نووسینی: مامۆستا فەهمی کاکەیی
ئەگەر لە چوار کاکەیی بپرسیت ئێوە چین؟ چوار وەڵامی جیاوازت دەست دەکەوێت. سێ کەسیان دەڵێت ئێمە موسوڵمانین و یەکێکیان دەڵێت ئێمە موسوڵمان نین. ئەو سێ کەسەی کە دەڵێن موسوڵمانین سێ وەڵامی جیاوازت دەدەنێ.
یەکێکیان دەڵێت: موسوڵمانی ڕاستەقینە ئێمەین. ئێمە کاکڵەی گوێزێکین موسوڵمانانی تر توێکڵی گوێزەکەن.
دووەم دەڵێت: یا عەلی، ئێمە پەیڕەوانی ئیمامی عەلین، بۆیە ئێمە لە شیعەوە نزیکین.
سێیەم دەڵێت: نۆژەنکەرەوەی یارسان (کاکەیی) سوڵتان سهاکی بەرزنجییە، ئەویش کوڕی شێخ عیسای بەرزنجییە، ئەمانە سوننە بوون، ئێمە لە سوننەوە نزیکین.
لە هەر گۆشە نیگایەکەوە تەماشای ئەو قسانە بکەین دەبینین هەرکامێکیان لە دیدی تایفەیەکی موسوڵمانەوە بە کافر دادەنرێن. هیچ موسوڵمانێک نییە قبووڵی ئەوە بکات کاکەیی کاکڵە بێت و ئەم توێکڵ. هەرچی سوننەیە شیعەکان بە ڕافزی دادەنێن و بە موسوڵمانیان نازانن، لەولایشەوە شیعەکان هەر خۆیانیان پێ ڕاستە. کەواتە تۆ بڵێیت موسوڵمانم یان نا بە شێوەیەک لە شێوەکان هەر ڕەت دەکرێیتەوە.
بە پێی لێکدانەوەی زمانەوانیی وشەی (کافر) یانی لادەر، ئینکارکەر، بێبەری لە،
بێبڕوا، بێئیمان. لە ئیسلامیشدا پێچەوانەی وشەی موسوڵمانە و بە مانای کەسێک دێت کە باوەڕی بە: یەکتاپەرستی (الله)، پەیامبەریی (محمد) و ڕۆژی زیندووبوونەوە (المعاد) نەبێت. جگە لەمەش کافر جۆری زۆرە، بەڵام لەبەر ئەوەی بە چاکی نازانم زۆر لەسەری بڕۆم لێرەدا شیکردنەوەی وشەی (کافر) کۆتایی پێ دێنم. بەڵام ئایا کاکەییەکان کافرن؟
بەڵی بەگوێرەی ئەو لێکدانەوەیە بێت هەرچۆنێک تەماشای بکەیت کاکەییەکان لە دیدی گرۆی جودای ئیسلامەوە کافرن، بە تایبەتی موسوڵمانی سوننە. دەنا باوەڕمەندانی ئایینەکانی دیکە وشەی کافر بەکار ناهێنن. ئەی کاکەییەکان خۆیان بە کافر دەزانن؟
بە هیچ شێوەیەک کاکەیی خۆی بە کافر نازانێت، تا ئێوارەیش موسوڵمانێک دوویان بکەویت و بڵێت ئێوە کافرن لە خۆیانی بار ناکەن و دانی پێدا نانێن. کاکەییەکان خۆیان بە باوەڕمەند دەزانن، ئەوان پێیان وایە کەسانی سەر بە گشت ئایینەکانی دیکە، موسوڵمان بن یان باوەڕمەندی ئایینێکی تر بن، ئەوانیش ڕێگای خوداپەرستییان گرتووە و لە دواییدا هەموومان دەگەیەنە هەمان ئامانج. ئەی دەربارەی ئەو سێکوچکانییەی ئیسلام چی؟
