بەپێی هەواڵی کۆمەڵەی مافی مرۆڤی کوردستان و هەواڵی ناوەندی ڕۆژنیوز، دوێنێ لە شاری #مەهاباد# 10 هاوڵاتی کورد بەتۆمەتی هاوکاریی حزبە کوردییەکانی ڕۆژهەڵاتی کوردستان لەلایەن هێزەکانی وەزارەتی ئیتلاعات، بنکەی مەهابادەوە دەستگیرکراون.
ناسنامەی ئەو شەش کەس لەو هاوڵاتیانەی بەم شێوەیە: سەلاح ئادیم، داوود ڕەسوڵنەژاد، مارف قەناعەت، کەیوان، عومەر، ناسر.
هەروەها ڕاگەیەندراوە، کە دەستگیرکراوەکان گوازراونەتەوە بۆ زیندانی ناوەندی شاری #ورمێ# لە ڕۆژهەڵاتی کوردستان
کۆمەڵەی مافی مرۆڤی کوردستان
19-07-2017

بەڕێوەبەری ڕاگەیاندنی بەرێوەبەرایەتی پۆلیسی پاراستنی‌ دارستان و ژینگەی‌ پارێزگای سلێمانی ڕایدەگەیەنێت، لە هەفتەی‌ ڕابردودا 12 هاووڵاتی لەسنوری قەزای شارەزورو بە تۆمەتی ڕاوکردنی ئاژەڵ و باڵندەیی کێوی و خەڵوزدروستکردن دەستگیرکراون.
عقید هێمن کمرخان، بەڕێوەبەری ڕاگەیاندنی بەرێوەبەرایەتی پۆلیسی پاراستنی‌ دارستان و ژینگەی‌ پارێزگای سلێمانی ڕایگەیاند: "سەرەڕای هەموو ئه و قەیرانانەی ڕویان لەهەرێمی کوردستان کردوە، مەفرەزەکانی پۆلیسی پاراستنی‌ دارستان و ژینگە لە قەزاو ناحیەکان لەبەش و بنکەکان بەردەوامیان هەیە".
وتیشی‌: "توانراوە لەماوەی تەنها لە هەفتەی ڕابردوودا (12) هاووڵاتی لەسنوری قەزای شارەزورو (ناحیەی بیاره و ناحیەی تانجەڕۆ) بە تۆمەتی ڕاوکردنی ئاژەڵ و باڵندەیی کێوی و خەڵوزدروستکردن دەستگیرکراون، هاوکات دەست بگیرێت بەسەر (3) چەکی تاپڕو (2) چەکی جۆری بادی و (9) فیشەکی تاپڕ، هەروەها (1) ئامێری بیرلێدان و (62) فەردە خەڵوز و (9) باڵندە لەجۆری کۆتری کێویی و (1) کەرویشک".
ئاماژەی بەوەکشرد: "لە هەفتەی ڕابردوودا لە سنوری قەزای (ماوەت / شارباژێڕ) ناحیەی تانجەڕۆ (3) سێ حاڵەتی ئاگرکەوتنەوە ڕوویان داوە بە هۆیەشەوە ڕووبەری زیاتر لە (60) دۆنم پوش و پاوان و داری سروشتی سووتاوە هەروەها زیان بەژمارەیەک داری مێو و ڕەزو باخی هاووڵاتیان گەیشتووە".
- 20-09-2015

