بەڕێز بەڕێوەبەری تۆڕی میدیایی ڕووداو،
بەبۆنەی بەخشینی خەڵاتی برۆنزیی ڕیکاردۆ ئۆرتیگای نەتەوە یەکگرتووەکان بە میدیاکاری بەتوانا و پەیامنێری تۆڕی میدیایی ڕووداو لە نەتەوەیەکگرتووەکان بەڕێز مەجید نیزامەدین گلی، بەگەرمی پیرۆزبایی لە خۆتان و لەڕێگەی ئێوەشەوە لە سەرجەم میدیاکاران و کارمەندانی تۆڕی میدیایی ڕووداو دەکەین.
بەخشینی ئەم خەڵاتە جیهانییە بە تۆڕی میدیاییی ڕووداو و دەستنیشانکردنی کارە ڕۆژنامەوانییەکانی لە نەتەوەیەکگرتووەکان وەک یەکێک لە باشترین کارە ڕۆژنامەوانییەکان بۆ ساڵی 2018، جگە لەوەی بەڵگەیەکی سەنگینە بۆ سەرکەوتووییی تۆڕی میدیاییی ڕووداو لە ئاستی جیهانی و لەنێو پێشکەوتنە خێرا و گەورەکانی میدیای سەردەمدا، هاوکات شانازییەکی مەزنیشە بۆ میدیای کوردی کە لەڕێگەی ڕووداوەوە ببێتە ژمارەیەکی گرنگ لەنێو تۆڕ و دەزگا میدیاییە گرنگەکانی جیهاندا.
تۆڕی میدیاییی ڕووداو مافی خۆیەتی شانازی بەوەوە بکات کە شوێن و پێگەیەکی سەنگینی لەنێو میدیای جیهانیدا هەیە و خاڵێکی وەرچەرخانی گرنگ و سەروەرییەکی گەورەشی بۆ مێژووی بزاڤی میدیای کوردی تۆمارکردووە. ئەم سەرکەوتنە لە هەموو میدیاکارانی کوردستان پیرۆز دەکەین.
هیوای بەردەوامی و سەرکەوتنی زیاترتان بۆ دەخوازین.
سەفین موحسین دزەیی
گوتەبێژی فەریی حکومەتی هەرێمی کوردستان
#09-12-2018#
⚠️ تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!

ناو: سەفین
نازناو: سەفین دزەیی
ناوی باوک: موحسین حەمەدئەمین بایز
ساڵی لەدایکبوون: 1963
شوێنی لەدایکبوون: شاری #هەولێر#
$ژیاننامە$
ئەندازیار و سیاسەتمەدار سەفین موحسین حەمەدئەمین بایز، ناسراو بە (سەفین دزەیی) ، ساڵی 1999 و لە کۆنگرەی دوازدەیەمدا بە ئەندامی کۆمیتەی ناوەندی و ساڵی 2010 لە کۆنگرەی سێزدەیە‌مدا بە ئەندامی ئەنجوومەنی سەرکردایەتی #پارتی دیموکراتی کوردستان# هەڵبژێردراوە.
سەفین دزەیی ساڵی 1963 لە شاری هەولێر لەدایکبووە و لە بنەماڵەی ئاغاکانی دزەییە. ناوبراو هەتا پۆلی پێنجەمی سەرەتایی لە قۆتابخانەی ڕاهیبانی کلدانی بە زمانی عەرەبی خوێندووە و ساڵی 1978 قۆناغی ئامادەیی لە شانشینی بەرتانیای تەواوکردووە. ساڵی 1984 بڕوانامەی دیپلۆمی وەرگرتووە و دواتر لە ساڵی 1986 بەکالۆریۆسی ئەندازیاری دیکۆری بەدەستهیناوه. ساڵانی 2009-2012 لە کابینەی شەشەمدا وەزیری پەروەردەی حکومەتی هەرێمی کوردستان بووە. شارەزایی لە زمانەکانی کوردی، عەرەبی، ئینگلیزی، تورکی و فارسییدا هەیە.
$خەباتنامە$
ساڵی 1974 لەگەڵ خێزانەکەی لەلایەن دەسەڵاتدارانی ئێراقەوە لە شاری بەغدا دەرکراون و ڕووی کردووەتە‌ ناوچە ئازادکراوەکانی شۆڕشی ئەیلوول و لەبەر بۆردومانەکانی هێزی ئاسمانی ئێراق بۆ سەر ناوچە ئازادکراوەکان، لەگەڵ بنەماڵەکەیدا ڕووی لە وڵاتی ئێران کردووە. ساڵی 1977 ‌لەگەڵ بنەماڵەکەى ڕووی لە شانشینی بریتانیا کردووە و وەک پەنابەر لەوێ ژیاوە.
ساڵی 1999 لە کۆنگرەی دوازدەیەمدا بە ئەندامی کۆمیتەی ناوەندی و ساڵی 2010 لە کۆنگرەی سێزدەیە‌مدا بە ئەندامی ئەنجوومەنی سەرکردایەتی پارتی دیموکراتی کوردستان هەڵبژێردراوە.
ساڵانی 1992-2003 نوێنەری پارتی دیموکراتی کوردستان بووە لە کۆماری تورکیا و ساڵی 2003 جێگری دووەمی سەرۆک #مەسعود بارزانی# لە ئەنجوومەنی دەسەڵاتداریەتی (مجلس الحکم) لە ئێراق بووە.
ساڵانی 2009_2012 لە کابینەی شەشەمدا وەزیری پەروەردەی حکومەتی هەرێمی کوردستان بووە. ساڵی 2004 کراوەتە بەرپرسی مەکتەبی پەیوەندییەکانی دەرەوەی پارتی دیموکراتی کوردستان. [1]