کاکەیی باوەڕیان بە یەکتاپەرستی هەیە، واتە تەنێ یەک خودای بێشەریک هەیە و هەر ئەو خوڵقێنەری زەوی و ئاسمانە و هەر بەخۆیشی ژیانبەخشە. کاکەییەکان باوەڕیان بەوە هەیە کە (محمد) پەیامبەری خودایە و بۆ موسوڵمانەکان نێردراوە، هەروەها باوەڕیان بە دوواڕۆژیش هەیە، دیسانەوەش بە بەهەشت و دۆزەخ. کەواتە کێشەکە لە کوێیە؟ کێشەکە لەوەیە کە ئایین و باوەڕە جوداکان لێکدانەوەی جودایان هەیە بۆ ئەم مەسەلانە، هەرچی کاکەییە هیچ لێکدانەوەیەکی پێ هەڵە نییە، بەڵام لێکدانەوەی کاکەییەکان بۆ ئەو سێکوچکانییە و بۆ بەهەشت و دۆزەخ لە لای موسوڵمانەکان پەسەند نییە، نەک هەر ئەوەی ئەمان بەڵکوو لێکدانەوەی ئایینەکانی دیکەیش بە ئایینی مەسیحی و جوولەکەشەوە پەسەند نیین، چ جای ئێزیدی و هیندوئیزم و بودائیزم و سیخیزم و تەنانەت ئەو تایفانەی بەسەر ئیسلامیشەوە دەژمێردرێن وەک: عەلەوی و بەکتاشی و شەبەک و درووز و گشت ڕێبازە سۆفییەکان و هی دیکەیش.
گەلۆ ئەم کۆمەڵگایەی ئێمە بەرەو کوێ دەچێت؟ بەش بە حالی خۆم لە هەموو ژیانمدا هێندەی ئەم سێ چوار ساڵەی دوایی گوێم لە مەلا و گوتاربێژان نەگرتووە، گوتاری هەندێک لەو مامۆستا بەڕێزانە سوودبەخش بوون، لێ هی ئەوانی دیکە (کە زۆربەن) چ شتێکی باشیان لێوە فێر نەبووم و بگرە هێندە خراپ بوون تا ئەو ڕادەیەی ببنە هەڕەشە بەرامبەر گیانی پێکەوە ژیان و شێرازەی کۆمەڵگا و تا ڕادەیەکیش ئاسایشی نەتەوەیی.
ئێمە لە کۆمەڵگایەکدا دەژین ئەو خاڵانەی کۆمان دەکاتەوە زۆر زیاتر و گرنگترن لە تەنیا خاڵێک کە جیاوازیی دەخاتە نێوانمانە. ئێمە هەموومان کوردین، بەر لە چواردە سەدەیش هەر کورد بووین، زمانمان یەکە، مێژوومان یەکە، جوگرافیا کۆمان دەکاتەوە، هەمان فەرهەنگمان هەیە، سەر بە هەمان خێڵ و عەشێرەتی کوردین (من خۆم زەنگەنەم)، بۆچی دەبێت ئایین کە بنەمایەکی وابەستەگیی نەتەوەیی نییە لێکمان جودا بکاتەوە؟
دووپاتی دەکەمەوە، کاکەیی بە پێی تێگەیشتنی خۆیان (ئەمەیان گرنگە) بە هیچ شێوەیەک کافر نین، خەڵکی تر چۆن باسیان دەکات هێندە گرنگ نییە بە لایانەوە. ئەوانە با ئاگایان لە باوەڕی خۆیان بێت، کێ دەڵێت ئەوانە موسوڵمانی ڕاستەقینەن؟ خۆ کەس کەس ناناسێت و کەسیش ناچێتە گۆڕی کەسێکی دیکەوە.