وەزیری کۆچ و کۆچبەرانی عێراق ڕایگەیاند، کە بەهۆی ئاڵۆزییەکانی چەند ڕۆژی ڕابردووەوە، 125 هەزار هاوڵاتی سنوری #کەرکووک# و #خورماتوو# ئاوارە بوون.
‌کاتژمێر 12ی نیوەڕۆی ئەمڕۆ، د.دەرباز محەمەد، وەزیری کۆچ و کۆچبەرانی عێراق، کۆنگرەیەکی ڕۆژنامەنووسی لە دیوانی ئیدارەی گەرمیان، لە شارۆچکەی کەلاری ناوەندی ئیدارەی گەرمیان ئەنجام دا.
دەرباز محەمەد، ڕایگەیاند:سەردانی ئاوارەکانی سنووری ناوچەی گەرمیانمان کردووە، کە زۆربەیان خەڵکی شارۆچکەی خورماتوون.
ڕاشیگەیاند:بەپێی ئامارەکان، لە شاری کەرکووک و شارۆچکەی خورماتووی سەر بە پارێزگای سەلاحەدین، نزیکەی 125 هەزار هاوڵاتی کورد ئاوارەی شارەکانی هەولێر، سلێمانی و هەڵەبجە بوون.
دەرباز محەمەد، وتیشی:شمەک و پێداویستیمان بەسەر ئاوارەکاندا دابەشکردووە و بەردەوامیش دەبین لە هاوکارییەکان، سولفەیەکیشمان خستووەتە بەردەست ئیدارەی گەرمیان، بۆ ئەوەی سەرپشک بن لە دابینکردنی پێداویستییەکانی ئه و ئاوارانە لە ئێستادا.
وەزیری کۆچ و کۆچبەرانی عێراق، ئاماژەی بەوەشکرد:لەسنوری گەرمیان لە کەمپی تازەدێ 600 کابینەی چۆڵ هەبووە، 200 خێزانی ئاوارەی خورماتوومان تێیدا نیشتەجێ کردووە‌، بەپێی خواستی ئاوارەکانیش دەتوانین کابینە چۆڵەکانی دیکەشیان بۆ دابین بکەین.
دەرباز محەمەد، وەزیری کۆچ و کۆچبەرانی عێراق ئەوەشی خستەڕوو، کە پێیان باشە ئه و ئاوارانە بگەڕێنەوە سنووری شارۆچکەی خورماتوو، بۆ ئه و مەبەستەش لەگەڵ حکومەتی عێراق قسەیان کردووە، داوایان لێکردوون چەکدارانی حەشدی شەعبی له ‌شارۆچکەکە‌ بکشێنەوە و ئه و وێرانکارییە ڕابگیرێت، بۆ ئەوەی هاوڵاتیانیش ماڵەکانی خۆیان چۆڵ نەکەن.
ڕۆژی 16ی ئەم مانگە، چەکدارانی حەشدی شەعبی و سوپای عێراق، هیرشیان کردە سەر شاری کەرکووک و شارۆچکەی خورماتووی سەر بە پارێزگای سەلاحەدین و پاش شەڕێکی چەند کاتژمێریی، هێزی پێشمەرگە کشانە داووە و کەرکووک و خورماتوو و سەرجەم ناوچە دابرێندراوەکان کەوتنە دەست هێزی عێراق و دوێنێ-ش چوونە ناو شارەدێی پردێ-ی سەر بە پارێزگای هەولێر و تیایدا جێگیربوون، بەو هۆیەشەوە ژمارەیەکی زۆری هاوڵاتیانی ئەو ناوچانە ئاوارەبوون.[1]
21-10-2017

بەڕێوەبەری ڕاگەیاندنی پۆلیسی دارستان و ژینگەی سلێمانی، ڕایدەگەیەنێت کە مەفرەزەکانیان لە ماوەی دوو ڕۆژی ڕابردوودا 13 هاوڵاتی سەرپێچیکاریان دەستگیر کردووە.
موقەدەم هێمن کەمەرخان، بەڕێوەبەری ڕاگەیاندنی پۆلیسی دارستان و ژینگەی سلێمانی، بە خەندانی ڕاگەیاند،" مەفرەزەیەکی بەشی پۆلیسی دارستان و ژینگەی سەید سادق لە چەند دەرچونێکی مەیدانیاندا بۆ سنورەکەیان، توانیان حەوت هاوڵاتی سەرپێچیکار بەخۆیان و کەرەستەکانیانەوە دەستگیر بکەن، کە سەرقاڵی ڕاوی ماسی بوون بە نایاسایی".
وتیشی: ئەو مەفرەزەیەمان دەستیشیان گرتووە بەسەر 90 کیلۆ ماسی ڕاوکراودا لەگەڵا تراکتۆرێک و ماتۆڕ سکیلێک و یەک مۆلیدەی کارەبا.
موقەدەم هێمن، ئاماژەی بەوەشدا، "لەلایەکی دیکەوە مەفرەزەیەکی بەشی پۆلیسی دارستان و ژینگەی دەربەندیخان لە چەند دەرچونێکی مەیدانیاندا توانیان 5 هاوڵاتی سەرپێچیکار دەستگیربکەن و دەستیش بگرن بەسەر کەرەستەکانیاندا، کە سەرقاڵی ڕاوکردنی ئاژەڵا و باڵندەی کێوی بوون".
بەڕێوەبەری ڕاگەیاندنی پۆلیسی دارستان و ژینگەی سلێمانی، ئەوەشی خستەڕوو: "لەلایەکی دیکەوە مەفرەزەیەکی بنکەی پۆلیسی دارستان و ژینگەی بیارە توانیان هاوڵاتیەکی سەرپێچیکار دەستگیر بکەن، کە سەرقاڵی ڕاوکردنی ئاژەڵا و باڵندەی کێوی بوو، ئەمە جگەلەوەی دەستیشیانگرتووە بەسەر کەرەستەکانیدا".
رونیشیکردەوە: "سەرجەم سەرپێچیکارەکان ڕووبەڕووی یاسا دەکرێنەوە، بۆئەوەی سزای یاسایی بدرێن".
- 29-03-2014