سەرۆکی فەرمانگەی پەیوەندییەکانی دەرەوەی #حکومەتی هەرێمی کوردستان#، بەتوندی ئیدانەی هێرشەکەی سەر کێڵگەی غازی کۆرمۆر دەکات و دەڵێت: ئامانجی هێرشەکان ڕێگریکردنە لە پێشکەوتن و وەبەرهێنان.
ئەمڕۆ هەینی #26-01-2024# #سەفین دزەیی#، سەرۆکی فەرمانگەی پەیوەندییەکانی دەرەوەی حکوومەتی هەرێمی کوردستان لەبارەی هێرشەکەی سەر کێڵگەی غازی کۆرمۆر، لە هەژماری خۆی لە تۆڕی کۆمەڵایەتی ئێکس لە پەیامێکدا ڕایگەیاند، ئەم هێرشانە نابنە ڕێگر لە بەردەم بەدیهێنانی کوردستانێکی بەهێزتر.
سەرۆکی فەرمانگەی پەیوەندییەکانی دەرەوەی حکوومەتی هەرێمی کوردستان، ئاماژەی بەوەدا، بەتوندی ئیدانەی هێرشەکەی سەر کێڵگەی کۆرمۆر دەکەن، هاوکات هێرشەکان خەڵک و ژێرخانی هەرێمی کوردستانیان کردووەتە ئامانج.
دزەیی باسی لەوەشکرد، ئامانجی هێرشەکانیش ڕێگریکردنە لە پێشکەوتن و وەبەرهێنان. جەختی لەوەشکردەوە، ئەم جۆرە هێرشە قێزەونانە نابنە ڕێگر لە بەردەم بەدیهێنانی کوردستانێکی بەهێزتر. [1]

بەرپرسی فەرمانگەی پەیوەندییەکانی دەرەوەی هەرێمی کوردستان، ئاماژە بەوە دەکات، دەرفەتی وەبەرهێنان لە هەرێمی کوردستان لە بەردەم کۆمپانیا و وەبەرهێنەرە ژاپۆنییەکاندا هەیە و دەرگایان کراوەیە بۆ وەبەرهێنەرە ژاپۆنییەکان. دزەیی وتیشی: پێکەوە لەگەڵ کۆمەڵگەی نێودەوڵەتی توانیمان #داعش# لەناوبەرین، بەڵام هێشتا کارەکە تەواو نەبووە و هەڕەشەی داعشیش ماوە.
#سەفین دزەیی#، بەرپرسی فەرمانگەی پەیوەندییەکانی دەرەوەی #حکومەتی هەرێمی کوردستان#، لە بۆنەیەکی تایبەتدا لە #هەولێر#، بە بۆنەی یادی ڕۆژی نیشتمانی ژاپۆن لە کۆنفرانسێکی ڕۆژنامەوانیدا ڕایگەیاند، پەیوەندییەکانمان لەگەڵ ژاپۆن توند و تۆڵ و بەهێزن لە دوو ڕۆژی ڕابردوو کۆبوونەوە و گفتوگۆیەکی باشمان هەبووە لەگەڵ باڵیۆزی ژاپۆن، کە باسمان لە چۆنییەتی بەهێزترکردنی پەیوەندییەکانمان کردووە.

بەرپرسی فەرمانگەی پەیوەندییەکانی دەرەوەی هەرێمی کوردستان، دەڵێت: پێویستمان بە ئاشتی و سەقامگیرییە، بەداخەوە ناوچەکە بەگشتی بە ئاڵۆزییەکدا تێدەپەرێت، هیوادارم ژیری بەسەر هێزی ڕەش و تیرۆر و تاریکیدا سەرکەوێت.
ئاماژەی بەوەدا، پێکەوە لەگەڵ کۆمەڵگەی نێودەوڵەتی توانیمان داعش لەناوبەرین، هێشتاش کارەکە تەواو نەبووە و هەڕەشەی داعش ماوە و پێویست دەکات پێکەوە کار بکەین، بەڵام بەشێوازێکی جیاوازتر بۆ ئەوەی ڕێگە نەدەین هیچ جۆرە هێزێکی توندرەو و تیرۆر سەرهەڵبداتەوە.
سەفین دزەیی، وتی: لەڕووی ئابووریشەوە، حکوومەتی هەرێمی کوردستان ئامادەیە و دەرفەتی زۆر باش هەن لە کوردستان بۆ کۆمپانیا ژاپۆنییەکان بۆ ئەوەی وەبەرهێنان لە هەرێمی کوردستان بکەن.
وتیشی: ئەمڕۆ #20-02-2024# لەگەڵ جایکا گفتوگۆیەکی زۆر باشمان هەبوو لەمبارەیەوە، دەرگامان کراوەیە بۆ کۆمپانیا و وەبەرهێنەرانی ژاپۆنی و دەرفەتی زۆر باشیش هەن لە هەرێمی کوردستان. [1]