بە شیعرێکی پەروینی ئیعتیسامی کۆتایی پێ دينم:
واعظی پرسید از فرزند خویش
هیچ می دانی مسلمانی به چیست؟
صدق و بی آزاری و خدمت به خلق
هم عبادت، هم کلید زندگیست
گفت زین معیار اندر شهرما
یک مسلمان هست آن هم ارمنیست!

گوندی هاوار - هەڵەبجە

بەڕێز... سەرۆککۆماری عێراقی فیدراڵ
بەڕێز... سەرۆکوەزیرانی عێراقی فیدراڵ
بەڕێزان... سەرۆک و جێگرانی پەرلەمانی عێراقی فیدراڵ
بەڕێزان... ئەندامانی پەرلەمانی عێراق
بەڕێز... نوێنەرایەتی نەتەوەیەکگرتووەکان لە عێراق و هەرێمی کوردستان
بەڕێزان... باڵیۆز و کۆنسوڵ و نوێنەری وڵاتانی جیهان لە هەرێمی کوردستان و عێراق
رای گشتی جیهانی و نێودەوڵەتی، ڕێکخراوە نێودەوڵەتییە حکومی و ناحکومییەکان و مافی مرۆڤ و کوردستانیانی هاوچارەنووسمان و دەزگاکانی عێراقی و کوردستانی و جیهانی.
ئێمە وەک کاکەییەکانی کوردستان کە خاوەنی ڕاستەقینە و مێژوویی خاک و ئاوی خۆمانین، لەسەر ئەم خاکە هەزاران ساڵە ڕەگمان داکوتاوە و پەروەردەی ئەو نیشتمانەین، بانگەوازی پشتیوانی و داواکاری بۆ سەرجەم لایەنەکان دەنێرین، تا چیتر پرۆسەی کۆمەڵکوژی و سیاسەتی دەرپەڕاندن و تۆقاندن لەسەر کوردانی کاکەیی لە ناوچە کوردستانییەکانی دەرەوەی ئیدارەی هەرێمی کوردستان بووەستێندرێت.
بەڕێزان ئێمەی کاکەیی و یارسانییەکان، کە هەمیشە هەوێنی ئاشتی و پێکەوەژیان و برایەتی بووین، هەمیشە ڕایەڵەی پەیوەندییەکانمان بەجۆرێک بونیاد ناوە، کە لە خزمەتی مرۆڤایەتی و خاک و نیشتماندابێت.
سەرباری ئەوەی لە مێژووی ناوچەکەدا لەسەر دەستی ڕژێمە یەک لەدوای یەکەکانی عێراق تووشی چەندین ستەم و نادادی بووینەتەوە، بەڵام لەدوای پرۆسەی ئازادی عێراقەوە هەموومان بە ژیانێکی باشتر و ئاسایشی زیاتر لە ناوچەکەماندا هەبووە، بەڵام بەداخەوە هاتنی #داعش# و تاوانە تیرۆریستییەکانی دۆخی ژیانی کوردانی کاکەیی لە ناوچەکان هەر لە پارێزگای مووسڵەوە تا پارێزگای دیالەو خوارووتر خستووەتە بارێکی دژوارەوە کە بە هەموو پێوەرێک دەچێتە خانەی تاوانی جینۆسایدەوە.
لەدوای ڕزگارکردنەوەی بەشێک لە ناوچەکان، ژیانی کاکەییەکان و گەڕانەوەیان بۆسەر ژیانی خۆیان، ماوەیەکە چەندین هێرش تیرۆریستی بۆسەر کاکەییەکان لە ناوچە کوردستانییەکانی دەرەوەی ئیدارەی هەرێمی کوردستان ئەنجام دەدرێت کە بووەتە هۆی شەهیدبوون و برینداربوونی چەندین هاووڵاتی کاکەیی و سووتاندنی کشتوکاڵ و وێرانکردنی مەزارگەو شوێنە پیرۆزەکانمان.