لە ماوەی یەک ساڵی ڕابردوو 21 هاوڵاتی هەرێمی کوردستان بەهۆی تەقینەوەی مینەوە گیانیان لەدەستداوە و 14ی دیکەش بریندابوون.
ئەمڕۆ لە کۆنگرەیەکی ڕۆژنامەنووسییدا، سیراچ بارزانی سەرۆکی دەزگای کاروباری مین لە هەرێمی کوردستان ئاماری ساڵی ڕابردووی دەزگاکەیانی خستەڕوو.
بەپێی ئامارەکە لە ماوەی یەک ساڵی ڕابردوو، 35 هاوڵاتی هەرێمی کوردستان بەر مین کەوتوون، کە لەو ژمارەیە 21-یان گیانیان لەدەستداوە و 14 کەسیش برینداربوو، لەناو قوربانییەکانیشدا هاوڵاتیانی مەدەنیی و کارمەندی دەزگا ئەمنییەکان هەبوون.
هەر بەپێی ئەو ئامارە، لەو ساڵەدا 65 کێڵگەی مین، کە ڕووبەرەکەی دەکاتە شەش ملیۆن و 425 هەزار و 146 مەتر دووجا لە مین پاککراوەتەوە و ژمارەی مینەلەناوبراوەکانیش سێ هەزار و 891 مین بووە.
ئاماژە بەوەش کرابوو، کە بەهۆی شەڕی ئێران-عێراق زۆرترین کێڵگەی مین کەوتووەتە سنووری پارێزگای #سلێمانی#، بە گشتییش لە هەرێمی کوردستان 200 میلۆن مەتر چوار گۆشە زەوی مینڕێژکراو ماون و کارکردن بۆ پاککردنەوەیان بەردەمە.[1]
#14-01-2019#

دوای هێرشەکانی دەوڵەتی تورک بۆسەر ناوچەکانی باکور و ڕۆژهەڵاتی سوریا، ژمارەیەکی زۆری هاوڵاتییان لەسەر خاکی خۆیان ئاوارەبوون و بەشێکیان ڕوویان لە باشوری کوردستان کرد.
دوای ئەوەی خۆبەڕێوبەریی باکور و ڕۆژهەڵاتی سوریا کامپێکی بۆ ئاوارەکان کردەوە، سەرەڕای بەردەوامی هێرشەکانی دەوڵەتی داگیرکەری تورک، ئەو ئاوارانە لە باشورەوە گەڕانەوە بۆ ڕۆژئاوای کوردستان.
باز ئەحمەد، بەڕێوبەری بەشی پەیوەندییەکانی دەروازەی سێمێلکا-فیشخابور ڕاگەیاند، نزیکەی چوار هەزار و 500 کۆچبەر لە کامپی بەردەڕەشی باشوری کوردستانەوە گەڕاونەتەوە بۆ شار و شارۆچکەکانی ڕۆژئاوای کوردستان و گەڕانەوەی ئاوارەی دیکەش بەردەوامە.[1]
#09-01-2020#

دواڕۆژ، نوسینگەی هەولێر
سەرپەرشتیاری فیدراسیۆنی پەنابەران ئاشکرایدەکات، لە ساڵی ڕابردووەوە 60 هەزار کەس لە هەرێمی کوردستان بۆ دەرەوە کۆچیان کردووه و زیاتر لە 138 کەسیان لە ئاودا خنکاون و 52 لەوانەش تاوەکو ئێستا بێ سەروشوێنن.
ئاری جەلال، سەرپەرشتیاری فیدراسیۆنی سەراسەری پەنابەرانی هەرێمی کوردستان بە دواڕۆژی ڕاگەیاند لەساڵی 2016 وە تاوەکو ئێستا زیاتر لە 60 هەزار هاوڵاتی لەهەرێمی کوردستانەوە بۆ هەندەران کۆچیانکردووە، بەشێکیشان لە دەریادا خنکاون بەشێکیشیان بەهۆکاری جیاجیا گیانیان لەدەستداوە، لە کۆی ئەوانەی لەو ڕێگایەدا گیانیان لەدەستداوە، زیاتر لە 138 کەسە و نزیکەی 52 هاوڵاتیش تاوەکو ئێستا بێ سەروشوێنن.
سەرپەرشتیاری فیدراسۆنی پەنابەران، ئەوەشی خستەڕوو، لە دوو ساڵی ڕابردوو شاڵاوێک لە هاوڵاتیان لەهەرێمی کوردستان کۆچیان کرد، تائێستاش کۆچکردن بەردەوامی هەیە و پێشبینیدەکرێت لە بەهاری ئەمساڵەوە کۆچکردنی هاوڵاتیان بە ڕێژەیەکی زیاتر دەستپێبکاتەوە، چونکە هێشتا بارودۆخی ئابووری و سیاسی و ئەمنی وەک ساڵانی ڕابردووە.
ئاری جەلال، ڕوونیشیکردەوە حکومەتی هەرێم تائێستا کاریان لەسەر گەڕاندنەوەی تەرمی 120 هاوڵاتی کردووە، هەروەها 52 کەسی بێسەروشوێنیش لەلایان تۆمارکراوه و بەدواداچوونی بۆ دەکەن.
20-03-2017

