکانین و بڕیارە ڕۆژی سێشەممە #23-01-2024# لەگەڵ قایمقامی دوزخورماتوو کۆببینەوە بۆ ئەوەی وادەیەک بۆ کردنەوەی بارەگاکەی خۆمان دیار بکەین و بە فەرمیی وەکوو پارتی بگەڕێینەوە بۆ دوزخورماتوو. [1]

دواڕۆژ، عەلی حەمە سەعید
بەهۆی ئه و هێرشانەی کە چەکدارانی #حەشدی شەعبی# کردویانەتە سەر دوز#خورماتوو# بە سەدان ئاوارەی ئه و شارە ئاوارەبوون، ئەمڕۆش نزیکەی 100 خێزانی ئاوارە لەلایەن وەزارەتی کۆچ و کۆچبەرانی عێراقییەوە گواسترانەوە بۆ کەمپی بەرزنجە لە سنوری قەزای سەیدسادق هەر ئەمڕۆش پێداویستییان بەسەردا دابەشکرا.
کاروان عومەر، سەرۆکی لیژنەی دابەشکردنی پێداویستی بەسەر ئاوارەکانی کەمپی بەرزنجە لەلایەن وەزارەتی کۆچ و کۆچبەرانی عێراقییەوە بەدواڕۆژی ڕاگەیاند، بەهۆی پڕبونی کەمپی قوشتەپە و نەمانی جێگەی پێویست ناچار بوین ئه و ئاوارانەی کە ڕوو لە شارەکانی هەرێم دەکەن بیانگوازینەوە بۆ کەمپی بەرزنجە لە سنووری قەزای سەیدسادق هەر ئەمڕۆش 61 خێزان گەشتونەتە کەمپەکە و تا ئێوارەش نزیکەی 100 خێزان دەگەنە کەمپی بەرزنجە.
ئاماژەی بەوەشکرد،هەر ئەمڕۆ پێداویستییە سەرەتاییەکانی وەک خۆراک و ڕاخەر و بەتانی و چەند پێداویستییەکی ترمان بۆ دابینکردوون هاوکات بەنوسراوی ڕەسمیش داوامان لە وەزارەتی کۆچ و کۆچبەران کردووە کە بە زوترین کات سوتەمەنی و هۆکاری گەرمکەرەوەمان بۆ دابینبکەن چونکە کەمپی بەرزنجە وەک کەمپەکانی دیکە نیە و پلەی گەرما زۆر نزمە بەتایبەت لە شەواندا.
لای خۆیەوە هاوژین عوسمان، جێگری بەڕێوەبەری کەمپی بەرزنجە بەدواڕۆژی ڕاگەیاند، کەمپەکەمان توانای لەخۆگرتنی نزیکەی 150 خێزانی هەیە و پێشبینی ئەکەین ئەمڕۆ 100 خێزان بگەنە کەمپی بەرزنجە، بۆیە ئەوەی ئەرکی ئێمەیە داواکردنە لە لایەنە پەیوەندیدارەکان بۆ دابینکردنی ئه و پێداویستییانەی کە بۆ ئاوارەکان گرنگ و پێویستە بەتایبەت خۆراک و سوتەنەمی و هۆکاری گەمکردنەوە.
ئەوەشی وت خۆشبەختانە تائێستا بەدەنگەوەهاتنێکی باش هەیە لەلایەن هاووڵاتیان و ڕێکخراوەکانەوە بۆ دابینکردنی پێداویستی بۆ ئاوارەکان، بەڵام ئومێدەوارین مانەوەی ئەم ئاوارانە درێژە نەکێشێت و هەمویان لە زوترین کاتدا بگەڕێنەوە سەرماڵ و حاڵی خۆیان.[1]
21-10-2017