لاوازی و نەبوونی هێزی پارێزەری ئاسایشی حکومەت لە ناوچەکەمان کوردانی کاکەیی خستووەتە ڕووبەڕووبوونەوەی ڕاستەوخۆ لەگەڵ تیرۆریستاندا. ئەمەش بووەتە هۆی دۆخێکی ناهەمووار بۆ ژیان و مانەوەی ئێمە لەسەر ماڵی خۆمان، بە جۆرێک کە بۆنی پلانی ڕاگواستن و جینۆسایدێکی دیکەی ئەو هێرشانە دەکەین.
بۆیە بۆ پشتیوانی برایانمان لە ناوچەکان، داواکارین لە هەردوو حکومەتی عێراقی فیدراڵ و هەرێمی کوردستان، کە:
1. هەردوو حکومەتی عێراقی فیدراڵ و حکومەتی هەرێمی کوردستان بە میکانزمێکی گونجاو و کارا لەگەڵ سرووشتی ناوچەکە هێزی سەربازی بنێرێتە ناوچەکە بۆ نەهێشتنی بۆشایی ئاسایش و پاراستنی خەڵکی ئەو ناوچانە.
2. داواکارین لیژنەی باڵای هاوبەشی وەزارەتی بەرگری عێراقی فیدراڵ و #وەزارەتی پێشمەرگە# لەو ناوچانە کارا بکرێتەوەو هێزی پێشمەرگە بگەڕێتەوە ئەو ناوچانەی مەترسی تیرۆری لەسەرە، بە تایبەتی ناوچە کاکەیی نشینەکان.
3. داواکارین لە نوێنەری وڵاتانی هاوپەیمانی دژی تیرۆر و وڵاتانی پشتیوان لە مافەکانی مرۆڤ و دیموکراتی، ڕۆڵیان لە پاراستنی کاکەییەکاندا هەبێت، چونکە زۆرێک لە پلانی لەنێوبردنی کوردانی کاکەیی کە ئێستا لە ناوچەکە لەسەر خاک و ماڵ و شوێنە پیرۆزەکانمان هەستی پێدەکرێت.
بەڕێزان... لە ماوەی چەند مانگی ڕابردوودا چەندین هێرشی چەکداری کراوەتە سەر مەزارگە پیرۆزەکان و گوندە کاکەیی نشینەکان، بەهۆی ئەو هێرشانەوە 15 شەهید و 8 بریندار هەبوون، ئەمە جگە لەو زیانە ماڵیانەی بەر ماڵ و سەرچاوەکانی ژیانی خەڵکەکە لە ئاژەڵ و کشتوکاڵ و سەرچاوەکانی ئاوو ئۆتۆمبێل و سەرچاوەکانی دیکەی ژیان کەوتووە، ئەگەر بێت و بەر بەو هەڵمەتی پاکتاوییەی کاکەییەکان نەگیرێت، ناوچەکە ڕووبەڕووی مەترسی زیاتری کۆمەڵکوژی دەبێتەوە.
بۆیە داواکارین سەرجەم لایەنە بەرپرسەکان، هەر لایەنەو بەگوێرەی بەرپرسیاریێتی خۆی ڕۆڵی لە پاراستنی کوردانی کاکەیی و ناوچەکانی نیشتەجێبوونیان ببینێت.
کوردانی کاکەیی و یارسانی لە پارێزگاکانی #هەڵەبجە# و #سلێمانی#
#18-06-2020#

پاراستنی کاکەییەکان و ڕێزگرتن لە پیرۆزییەکانیان... ئەرکی هەمووانە
بەڕێزان:
سەرۆک کۆماری عێراقی فیدڕاڵ
سەرۆک وەزیرانی عێراقی فیدڕاڵ
سەرۆکی ئەنجومەنی نوێنەران
تەواوی فراکسیۆنەکانی ئەنجومەنی نوێنەران
بەداخەوە ڕۆژی (23 تەمووزی 2022)، دوور لە هەموو یاسا و پرنسیب و بەهایەکی مرۆیی، مەفرەزەیەکی #حەشدی شەعبی# لە نزیک شارەدێی ئامرلی سەر بە شارۆچکەی #خورماتوو#، سوکایەتی بە هاونیشتمانیەک لە برایانی کاکەیی بە ناوی (ئەیمەن عەبدی جاسم) دەکەن و دوای ئەشکەنجەدان و ئازاردانی، هاوکات (سمێڵ)ی دەتاشن، کە یەکێکە لە هیما پیرۆزەکانی ئاینی کاکەیی.