ئەنجومەنی تەندروستیی کانتۆنی #عەفرین# ڕایگەیاند، کە 148 هاوڵاتی مەدەنی لە ئەنجامی هێرشەکانی سوپای تورکدا شەهیدبوون و 365 هاوڵاتیش برینداربوون.
ئەمڕۆ ئەنجیلیا ڕەشۆ، هاوسەرۆکی ئەنجومەنی تەندروستی کانتۆنی عەفرین لە کۆنگرەیەکی ڕۆژنامەنووسیدا ئاماری شەهید و بریندارەکانی 18 ڕۆژی هێرشی سوپای تورک بۆ سەر عەفرینی ڕاگەیاند.
ئەنجیلیا ڕەشۆ ڕایگەیاند: لە سەرەتای هێرشی سوپای تورک بۆ سەر عەفرینەوە تا ئێستا، 148 هاوڵاتی مەدەنی شەهید بوون، کە 26یان منداڵ و 17ی دیکەیان ژن بوون.
لە بەشێکی دیکەشدا ئاشکرایکرد: هەروەها 365 هاوڵاتی برینداربوون کە 55یان ژن و 40 یان منداڵن.
ئاماژەی بەوەشداوە، هەر کاتێک ناسنامەی هەموو شەهید و بریندارەکان بە دەستمان بگات بە ڕایگشتیی ڕادەگەیەنین.
باسی لەوەش کرد، کە تا ئێستا لە بارەی ئەو هاوڵاتیانەی لە ژێر ڕووخاوەکاندا ماون هیچ زانیارییەک نییە و چارەنووسیان نادیارە.[1]
#06-02-2018#