سەرچاوەیەکی ڕەسمی لە نووسینگەی سەرۆک کۆماری عێراق، لە ڕوونکردنەوەیەکدا، هەموو ئەو قسەو بوختانانەی پەرلەمانتار #شوان داودی# ڕەتدەکاتەوە کە باس لەوە دەکات جەنابی سەرۆک کۆمار ڕەتی کردبێتەوە دوو فەوجی لیواکانی سەرۆکایەتی کۆمار بنێردرێن بۆ #کەرکووک# و دوز#خورماتوو#.
سەرچاوەکە وتیشی :رەتکردنەوەی ناردنی ئەو هێزانە لەلایەن بەڕێز د. #حەیدەر عەبادی# سەرۆکی حکومەتی عیراقیەوە بووە بەهۆی ڕازینەبوونی پێکهاتەی تورکمان.
ئەو قسە بێبنەمایانە هیچیان پەیوەندیی بە جەنابی سەرۆک کۆمارەوە نییەو بەردەوام بەڕێزیان لەسەرهێڵە لەگەڵ بەرپرسانی شاری کەرکووک بۆ تێپەڕاندنی دۆخەکە و بۆ ئامادەکاریی ناردنی هێزەکان، تەنانەت جەنابی سەرۆک کۆمار کۆبوونەوەی لەگەڵ فەرماندەی هێزەکان کردبوو بۆ ئامۆژگاریکردنیان لەسەر هەستیاریی بارودۆخەکە.
جێی بیرهێنانەوەیە جووڵاندنی هەر هێزێکیش پەیوەستە بە فەرماندەی گشتی هێزە چەکدارەکانی عێراقەوە.
سەرچاوەکە وتیشی، سەرۆکایەتی کۆمار لەبەرامبەر ئەو چەواشەکاریانە داوای یاسایی لەسەر ئەو کەسانە تۆماردەکات کە بە مەرام ئەم پروپاگەندە و قسەڵۆکانە دروست دەکەن.
18-11-2017

...حەسەن جومعە
بەپێ ئاماری دەزگا ئەمنییەکان پێشتر قەزای دوزخورماتوو یەکێک بووە له و ناوچانەی کە لە عیراقدا زۆرترین کردەوەی تیرۆریستی تێدا ئەنجام دراوە، بەڵام ئەمساڵ لەگەڵ چوونی هێزەکانی پێشمەرگە بۆ قەزاکە، کردەوە تیرۆریتسییەکان بەشێوەیەکی بەرچاو کەمیان کردووە و ڕەوشی ئەمنی قەزاکە تا ڕادەیەکی باش ئارامی بە خۆیەوە بینیووە.
نەقیب فاروق ئەحمەد، بەڕێوەبەری ئاسایشی قەزای دوزخورماتوو بە خەندانی ڕاگەیاند: "بەپێ ئاماری دەزگا ئەمنییەکان پێشووتر قەزای خورماتوو یەکێک بووە لە ناوچانەی کە لە عیراقدا زۆرتری کردەوەی تیرۆریستی تێدا ئەنجامدراوە، بەڵام ئەم ساڵ لەگەڵ چوونی هێزەکانی پێشمەرگە بۆ قەزاکە کردەوە تیرۆریستییەکان زۆر کەمیان کردووە و ڕەوشی ئەمنیش تا ڕادەیەکی باش ئارامی بەخۆیەوە بینیوە".
نەقیب فاروق وتی: "بەپێی ئاماری ئاسایشی قەزای خورماتوو پێش ئەوەی هێزەکانی پێشمەرگە ڕوو بکەنە خورماتوو لە مانگی 1 تا مانگی 6ی ئەم ساڵ زیاتر لە (120) کردەوەی تیرۆریستی جۆاروجۆر ڕوویانداوە، وەک کردەوەی تیرۆریستی (تەقینەوە و ڕفاندن و تەقە کردن)".
وتیشی‌: "دواتر و کاتێک هێزەکانی پێشمەرگە ڕوویانکردەقەزاکە بۆ پاراستنی لە دەست چەکدارانی داعش، کردەوە تیرۆریستییەکان تا ئاستێکی زۆر باش کەم بوونەوە و هەر بەپێی ئاماری ئاسایشی دوزخورماتوو لە دوای مانگی 6 تا مانگی 11ی ئەم ساڵ (53) کردەوەی تیرۆریستی ئەنجامدراون".
وتیشی: "بەپێی ئه و بەراوردکارییە بۆمان دەرکەوتووە لەگەڵ هاتنی‌ هێزەکانی پێشمەرگە بۆ قەزای دوزخورماتوو، کردەوە تیرۆریستییەکان لە 80% کەمیان کردووە کە ئەمەش جێگەی خۆشحاڵییە بۆ دانیشتووانی قەزای خورماتوو".
- 23-11-2014