ئەم ڕەفتار و بێ ڕێزییە بەرانبەر بە کوردانی کاکەیی و پیرۆزییە ئاینیەکانیان، کارێکی ناڕەوا و نا بەرپرسانەیە و هەڵماڵینی قەتماغەی برینە بەرەو ئاژاوەگێڕی، کە گەلانی عێراق، ساڵانێکی زۆرە بە دەستیەوە دەناڵێنن.
کاکەییەکان وەک پێکهاتەیەکی ئاینی، لە ساڵانی ڕابردوودا، بەردەوام جێی ئامانجی گروپە تیرۆریستیەکان بوونە و هێشتا برینەکانیان سارێژ نەبووە وبەشێکی زۆریان بەهۆی هەڕەشەی بەردەوامی گروپە تیرۆریستیەکان، ئاوارە وبێ ماڵ و حاڵ بوونە، کەچی لەلایەن چەند کەسێکی ناو دامەزراوەیەکی ئەمنی، لە ڕوداوێکی نەخوازراودا، ئەوپەڕی بێی ڕیزیی بە پیرۆزییەکانی ئەم پێکهاتە ڕەسەنە کراوە،
هەر بۆیە ئێمە وەک نوسەران و چالاکوانان و ڕێکخراوەکانی بواری جینۆساید، جەخت دەکەینەوە لەوەی دەبێت مافی هەموو پێکهاتە ئاینی و نەتەوەییەکان لە نێویشیاندا پێکهاتەیەی کاکەییەکان پارێزراو بێت و هەموو جۆرە بێی ڕیزییەک بە پیرۆزییە ئاینیەکانیان قەدەغەکراو بێت... چونکە پێکهاتە کەمینە ئاینی و نەتەوەییەکان، هیمای فڕەنگی گەل و خاک و وڵاتان و لە تەواوی کۆمەڵگای مرۆڤایەتیدان، پاراستن و ڕێزلێگرتنیان ئەرکی سەرەکی دامەزراوەکانی دەوڵەتە.
هاوکات داوا لە سێ سەرۆکایەتیەکەی عێراق و دامەزراوە ئەمنیەکان دەکەین، تاوانباران ڕووبەرووی یاسا و دادگا بکەنەوە، تا بە سزای عادیلانەی خۆیان بکەن.. هەر وەک هیواخوازین لە هاونیشتمانیانمان لە برایانی کاکەیی، ژیرانە و بەرپرسانە مامەڵە لەگەڵ هەستیاری بابەتەکە بکەن و هەموو ڕێگەکان بۆ بەلارێدابردنی ئەم کەیسە و هەوڵی نانەوەی ئاژاوەگێڕی دابخەن.