ڕۆژنیوز هاوڕێ کرێکار
بەڕێوەبەری ئاسایشی شارۆچکەی خورماتوو، ڕایدەگەیەنێت، کە کردەوە تیرۆرستییەکان لە خورماتوو بەردەوامی هەیە و لە ماوەی ئەمساڵدا 16 هاوڵاتی لەلایەن گروپە چەکدارەکانەوە کوژراون.
هەرچەندە لە شارۆچکەی خورماتوو-ی سەر بە پارێزگای سەلاحەدین شەڕی دەستەویەخە نەماوە، بەڵام هێشتا کردەوەی تیرۆرستی تێدا ئەنجام دەدرێت.
فاروق ئەحمەد، بەڕێوەبەری ئاسایشی شارۆچکەی خورماتوو لەبارەی ڕەوشی ئەمنی شارۆچکەکەوە بە ڕۆژنیوزی وت: ڕەوشی ئەمنی بە گشتی لە شارۆچکەی خورماتوو هەندێ جار باشە و هەندێ جاریش خراپ، باش بوونی ئەوەیه، کە‌ شەڕە تەقە نیە، لە مانگی نیسانی ساڵی ڕابردوو لە شارۆچکەی خورماتوو کورد و حەشدی شەعبی لەسەر کۆمەڵێک خاڵ ڕیککەوتن، بەداخەوە جگە لە ڕاوەستانی شەڕە تەقە هیچ خاڵێکی ئه و ڕێککەوتنە نەچوەتە بواری جێ بەجێکردنەوە.
فاروق ئەحمەد، وتیشی: کردەوە تیرۆریستییەکانی خورماتوو به ‌زۆریی لە هەردوو گەڕەکی عەسکەری و تین ئەنجام دەدرێن، کە دەکەونە ژێر دەستی گروپە شیعیە جۆراوجۆرەکانی حەشدی شەعبیەوە.
بەڕێوبەری ئاسایشی خورماتوو، ڕوونیکردەوە:لە بنەڕەتدا عەکەری و تین دوو گەرەکی سونە مەزهەبن، لەکاتی شەڕی داعش-یش ئاوارە سونە مەزهەبەکانی دەوروبەری خورماتوو ڕوویان لەو دوو گەڕەکە کرد، بەڵام دوای دروستبوونی شەڕی نێوان حەشدی شەعبی و کورد لە ساڵی ڕابردوو، شیعە نفوسی خۆی لەو دوو گەڕەکە زیاترکرد، ئەمەش وایکردووە ئەوانەی دەکرێنە ئامانج عەرەبی سونە و تورکمانی سونە مەزهەب بن بەزۆریی.
ناوبراو، ئاماری کوشتن و ڕفاندنەکانی چوار مانگی یەکەمی ئەمساڵی خستەڕوو و وتی:لە ئەمساڵدا 16 کەس بە گوللەی چەکدارە نەناسراوەکان کوژراون، 15 کەسیش ڕفێندراون، بەپێی بەدواداچوونەکان بە زۆریی هەردوو گروپی عەسائیبی ئەهلی حەق و حزبوڵا-ی سەر بە حەشدی شەعبی دەستیان لە کوشتن ڕفاندن و ئاژاوە گێڕییەکانی ناو شارۆچکەی خورماتوودا هەیە.
بەڕێوبەری ئاسایشی خورماتوو، ئوتیشی:لە سەرەتادا گروپە شیعییەکانی خورماتوو ویستیان ئەوەی بەرانبەر سونە دەیکەن دژ بە کوردیش ئەنجامی بدەن، بەڵام بۆیان نەکرا چونکە زانیان کورد لێرە باڵا دەستە و خاوەنی هێزە و ئەگەر کوردیک بڕفێنن یا تیرۆری بکەن کورد وەڵامی توندوی دەبێت.
شارۆچکەی خورماتوو، سەر بە پارێزگای سەلاحەدین، دەکەوێتە ڕۆژهەڵاتی پارێزگای کەرکووک و دانیشتوانەکەی زیاتر لە 100هەزار کەس دەبن لە هەرسێ نەتەوەی کورد و عەرەب و تورکمان پێک هاتوون.
07-05-2017

دواڕۆژ، زریان محەمەد
بەڕێوەبەرایەتی پۆلیسی دارستانی سلێمانی ڕایدەگەیەنێت، لە ساڵی 2015دا زیاتر لە 700 هاوڵاتی بەهۆی ڕاوەوە دەستگیرکراون.
وتەبێژی پۆلیسی دارستان و ژینگەی سلێمانی، بەدواڕۆژی ڕاگەیاند "لەمساڵدا 743 هاووڵاتی بەهۆی بەنایاسایی ڕاوکردنەوە دەستگیرکراون که ‌284یان لەسەر باڵندەی کێوی دەستگیرکراون،‌ 73شیان لەسەر ئاژەڵی کێوی و 96 هاوڵاتیش لەسەر ڕاوی ماسی و 45 کەسیش لەسەر داربڕین و‌ 13 هاوڵاتی دیکەش لەسەر خەڵوزکردن و 190 لەسە زیادەڕەوی و 42 هاوڵاتی دیکەش لەسەر ئاگر کەوتنەوە کە ئاگریان لە دارستان و پوش و پەڵاش بەرداوه،‌ دەستگیرکراون"
عەقید هێمن کەمەر خان، وتیشی" لەساڵی 2015دا ئەو ئاگرانەی کەوتونەتەوە 271 هەزار و 397 دۆنم لە پوش و پاوەن و دارستان سوتاون و زیانیان پێگەشتووه.‌"
سەبارەت بە کەرەستەی ڕاوچییەکان کە دەستی بەسەرداگیراوه،‌ وتی" 22 کڵاشینکۆف، 2 دەمانچە، 3ژێرسە، 1 زەمینۆف،‌ 5 تیر و کەوان‌، 150 تاپڕ، 11 بادی، 444 فیشەکی کڵاشینکۆف، 584 فیشەکی تاپڕ 151 فیشەکی ژێرسە، 120‌ باڵندەی کێوی زیندو، 26 ئاژەڵی کوژراو، 123‌ جیهازی بیر لێدان، 15 دوربین،10 مۆلیدە، 29 ماتۆر سکیل، 8 بەلەم، 910 داری سروشتی بڕاو دەستیان بەسەرداگیراوە. "
ئاماژەی بەوەشدا لەو ڕووبەڕووبوونەوانەدا کە ڕاوچی دەستگیر دەکرێن ئەفسەرەکانمان ڕوبەڕوی کێشەی کۆمەڵایەتی بونەتەوە.