نوسەران و چالاکوانان و ڕێکخراوەکانی بواری جینۆساید
1 ڕێکخراوی کوردستان بێی جینۆساید
2- ڕێکخراوی گەشەپێدانی مافی مرۆڤ
3 کۆمەڵەی داکۆکیکار لە پرسی ئەنفال
4 گۆڤاری تۆپزاوە تایبەت بە پرسی جینۆساید
5 تۆڕی هاوپەیمانی ڕێکخراوە کوردستانییەکان لە پێناو دادگای تاوانی نێودەوەڵەتی
6 گۆڤاری شەهید
7 ڕێکخراوی چیرۆکەکانی ئەنفال
8 ڕێکخراوی هەڵمەتی دادپەروەری
9 تۆڕی ئایکان
10 هەڵمەتی ژیان دژ بە ئیعدام لە کوردستان
11 ڕۆژنامەی نوگرەسەلمان
12 ڕێکخراوی قەدەغەکردنی چەکی کۆکوژ لە کوردستان
13 جیهانێکی بێی چەکی کیمیاوی وبایەلۆجی
14 #ڕێکخراوی کوردیپێدیا#
15 ئیدریس عەبدوڵڵا نووسەر
16 #مەلا شاخی# نووسەری بواری جینۆساید
17 #سالار مەحمود# سەرۆکی یەکێتی نوسەرانی جینۆسایدی کوردستان
18 حازم محەمەد بلەیی نووسەر و چالاکوان لە بواری جینۆساید
19 عەلی بەندی نووسەر و چالاکوان لە بواری ئەنفال و جینۆساید
20 هەدار زوبێر بارزانی پارێزەری کەیسی ئەنفال و پەرلەمانتار خولی چوارەمی ئەنجومەنی نوێنەرانی عێراق
21- عادل حاجی محمد پارێزەر وئەندامی پێشووتری پەرلەمانی کوردستان
22- ئەحمەد مەجید کەسوکاری ئەنفالکراوان و چالاکوانی بواری جینۆساید
23 ئیبراهیم هەورامانی نووسەری بواری جینۆساید
24 وزیرە جەلال سەعید دامەزرێنەر و بەرێوبەری ڕێکخراوی ژیانی نوێ بۆ ژنانی ئەنفال
25 شوان #کەلار#ی ئەندامی ئەنجومەنی نوێنەرانی عێراق و ئەندامی ئەنجومەنی باڵای کۆمەڵەی داکۆکیکار لە پرسی ئەنفال.
26 #عەدالەت عومەر# نووسەر و لێکۆڵەری بواری جینۆساید
27 دیمەن محمد سەرۆکی ڕێکخراوی چیرۆکەکانی ئەنفال
28 حیکمت فائق عارف چالاکوانی بواری جینۆساید و خاوەنی (10) شەهیدی خێزانەکەم لە کیمیاباران
29 جەبار ئەحمەد توێژەر لە بواری جینۆساید
30 عەلی مەحمود نووسەر و چالاکوانی بواری جینۆساید
31 هێمن حەسیب نووسەر و چالاکوانی بواری جینۆساید

دەقی پیرۆزباییەکەی #بافڵ تاڵەبانی#:
کاکەییەکان کە پێکهاتەیەکی ڕەسەن و گرنگی گەلەکەمانن، لە مێژووی دێرین و نوێشدا هەمیشە لە ڕیزی پێشەوەی خەبات بوون و ڕۆڵی جوامێرانەیان لەپێکەوەژیانی ئاینی و کۆمەڵایەتی کوردەواریدا بەرز دەنرخێنین.
ئەمشەو خوشک و برایانی کاکەیی کە جەژنی سێ شەوەی (یارانی قەوڵتاس) بەڕێدەکەن، وێڕای گەرمترین پیرۆزباییمان بەم بۆنەیەوە، ئومێدەوارم لە کەشێکی ئارام و خۆشیدا ئەم جەژنە بکەنەوە و ئەمشەو ببێتە مایەی تەبایی و قوڵکردنەوەی برایەتی و خۆشەویستی زیاتر لەناو گەلەکەماندا.
یەکێتیی نیشتمانیی کوردستان وەک هەمیشە پارێزەرو پشتیوانی بەدیهێنانی مافەکانتان دەبێت و پارێزگاری لە تایبەتمەندی ئاینیی کاکەیی و ئاینزاکان و پێکهاتەکانی تری نەتەوەکەمان دەکات، کە بەسەدان ساڵە لەم کوردستانەدا پێکەوە دەژین و لێبووردە لەبەرامبەر جیاوازییەکان بە ئاشتییانە و برایانە ژیان بەڕێدەکەن.
دووبارە پیرۆزبایی ئەم جەژنەتان لێدەکەین
هەر شاد و سەربەرز و سەرکەتووبن
دڵسۆزتان
بافڵ #جەلال تاڵەبانی#
17ی 1ی 2022[1]

⚠️ تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!

دەقی پیرۆزباییەکەی #شاناز ئیبراهیم ئەحمەد#:
بەبۆنەی جەژنی سێ شەوەی یاران(جەژنی قەوڵتاس)، پیرۆزباییەکی گەرم لەخوشک و برایانی کاکەیی و سەرجەم یارسانەکان لەهەرێمی کوردستان و جیهان دەکەم، هیواخوازم ئەم جەژنە بەخۆشی و کامەرانی و ئاسوودەیی بەسەرببەن.
خوشک و برایانی کاکەیی وەک پێکهاتەیەکی ڕەسەنی کۆمەڵگەکەمان، ڕۆڵی گرنگیان لە خەباتی گەلەکەماندا گێڕاوەو قوربانیدانەکانیان لەوپێناوەشدا هەرگیز لەیاد ناکرێت.
لەم بۆنەیەدا جەخت لە پشتیوانی و پاڵپشتیمان بۆ پاراستنی ماف و ئازادییە ئاینییەکانتان دەکەمەوە، پارێزگاریکردن لە کلتووری پێکەوەژیان و یەکترقبوڵکردنیش کە یەکێکە لە شوناسەکانی هەرێمی کوردستان، کاری لەپێشینەمان دەبێت.
هەر لە جەژن و ئارامیدابن
شاناز ئیبراهیم ئەحمەد
کارگێڕی مەکتەبی سیاسی(ی.ن.ک) و سەرپەرشتیاری مەڵبەندی 1ی ڕێکخستنی #سلێمانی#[1]

دەقی پیرۆزباییەکەی #قوباد تاڵەبانی#:
بە ڕێزان خوشک و برایانی کاکەیی
بەبۆنەی هاتنی جەژنی سێ شەوەی (یارانی قەوڵتاس)، جوانترین و گەرمترین پیرۆزبایی ئاڕاستەی خوشک و برا کاکەییەکانی هەرێمی کوردستان و جیهان دەکەم، هیوادارم ئەم جەژنە بەوپەڕی خۆشی و کامەرانی بەڕێ بکەن.
کاکە ییە کان پێکهاتەیەکی گرنگ و ڕە سە نی نەتەوەکەمانن، هەمیشە ئاشتی و یەکترقبوڵکردنیان کردۆتە پەیامی سەرەکی ژیانیان، بەشانازییەوە ڕۆڵێکی کاریگەر و بەرچاویان لەشۆڕش و تێکۆشانی نەتەوەکەماندا هەبووە، بۆیە جەخت دەکەینەوە کە پاراستنی ماف و ئازادییە ئاینی و مەدەنیەکانیان ئەرکی لەپێشینەمان دەبێت.
دووبارە جەژنتان پیرۆزبێت..
قوباد تاڵەبانی
جێگری سە ڕۆکی ئە نجومە نی وە زیران[1]

دەقی پیرۆزباییەکەی مەکتەبی سیاسیی #یەکێتیی نیشتمانیی کوردستان#:
خوشک و برایانی کاکەیی
بەبۆنەی جەژنی سێ شەوەی یاران (جەژنی قەوڵتاس) پیرۆزباییەکی گەرم لە ئێوەو گشت یارسانەکان دەکەین و هیودارین ئەم جەژنە بە شادی و کامەرانی ببەرنەسەر.
ڕۆڵی ئێوە وەک خزمانی کاکەیی لە خەباتی ڕەوای گەلەکەمان و گشت کایەکانی کۆمەڵی کوردەواریدا هەمیشە پێشەنگ بووە، لە قوربانیدان و لە خزمەتکردنیشدا، ئێمەش وەک یەکێتیی لەم بۆنەیەداو هەمیشە پشتیوانی لە داواکاری و مافەکانتان دەکەین لە دەربڕینی سروتە ئایینی و تایبەتیەکانتان کە بەشێکە لە هەمەڕەنگی کوردەوارییەکەمان.
جارێکی تر هەموو ڕۆژێکتان هەر خۆشی و کامەرانی بێت.
مەکتەبی سیاسی
یەکێتیی نیشتمانیی کوردستان[1]

حافز شیرازی دەڵێت:
جز از استانەی تو درجهان پناهی نیست
سرمارابەجز این درحوالەگاهی نیست
مەبەستی ئەگەر دەرکرێن یان تانەمان لێ دەن، ئێمە لە ژێر هەر ئازارێک باوەرمان بە بیروباوەری خۆمانە، تەنانەت ئەگەر هەموو دەرگاکان بەڕومان داخرا بێت.
عدو چون تیغ بکشید من سپر بندازم
کە تیغ ما جز نالە لعابی نیست
واتای ئەوەیە:
ئەگەر لە سەر بیرو باوەڕمان دوژمن شمشێر بکێشێت، ئەوە ئێمە
قەلغان هەڵدەگرین
شمشمێری ئێمە تەنها ناڵەیە بۆ دەرگای خوا و یەزدان.
هیچ شانازیەک بە قەدەر حەیا و حورمەت لای کاکەیی بەرز و بڵند نییە.ئەوان ناترسن بەس دوورە پەرێز دەبن، لە بەر ئەوەی کەس لە گەورەیی عیرفانی تاکیان تێناگات.
سمێڵ نیشانی مەردایەتی، جوامێری، قەلغانی کەسایەتی هەر پیاوێکی ئەم
پێکهاتەیە، باوەریان بەوەیە کە هەرکەس دەستکاری سمێڵ کات لە ژێر غەزەبی خوا دەکەوێت.
پیاوانێک گەورە و خاوەن کەسایەتی خاوەن سمێڵ بوونە بۆ ئەوەی شکۆ و جەلالی کەسایەتی خۆی لە جڤاکدا پێشان دات.
ناز فەلەکەدین کاکەیی[1].
27-07-2022

دەقی پەیامەکەی ئومێد خۆشناو:
بەناوی خودای بەخشندە و میهرەبان
بە بۆنەی هاتنەوەی جەژنی سێ شەوەی یاران (جەژنی قەوڵتاس)ی کاکەییەکان گەرمترین پیرۆزبایی خۆمان ئاراستەی سەرجەم خوشک و برایانی کاکەیی دەکەین.
لەم یادەدا جارێکی تر جەخت لە پێکەوە ژیانی پێکهاتە نەتەوەیی و ئاینی و مەزهەبییەکان دەکەینەوە، کە #هەولێر#ی پایتەختی هەرێمی کوردستان هەمیشە مەڵبەندی پاڵپشتی تەبایی و پێکەوە ژیانی نێوان سەرجەم پێکھاتە نەتەوەیی و ئاینی و مەزهەبییەکانی عێراق و کوردستان بووە.
هیوادارین خوشک و برا کاکەییەکان و هەموو پێکهاتە ئایینی و نەتەوەییەکان، لە سایەی ئاسوودەیی و ئارامی کوردستان جەژن و بۆنە ئاینییەکانیان بەخۆشی و کامەرانی بکەنەوە.
دووبارە جەژنی سێ شەوەی یاران، لە خوشک و برایانی کاکەیی پیرۆز بێت و هەمیشە لە جەژن و خۆشیدابن.
ئومێد خۆشناو
پارێزگاری هەولێر
2023.1.7[1]

تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!